ពលករមួយចំនួនបានរិះគន់ចំពោះវិធានការរបស់អាជ្ញាធរនិងផ្នែកពាក់ព័ន្ធផ្សេងទៀតរបស់សុខាភិបាលថា មិនមានការទទួលខុសត្រូវក្នុងពេលអំឡុងពេលដាក់ពួកគេឱ្យធ្វើចត្តាឡីស័កនៅមណ្ឌលចត្តាឡីស័កដែលត្រូវបានរៀបចំនៅតាមខ្សែបន្ទាត់ព្រំដែនកម្ពុជា-ថៃ។
លោក លោក ប៊ុន វិបុល ជាពលករម្នាក់ បានប្រាប់ វីអូឌី នៅថ្ងៃទី១២ ខែកក្កដានេះថា រូបគេនិងពលករផ្សេងទៀតប្រមាណ២០០នាក់ដែលត្រឡប់មកពីប្រទេសថៃតាមច្រកអូរស្មាច់ ត្រូវបានអាជ្ញាធរតម្រូវឱ្យធ្វើចត្តាឡីស័កនៅក្នុងក្រុងសំរោង ខេត្តឧត្តរមានជ័យ។
បុរសស្ថិតក្នុងវ័យ៤២ឆ្នាំរូបនេះ បន្តថា ក្នុងពេលធ្វើចត្តាឡីស័កនេះ ខាងអាជ្ញាធរមិនមានការរៀបចំអ្វីទាំងអស់ ក្រៅពីតង់ដែលបានរៀបចំបន្តិចបន្តួច និងទឹកសុទ្ធ១លីត្រកន្លះសម្រាប់ប្រើប្រាស់ក្នុង១ថ្ងៃប៉ុណ្ណោះ។
ធ្លាប់ជាកម្មកររោងចក្រនៅក្នុងទីក្រុងបាងកកប្រមាណ១០ឆ្នាំ លោក ប៊ុន វិបុល បន្ថែមថា ភាពខ្វះខាតនេះជារឿងមធ្យម អ្វីដែលសំខាន់នោះគឺមន្រ្តីប្រចាំការ រួមមាន បុគ្គលិកពេទ្យ និងអាជ្ញាធរ ហាក់មានភាពរើសអើងជាខ្លាំងចំពោះពលករដែលដាក់ឱ្យធ្វើចត្តាឡីស័កនេះ។
លោក ប៊ុន វិបុល បន្តថា៖ «ពេទ្យដែលនៅហ្នឹងគេរើសអើងពលករដែលចេញមកពីថៃអ៊ីចឹងណា! អត់ទេ! ព្រោះយើងទៅក្បែរគេអត់បានផង គេខ្ពើមយើងណាស់ គ្រាន់តែឃើញ គេដេញយើងចេញភ្លាម»។
ពលការិនីដែលទើបមកពីប្រទេសថៃម្នាក់ទៀតឈ្មោះ សុខន មានស្រុកកំណើតនៅខេត្តសៀមរាប ឱ្យដឹងដែរថា នៅក្នុងទីតាំងដែលអ្នកនាងកំពុងធ្វើចត្តាឡីស័កនេះ មិនមានថ្នាំសង្កូវនិងមិនមានបន្ទប់ទឹកប្រើប្រាស់នោះទេ ហើយកន្លែងខ្លះដែលមានបន្ទប់ទឹកវិញ គឺមានភាពកខ្វក់និងខ្វះអានាម័យ។
ក្រៅពីនេះ អ្នកនាងថា អ្នកដែលតម្រូវឱ្យធ្វើចត្តាឡីស័ក ត្រូវសម្រាកដោយគ្មានមុងនិងត្រូវសម្រាកនៅក្រោមតង់ ហើយបើមានភ្លៀងនោះ ពួកគេត្រូវងើបអង្គុយ ព្រោះតែតង់លិចហើយទឹកហូរចូលកន្លែងពួកគាត់សម្រាកជាដើម។
បើតាមអ្នកស្រី សុខន នៅពេលនេះ ពួកគេលែងបារម្ភរឿងឆ្លងជំងឺកូវីដ-១៩ ប៉ុន្តែពួកគេបែរជាបារម្ភខ្លាចឆ្លងជំងឺគ្រុនចាញ់ឬគ្រុនឈាមទៅវិញ ដោយសារពួកគាត់ត្រូវប្រឈមមុខនឹងមូសខាំ ព្រោះនៅក្នុងមណ្ឌលធ្វើចត្តាឡីស័កមិនមានមុងប្រើប្រាស់ឡើយ។
អ្នកស្រី សុខន បន្តថា៖ «បញ្ហាខ្លាំងគឺមូស មូសខាំរាល់យប់ ព្រោះយើងអត់មានមុង។ ពួកខ្ញុំមកពីថៃក៏អត់មានមុងដែរ ព្រោះអីអ្នកខ្លះមកអត់មានអីទេ គឺមកតែខ្លួនទេ! មុងគឺគេអត់ឱ្យទេសម្រាប់ឈុតដែលពួកខ្ញុំមកពីរទៅបីរយនាក់នេះ គឺអត់មានមុងទេ គឺអត់ទាំងអស់គ្នា មិនមែនអត់តែខ្ញុំទេ។ ខ្ញុំដុតធុបមូសក៏អត់ឈ្នះមូសដែរ ព្រោះមូសដូចឃ្មុំអ៊ីចឹង»។
