ក្រសួងកសិកម្ម រុក្ខាប្រមាញ់ និងនេសាទ ឱ្យម្ចាស់ឬតំណាងក្រុមហ៊ុនវៀតណាមដែលទទួលបានដីសម្បទានសេដ្ឋកិច្ចនៅកម្ពុជា ត្រូវផ្អាកជាបណ្តោះអាសន្នចំពោះបុគ្គលិកនិងកម្មករជនជាតិវៀតណាមទាំងអស់ចេញចូលកម្ពុជាក្នុងកាលៈទេសៈ នៃការរីករាលដាលជំងឺកូវីដ-១៩។
ក្នុងលិខិតមួយចុះថ្ងៃទី១២ ខែកក្កដា ឆ្នាំ២០២១ ក្រសួងកសិកម្ម ឱ្យដឹងថា ការផ្អាកបណ្តោះអាសន្នចំពោះបុគ្គលិកនិងកម្មករវៀតណាមចេញចូលកម្ពុជានេះ គឺធ្វើឡើងតាមអនុសាសន៍របស់ប្រមុខរដ្ឋាភិបាលដែលបានស្នើសុំឱ្យបណ្តាក្រុមហ៊ុនវៀតណាមដែលកំពុងធ្វើការវិនិយោគនៅកម្ពុជា ត្រូវផ្អាកការធ្វើដំណើរចេញចូលប្រទេសទាំងពីរជាបណ្តោះអាសន្ន ដោយថា ដើម្បីចូលរួមទប់ស្កាត់ការរាលដាលជាសកលក្នុងប្រទេសកម្ពុជា ក៏ដូចពិភពលោកទាំងមូល។
វីអូឌី មិនទាន់អាចសុំការបញ្ជាក់បន្ថែមលើលិខិតនេះពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានទេ នៅថ្ងៃនេះ។
អភិបាលខេត្តរតនគិរី លោក ថង សាវុន មានប្រសាសន៍នៅថ្ងៃចន្ទនេះថា រដ្ឋបាលខេត្តនឹងអនុវត្តវិធានការរបស់រដ្ឋាភិបាលនេះឱ្យបានល្អ ដោយលោកបញ្ជាក់ថា ជនជាតិវៀតណាមអាចចេញទៅប្រទេសរបស់ពួកគេបាន ប៉ុន្តែមិនអនុញ្ញាតឱ្យចូលមកកម្ពុជាវិញឡើយក្នុងដំណាក់កាលនេះ។
លោកបន្ថែមថា៖ «យើងមិនឱ្យចេញចូលទៀតទេ ប្រសិនបើគាត់ត្រឡប់ទៅវិញ អាហ្នឹងបាន! ប៉ុន្តែបើចូលវិញ អត់បានទេ! យើងអនុវត្តទៅតាមខ្លឹមសារដែលណែនាំដោយក្រសួងកសិកម្មហ្នឹង»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន បានសាទរចំពោះវិធានការនេះ ប៉ុន្តែដើម្បីធានាពីប្រសិទ្ធភាពនៃការងារនេះ អាជ្ញាធរខេត្តជាប់ប្រទេសវៀតណាមត្រូវពង្រឹងការអនុវត្តច្បាប់ឱ្យតឹងរ៉ឹង ដោយកុំឱ្យមានការលួចចេញចូលកម្ពុជាដោយខុសច្បាប់។
លោកបន្តថា រដ្ឋាភិបាលគួរអនុវត្តវិធានការនេះតាំងពីយូរមកហើយ ហើយក្នុងវិស័យកសិ-ឧស្សាហកម្មមួយនេះ គួរតែយកកម្មករខ្មែរមកធ្វើការ ជាជាងយកកម្មករពីក្រៅប្រទេសមកធ្វើ ដែលធ្វើឱ្យមានហានិភ័យក្នុងការឆ្លងជំងឺកូវីដ-១៩។
លោក ថេង សាវឿន បន្ថែមថា៖ «អាជ្ញាធរដែលឈរជើងតាមបន្ទាត់ព្រំដែន ត្រូវពង្រឹងការត្រួតពិនិត្យ។ ហើយមួយវិញទៀត អភិបាល អាជ្ញាធរនៅតាមច្រករបៀង មន្ទីរកសិកម្ម និងមន្ទីរការងារតាមខេត្តមួយៗហ្នឹង ត្រូវពិនិត្យលើការងារហ្នឹងបន្ថែមទៀត។ ប្រសិនបើមន្ត្រីថ្នាក់ក្រោមទទួលបានគោលការណ៍ពីថ្នាក់ជាតិហើយ ប៉ុន្តែមិនអាចអនុវត្តបាន នៅឆ្លៀតគប់គិតគ្នាបើកឱ្យមានការចេញចូលបាននោះ ខ្ញុំគិតថា មិនមានប្រសិទ្ធភាពទេ»។
រដ្ឋមន្ត្រីក្រសួងមហាផ្ទៃ លោក ស ខេង កាលពីខែមេសា ឆ្នាំ២០២១ បានលើកឡើងថា ករណីនាំពលរដ្ឋកម្ពុជានិងជនបរទេសឆ្លងកាត់ព្រំដែនដោយខុសច្បាប់ នៅតែកើតមានជាបន្តបន្ទាប់។ ករណីនេះ លោកបានដាក់ចេញវិធានការមួយចំនួន ជំរុញដល់ការទប់ស្កាត់ការជួញដូរមនុស្សឆ្លងដែនខុសច្បាប់ និងការលួចលាក់នាំជនបរទេសចេញពីតំបន់បិទខ្ទប់ ដើម្បីធានាសន្តិសុខជាតិនិងសុខភាពសាធារណៈ ខណៈកម្ពុជាកំពុងប្រឈមនឹងហានិភ័យនៃការឆ្លងរាលដាលនៃជំងឺកូវីដ-១៩ ក្នុងសហគមន៍។
យោងតាមទីភ្នាក់ងារសារព័ត៌មាន Reuters រដ្ឋាភិបាលវៀតណាម នៅថ្ងៃចន្ទនេះ និងកាលពីសប្តាហ៍មុន បានដាក់ចេញវិធានការរឹតបន្តឹងការធ្វើដំណើរនៅក្នុងទីក្រុងមួយចំនួនក្នុងប្រទេស ដើម្បីប្រយុទ្ធប្រឆាំងនឹងការឆ្លងរីករាលដាលនៃជំងឺកូវីដ-១៩ ខណៈតួលេខឆ្លងប្រចាំថ្ងៃបានកើនឡើងដល់កម្រិតខ្ពស់ជិត២ ០០០ករណីក្នុងមួយថ្ងៃ៕
