អាជ្ញាធរ ព្រមានចាត់វិធានការច្បាប់ជាថ្មីទៀត ចំពោះបុគ្គលល្មើសនឹងបម្រាមរបស់រដ្ឋបាលរាជធានី ដែលហាមមិនឱ្យប្រមូលផ្តុំមនុស្សច្រើន រយៈពេល១៤ថ្ងៃ គិតត្រឹមម៉ោងសូន្យ ថ្ងៃទី១០ ខែកក្កដា ស្ថិតក្នុងភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
ការព្រមានជាថ្មីនេះ ធ្វើឡើងមុនមួយថ្ងៃ នៃថ្ងៃបុណ្យរំឮកខួប៥ឆ្នាំ ដែលឃាតករបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦ ស្ថិតនៅក្នុងម៉ាត នៃបរិវេណហ្គារ៉ាស់សាំងកាល់តិច ស្តុបបូកគោ។
ក្នុងសេចក្តីសម្រេចរបស់រដ្ឋបាលរាជធានីភ្នំពេញ បានឱ្យដឹងកាលពីថ្ងៃទី៩ ខែកក្កដា ឆ្នាំ២០២១នេះថា រដ្ឋបាលរាជធានីសម្រេចផ្អាកជាបណ្តោះអាសន្នចំពោះសកម្មភាពការងារ មុខរបរ ឬអាជីវកម្មដែលមានហានិភ័យខ្ពស់ នៃការឆ្លងរាលដាលជំងឺកូវីដ-១៩ និងការជួបជុំ ឬការប្រមូលផ្តុំមនុស្សជាលក្ខណៈឯកជននៅក្នុងភូមិសាស្ត្ររាជធានីភ្នំពេញ សម្រាប់រយៈពេល១៤ថ្ងៃ គិតចាប់ពីថ្ងៃទី១០ ខែកក្កដា រហូតដល់ថ្ងៃទី២៣ ខែកក្កដា ឆ្នាំ២០២១។
សេចក្តីសម្រេចនោះ បន្តថា សកម្មភាពការងារ មុខរបរ ឬអាជីវកម្មដែលមានហានិភ័យខ្ពស់ នៃការឆ្លងរាលដាលជំងឺកូវីដ-១៩ ត្រូវបានហាមឃាត់នោះ រួមមាន សាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋ និងឯកជន លើកលែងតែសាលារៀនដែលធ្វើការតាមអនឡាញ អាជីវកម្មក្លឹបកម្សាន្តគ្រប់ប្រភេទដូចជា ខារ៉ាអូខេ រង្គសាល បៀហ្គាឌិន និងកាស៊ីណូ រមនីយដ្ឋាន សារមន្ទីរ និងសួនកម្សាន្តនានា អាជីវកម្មម៉ាស្សា រោងភាពយន្ត រោងសម្តែងសិល្បៈ ក្លឹបហាត់ប្រាណ និងមជ្ឈមណ្ឌលកីឡាជាដើម។
ដោយឡែក ទាក់ទឹងមនុស្សវិញ រដ្ឋបាលរាជធានី ហាមការជួបជុំ ឬការប្រមូលផ្តុំមនុស្សជាលក្ខណៈឯកជន កុះករកកកុញ មិនឱ្យលើសពី១៥នាក់ លើកលែងតែការជួបជុំក្នុងចំណោមសមាជិកគ្រួសារ សាច់ញាតិ ដែលរស់នៅក្នុងលំនៅឋាន ឬទីសំណាក់ជាមួយគ្នាក្នុងកម្មវិធីប្រពៃណី និងពិធីសាសនាផ្សេងៗ។ ប៉ុន្តែការរៀបចំពិធីបុណ្យសព ត្រូវគោរពតាមការកំណត់របស់អាជ្ញាធរមានសមត្ថកិច្ចផងដែរ។
ចំណែក ការជួបជុំរបស់ស្ថាប័នសាធារណៈ ការប្រមូលផ្តុំមនុស្ស និងការជួបជុំរបស់បុគ្គលិកសុខាភិបាល ដើម្បីអនុវត្តវិធានសុខាភិបាល ចំពោះការយកសំណាកមកវិភាគរកមេរោគកូវីដ-១៩ និងការចាក់វ៉ាក់សាំងការពារជំងឺកូវីដ-១៩ ការជួបជុំបុគ្គលិកសុខាភិបាលដែលបំពេញការងារសង្គ្រោះបន្ទាន់ផ្សេងទៀត ឬអាជ្ញាធរមានសមត្ថកិច្ច និងកម្លាំងគណៈបញ្ជាការឯកភាពរដ្ឋបាលគ្រប់លំដាប់ថ្នាក់ក្នុងការបំពេញការងារថែរក្សាសន្តិសុខ សណ្តាប់ធ្នាប់សាធារណៈ និងការជួបជុំមនុស្សអំឡុងពេល នៃកិច្ចនីតិវិធីរបស់មន្ត្រីនគរបាលយុត្តិធម៌ ឬរបស់តុលាការ ត្រូវបានលើកលែង ប៉ុន្តែត្រូវរក្សាគម្លាត និងអនាម័យ ស្របតាមការណែនាំរបស់ក្រសួងសុខាភិបាល។