អភិបាលរងខេត្តឧត្តរមានជ័យ លោក លឹម សុខតូ បញ្ជាក់ថា ចំពោះការខ្វះខាតសម្ភារសម្រាប់ផ្គត់ផ្គង់នៅតាមមណ្ឌលធ្វើចត្តាឡីស័កនេះ អាជ្ញាធរខេត្តកំពុងដាក់សំណើទៅអនុគណៈកម្មការគ្រប់គ្រងជំងឺកូវីដ-១៩ហើយ។ លោកបន្តថា ការឆ្លើយតបបែបណានោះ នៅមិនទាន់ដឹងច្បាស់នៅឡើយទេ។
លោកបន្តថា៖ «ធម្មតា ការប្រើប្រាស់នៅតាមសាលាខ្លះ ក៏វាមានការខ្វះខាតអ៊ីចឹងដែរ។ ឥលូវនេះ អនុគណៈកម្មការកំពុងរៀបចំសុំទៅលើ ព្រោះអនុគណៈកម្មការគេចាំតែផ្តល់ឱ្យយើងទេ»។
បើតាមលោក លឹម សុខតូ គិតត្រឹមថ្ងៃទី១២ ខែកក្កដានេះ មានពលករប្រមាណ៤០០នាក់ហើយដែលធ្វើដំណើរត្រឡប់មកពីថៃវិញ តាមច្រកព្រំដែនអូរស្មាច់។
ក្នុងអំឡុងពេលដាក់ឱ្យធ្វើចត្តាឡីស័កនេះ លោក លឹម សុខតូ បញ្ជាក់ថា មានពលករមួយចំនួនរកឃើញមានវិជ្ជមានកូវីដ-១៩ជាបន្តបន្ទាប់ តាមរយៈការធ្វើតេស្តរហ័ស ប៉ុន្តែគេមិនទាន់ដឹងថាជាប្រភេទវីរុសអ្វីទេ ដោយត្រូវឆ្លងកាត់ការធ្វើតេស្តនៅម៉ាស៊ីនធំសិន។
វីអូឌី មិនអាចស្នើសុំការបញ្ជាក់បន្ថែមពីប្រធានមន្ទីរសុខាភិបាលខេត្តឧត្តរមានជ័យ លោក ឃ្លោក ហួត បានទេនៅថ្ងៃនេះ ហើយក៏មិនអាចសុំការបញ្ជាក់ពីវិធានការទប់ស្កាត់ និងប្រយុទ្ធប្រឆាំងជំងឺកូវីដ១៩ ព្រមទាំងវិធានការរដ្ឋបាលពីអាជ្ញាធរខេត្តនៅជាប់ព្រំដែនកម្ពុជា-ថៃដែរ ដូចជា ខេត្តបាត់ដំបង ប៉ៃលិន និងបន្ទាយមានជ័យ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា យល់ឃើញថា ភាពខ្វះខាតរបស់អាជ្ញាធរនេះ អាចបណ្តាលមកពីពលករសម្រុកចូលពីថៃវិញមានចំនួនច្រើនលើសពីអ្វីដែលអាជ្ញាធរបម្រុងទុក។
បើទោះជាបែបណា លោកថា បញ្ហាបន្ទប់ទឹកនិងសម្ភារប្រើប្រាស់ រួមមានមុងជាដើម មិនគួរឱ្យមានការខ្វះខាតទេ ព្រោះអ្នកធ្វើចត្តាឡីស័កអាចឆ្លងជំងឺផ្សេងៗតាមរយៈការប្រើប្រាស់បន្ទប់គ្មានអនាម័យឬមិនមានមុងចងឱ្យបានត្រឹមត្រូវ។
លោកបន្តថា៖ «សំខាន់គឺថាមណ្ឌលហ្នឹង ត្រូវតែមានបន្ទប់ស្នាក់នៅសមរម្យ ហើយមានបរិក្ខារពេទ្យប្រើប្រាស់សមរម្យ។ ហើយមួយទៀតគឺរឿងបន្ទប់អនាម័យ ឬបន្ទប់ទឹកនេះ សំខាន់ណាស់»។
ប្រទេសថៃបានប្រកាសបិទទីក្រុងបាងកកសារជាថ្មីឡើងវិញដោយបញ្ហាកូវីដ-១៩ ក្នុងរយៈពេល១ខែ ដែលនាំឱ្យពលករបរទេស រួមទាំងពលករកម្ពុជាចាត់ទុកថា ការឈប់សម្រាកដ៏យូរដោយមិនមានចំណូលបែបនេះ នាំឱ្យពួកគេត្រូវជួបហានិភ័យខ្លាំងផ្នែកជីវភាពប្រចាំថ្ងៃ។
នៅអំឡុងពេលនេះដែរ គេសង្កេតឃើញពលករកម្ពុជាបានសម្រុកចូលមកស្រុកកំណើតវិញជាបន្តបន្ទាប់ផងដែរ។ របាយការណ៍ដែលចេញដោយក្រសួងសុខាភិបាល ឱ្យដឹងថា កាលពីថ្ងៃម្សិលមិញ កម្ពុជារកឃើញអ្នកជំងឺកូវីដ-១៩ឆ្លងថ្មីជាង៩០០នាក់ និងមានអ្នកស្លាប់ដោយសារជំងឺនេះចំនួន២៣នាក់។ តួលេខនេះបានធ្វើឱ្យអ្នកឆ្លងកូវីដ-១៩សរុបជាង៦ម៉ឺននាក់ ខណៈមានអ្នកស្លាប់សរុបជិត១ ០០០នាក់៕
