កម្ពុជាទាមទារឱ្យក្រុមហ៊ុនឥណ្ឌាមួយបញ្ឈប់ជាបន្ទាន់នូវការប្រើប្រាស់រូបប្រាសាទអង្គរវត្តខ្មែរទៅវេចខ្ចប់លើផលិតផលអង្កររបស់ខ្លួនដោយគ្មានការអនុញ្ញាត ដោយថា ទង្វើនេះប្រាសចាកនឹងច្បាប់ស្ដីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់។
តាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃចន្ទនេះ បានលើកឡើងថានៅខែកុម្ភៈ ឆ្នាំ២០២១ ក្រសួងការបរទេស និងក្រសួងពាណិជ្ជកម្មកម្ពុជា បានរួមគ្នាពិនិត្យឃើញថា មានផលិតផលអង្ករបរទេសប្រើឈ្មោះ Angkor Wat Thai Hom Mali Jasmine Rice កំពុងចរាចរលក់តាមប្រព័ន្ធអនឡាញ ប្រើប្រាស់រូបប្រាសាទអង្គរវត្ត ដោយពុំមានការអនុញ្ញាតពីអាជ្ញាធរមានសមត្ថកិច្ចកម្ពុជា។
ក្រសួងបន្តថា តាមការស្រាវជ្រាវបានរកឃើញថា ម្ចាស់ផលិតអង្ករនេះជាក្រុមហ៊ុនឥណ្ឌាឈ្មោះ Voyage India មានទីតាំងនៅរដ្ឋ Maharashtra នៃប្រទេសឥណ្ឌា។
ផ្អែកតាមរកឃើញនេះ រដ្ឋាភិបាលកម្ពុជាសម្រេចឱ្យស្ថានទូតកម្ពុជាប្រចាំប្រទេសឥណ្ឌាចាត់វិធានការជាបន្ទាន់ តវ៉ាទៅភាគីឥណ្ឌាឱ្យក្រុមហ៊ុននោះបញ្ឈប់ជាបន្ទាន់នូវការប្រើប្រាស់ឈ្មោះនិងរូបប្រាសាទអង្គរវត្តរបស់កម្ពុជាលើសំបកវេចខ្ចប់របស់ខ្លួន។
ក្រសួងការបរទេសបានគូសបញ្ជាក់ថា៖ «ទង្វើនេះប្រាសចាកនឹងច្បាប់ស្ដីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ ព្រមទាំងរំលោភលើអនុសញ្ញាទីក្រុងប៉ារីសស្ដីពីកិច្ចការពារកម្មសិទ្ធិឧស្សាហកម្មថែមទៀតផង»។
ក្រសួងបញ្ជាក់ទៀតថា ជាលទ្ធផល ក្រុមហ៊ុនឥណ្ឌានេះបានបញ្ឈប់ការប្រើប្រាស់ឈ្មោះនិងរូបប្រាសាទអង្គរវត្តលើសំបកវេចខ្ចប់របស់ខ្លួនតាមការតវ៉ារបស់ក្រសួងការបរទេសនិងសហប្រតិបត្តិការអន្តរជាតិ និងស្ថានទូតកម្ពុជាប្រចាំប្រទេសឥណ្ឌាហើយ៕