រដ្ឋបាលរាជធានីភ្នំពេញ ក៏បានជំរុញទៅរដ្ឋបាលខណ្ឌទាំង១៤ និងមន្ទីរ-អង្គភាពជំនាញ ត្រូវសហការចុះត្រួតពិនិត្យ និងអនុវត្តវិធានការរដ្ឋបាលផ្អាកជាបណ្តោះអាសន្ននូវសកម្មភាពការងារ មុខរបរ ឬអាជីវកម្ម និងការជួបជុំ ឬការប្រមូលផ្តុំមនុស្សជាលក្ខណៈឯកជនក្នុងភូមិសាស្ត្ររាជធានីភ្នំពេញ។
ករណី មានបុគ្គលណាមួយល្មើសនឹងវិធានការនេះ ត្រូវអនុវត្តទណ្ឌកម្មរដ្ឋបាល និងទណ្ឌកម្មច្បាប់ រួមទាំងផ្សព្វផ្សាយជាសាធារណៈចំពោះបុគ្គលល្មើស ស្របតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធ ជាធរមាន ដោយគ្មានការលើកលែងនោះឡើយ។
វីអូឌី មិនអាចសុំការបំភ្លឺបន្ថែមជុំវិញរឿងនេះ ពីអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យ លោក ម៉េត មាសភក្តី បានទេនៅថ្ងៃនេះ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព គាំទ្រនឹងវិធានការរបស់រដ្ឋបាលរាជធានីភ្នំពេញ ប៉ុន្តែលោកស្រី ជំរុញទៅអាជ្ញាធរត្រូវយកចិត្តទុកដាក់លើផលប៉ះពល់ដល់អាជីវកម្ម និងមុខរបរ ការងាររបស់ប្រជាពលរដ្ឋ បើពុំដូច្នោះទេនឹងធ្វើឱ្យពលរដ្ឋជួបបញ្ហាប្រឈមកាន់តែខ្លាំងថែមមួយកម្រិតទៀត។
លោកស្រីជំរុញដូចនេះថា៖ «យើងដឹងហើយពួកគាត់ការងារ [កម្មករ ឬបុគ្គលនៅតាមហាង]ទទួលបានប្រាក់ចំណូលតិចតួច អ្នកខ្លះជំពាក់បំណុល អ្នកខ្លះមានបន្ទុកកូនតូចៗជាដើម ឬម្តាយចាស់ជរាជាដើម បើសិនជាគាត់ត្រូវបានបាត់បង់ការងារនៅក្នុងកាលៈទេសៈនេះទៀត វាមានផលជះខ្លាំងណាស់ទៅលើជីវភាពរបស់ពួកគាត់»។
លោកស្រីបន្ថែមថា៖ «ខ្ញុំមានតែការអំពាវនាវទៅរដ្ឋាភិបាល ក្នុងខណៈដែលយើងគិតគូដល់វិធានការទប់ស្កាត់ដល់ជំងឺកូវីដនេះហើយ ត្រូវពិនិត្យដល់ការផ្តល់យន្តការគាំពារដល់ពលរដ្ឋដែលកាត់ប្រឈមពីការប៉ះពាល់ផងដែរ»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ធ្លាប់ប្រាប់ វីអូឌី ថា គិតចាប់តាំងពីរដ្ឋាភិបាល និងអាជ្ញាធររាជធានីភ្នំពេញ ដាក់ចេញនូវបម្រាមគោចរ និងវិធានការរដ្ឋបាល មកដល់ដើមខែមិថុនា ឆ្នាំ២០២១ មានពលរដ្ឋចំនួន១ ៤៧៨នាក់ ត្រូវបានអាជ្ញាធរធ្វើការអប់រំណែនាំ និង៣៩០នាក់ រងការផាកពិន័យអន្តរការណ៍ ខណៈ៣១៩នាក់ទៀត ត្រូវបានបញ្ជូនទៅធ្វើចត្តាឡីស័ក។
តែយ៉ាងណា លោកថា ពលរដ្ឋទាំងនោះត្រូវបានអាជ្ញាធរដោះលែងឱ្យត្រឡប់ទៅផ្ទះវិញហើយ ក្រោយពីពួកគេអនុវត្តនិងបង់ប្រាក់ផាកពិន័យចូលរដ្ឋរួចហើយនោះ។ លោកបន្តថា ក្រៅពីនោះ មនុស្ស១៤នាក់ផ្សេងទៀត ត្រូវបានបញ្ជូនទៅតុលាការ ពាក់ព័ន្ធនឹងករណីល្មើសបម្រាមគោចរឬវិធានការរដ្ឋបាលនេះ ដោយក្នុងនោះមាន១១នាក់ត្រូវបានតុលាការសម្រេចឃុំខ្លួន និង៣នាក់ទៀត ត្រូវបានដោះលែងឱ្យមានសេរីភាពវិញ៕
