ស្ថានឯកអគ្គរាជទូតកម្ពុជា ប្រចាំប្រទេសម៉ាឡេស៊ី អំពាវនាវដល់ប្រជាពលរដ្ឋខ្មែរដែលស្នាក់នៅប្រទេសនេះ កុំទាន់ត្រឡប់មកកម្ពុជា ព្រោះអាចបង្កហានិភ័យ និងនាំយកជំងឺកូវីដ-១៩-បំប្លែងថ្មី Deta/DaaHis ចូលកម្ពុជាថែមទៀត។
ក្នុងសេចក្តីជូនដំណឹងរបស់ស្ថានឯកអគ្គរាជទូតកម្ពុជា នៅថ្ងៃទី៩ ខែកក្កដា ឱ្យដឹងថា ក្នុងកំឡុងពេលជាងមួយខែកន្លងទៅនេះ ទាំងនៅប្រទេសកម្ពុជា និងក្នុងប្រទេសម៉ាឡេស៊ី កំពុងមានហានិភ័យខ្ពស់ និងការកើនឡើងយ៉ាងឆាប់រហ័សនៃការឆ្លងរីករាលដាលនៃជំងឺកូវីដ-១៩-បំប្លែងថ្មី Delta/ Delta Plus ។
ករណីនេះ ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី អំពាវនាវទៅពលករ/ពលការិនី សិស្សនិស្សិត ដែលកំពុងស្នាក់នៅ ធ្វើការ និងសិក្សា នៅប្រទេសម៉ាឡេស៊ី កុំឱ្យធ្វើការបន្លាស់ទី ពីកន្លែងមួយទៅកាន់ទីកន្លែងមួយ ហើយប្រសិនបើពុំមានការចាំបាច់ និងជៀសវាងការធ្វើដំណើរវិលត្រឡប់ទៅកម្ពុជា នៅក្នុងអំឡុងពេលនេះ ដែលអាចបង្កហានិភ័យ និងអាចនាំយកជំងឺកូវីដ-១៩-បំប្លែងថ្មី Deta/DaaHis ចូលកម្ពុជាថែមទៀត ។
បន្ថែមពីនេះ ស្ថានទូតកម្ពុជា ក៏បានអំពាវនាវឱ្យពលរដ្ឋ ចូលរួមចាក់វ៉ាក់សាំងការពារជំងឺកូវីដ-១៩ ដែលផ្ដល់ឱ្យដោយអាជ្ញាធរម៉ាឡេស៊ីឱ្យបានគ្រប់ៗគ្នា ហើយត្រូវអនុវត្តន៍តាមការណែនាំរបស់ក្រសួងសុខាភិបាលប្រទេសម៉ាឡេស៊ី ឱ្យបានខ្ជាប់ខ្ជួន ជាពិសេសវិធានការការពារនានារបស់អាជ្ញាធរម៉ាឡេស៊ី ដើម្បីជួយការពារសុវត្ថិភាព ផ្ទាល់ខ្លួនរបស់ប្រជាពលរដ្ឋខ្មែរដែលកំពុងរស់នៅទីនោះ។
បើតាមក្រសួងសុខាភិបាល គិតត្រឹមព្រឹកថ្ងៃសៅរិ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ៥៩ ៩៧៨នាក់ ក្នុងនោះ អ្នកជំងឺព្យាបាលជាសះស្បើយសរុបចំនួន ៥១ ៦៦០នាក់ អ្នកស្លាប់សរុប ៨៨១នាក់ និងករណីនាំចូលពីក្រៅប្រទេសសរុប ៤ ២៩៥នាក់៕
