មន្រ្តីជាន់ខ្ពស់ក្រសួងសុខាភិបាលបានគូសបញ្ជាក់ជាថ្មីថា ការចាក់វ៉ាក់សាំងបង្ការជំងឺកូវីដ-១៩ មិនអាចការពារការចម្លងនៃជំងឺផ្លូវដង្ហើមនេះបានទាំងស្រុងនោះទេ ប៉ុន្តែវាអាចកាត់បន្ថយអាត្រាភាពធ្ងន់ធ្ងរនិងគ្រោះថ្នាក់ដល់អាយុជីវិតរបស់អ្នកជំងឺ។
កាលពីខែមិថុនា កម្មករនៅរោងចក្រមួយកន្លែងក្នុងខណ្ឌដង្កោ រាជធានីភ្នំពេញ រាប់រយនាក់បានរកឃើញវិជ្ជមានកូវីដ-១៩ បើទោះជាក្នុងចំណោមកម្មករប្រមាណ៨០ភាគរយបានចាក់វ៉ាក់សាំងបង្ការចំនួន២ដងរួចហើយក៏ដោយ ខណៈបច្ចុប្បន្នផ្សាររដ្ឋចំនួន៣ រួមមាន ផ្សារបឹងកេងកង ផ្សារអូឡាំពិក និងផ្សារកណ្តាល បានបិទទ្វារបណ្តោះអាសន្នជាថ្មី បន្ទាប់ពីរកឃើញពលរដ្ឋនិងអាជីវករផ្សារជាច្រើននាក់ឆ្លង។
រដ្ឋលេខាធិការក្រសួងសុខាភិបាល លោក ង៉ូវ កាង លើកឡើងក្នុងសន្និសីទកាសែតមួយនៅព្រឹកថ្ងៃទី១២ ខែកក្កដា ឆ្នាំ២០២១ ដោយអំពាវនាវឱ្យពលរដ្ឋបន្តអនុវត្តវិធានការរក្សាគម្លាតសុវត្ថិភាព បើទោះជាពួកគេបានចាក់វ៉ាក់សាំងរួចក្តី។ លោកថា វ៉ាក់សាំង Sinovac និង Sinofarm ក៏ដូចជាវ៉ាក់សាំងបង្ការជំងឺកូវីដ-១៩ដទៃទៀត មិនអាចទប់ស្កាត់ការចម្លងជំងឺផ្លូវដង្ហើមថ្មីពីមនុស្សម្នាក់ទៅម្នាក់ទៀតបាន១០០ភាគរយនោះទេ ប៉ុន្តែវាអាចជួយបន្ថយអត្រាចូលសម្រាកពេទ្យ ដោយសារភាពធ្ងន់ធ្ងរនិងស្លាប់ដោយសារជំងឺ។
លោក ង៉ូវ កាង មានប្រសាសន៍ថា៖ «ត្រង់ចំណុចនេះ មានការយល់ច្រឡំច្រើនថា ការដែលចាក់វ៉ាក់សាំងហើយហ្នឹង បែរជាលែងអនុវត្តវិធានការ ៣កុំ ៣ការពារ។ គាត់ដើរមិនពាក់ម៉ាស់ គាត់ទៅសប្បាយ គាត់ខំពាក់ម៉ាស់ពីក្រៅទៅ ប៉ុន្តែដល់ចូលជួបគ្នាញ៉ាំអីក្នុងហាង ធម្មតាគឺដោះម៉ាស់អស់ហើយ ហើយឆ្លង[គឺ]ឆ្លងពេលហ្នឹង! ហើយដល់សួរពួកគាត់ទៅ គាត់ថា ទៅភ័យអី ចាក់វ៉ាក់សាំងហើយ»។
អភិបាលរងនៃគណៈអភិបាលរាជធានីភ្នំពេញ លោក កើត ឆែ លើកឡើងក្នុងអំឡុងសន្និសីទដដែលថា ពលរដ្ឋនៅរាជធានីភ្នំពេញ ប្រមាណ១លាន៦សែននាក់ ឬស្មើនឹងជិត១០០ភាគរយនៃចំនួនពលរដ្ឋដែលគ្រប់អាយុចាក់វ៉ាក់សាំងចាប់ពី១៨ឆ្នាំឡើង បានចាក់វ៉ាក់សាំងការពារជំងឺនេះរួចហើយ។
លោកថា បច្ចុប្បន្ន មានពលរដ្ឋមួយចំនួនមិនបានគោរពនិងអនុវត្តវិធានការរក្សាគម្លាតសុវត្ថិភាព ជាពិសេសនៅពេលពួកគេចូលញ៉ាំអាហារជុំគ្នានៅតាមទីកន្លែងឬតាមភោជនីយដ្ឋានផ្សេងៗ ដែលជាកត្តាហានិភ័យមួយខ្ពស់ចំពោះការចម្លងជំងឺផ្លូវដង្ហើមថ្មីនេះ។
បើតាមមន្រ្តីរដ្ឋបាលរាជធានីរូបនេះ ជាមធ្យមមានអ្នកជំងឺកូវីដ-១៩ថ្មី ត្រូវបានរាយការណ៍ក្នុង១ថ្ងៃពីជាង១០០នាក់ ទៅ៣០០នាក់ ហើយភាគច្រើនកើតមាននៅតំបន់មានមនុស្សរស់នៅជួបជុំគ្នាច្រើន ជាមួយអត្រាស្លាប់មានជាង១ភាគរយ ដែលភាគច្រើនជាពលរដ្ឋមានវ័យចំណាស់។
លោក កើត ឆែ មានប្រសាសន៍ថា៖ «រដ្ឋាភិបាលមិនមែនហាមឃាត់អត់ឱ្យមានការជួបជុំទេ ប៉ុន្តែជួបជុំរក្សាគម្លាត ៣កុំ ៣ការពារ! អ៊ីចឹងសព្វថ្ងៃ ៣កុំ៣ការពារ ហ្នឹង គាត់ធ្វើអត់បាន! បើសិនជាគាត់ធ្វើបាន ៣កុំ៣ការពារ យើងគិតថា មិនមែនព្រឹត្តិការណ៍ [សហគមន៍២០កុម្ភៈ] មិនមែនបិទបញ្ចប់ វាមិនឈានដល់បន្ទាត់ក្រហមអ៊ីចឹងទេៗ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា អាជ្ញាធរមិនគួរបន្ទោសបញ្ហារីករាលដាលនៃជំងឺកូវីដ-១៩ ទៅលើប្រជាពលរដ្ឋទេ។ លោកមើលឃើញថា មូលហេតុដែលនាំឱ្យ «ព្រឹត្តិការណ៍២០កុម្ភៈ» បន្តអូសបន្លាយនិងរីកសាយភាយគ្រប់ទីកន្លែងក្នុងរាជធានីភ្នំពេញ រហូតដល់តាមបណ្តាខេត្តផ្សេងៗ គឺដោយសារវិធានការរបស់រដ្ឋាភិបាលនិងប្រសិទ្ធភាពនៃការអនុវត្តរបស់អាជ្ញាធរនៅមានកម្រិត។
មន្រ្តីសង្គមស៊ីវិលរូបនេះបន្ថែមថា ការសម្រេចដកបម្រាមផ្សព្វផ្សាយពាណិជ្ជកម្ម ការបើកឱ្យលក់ដូរគ្រឿងស្រវឹង និងអនុញ្ញាតឱ្យអាហារដ្ឋានផ្សេងៗអាចទទួលភ្ញៀវចូលឡើងវិញ ដោយមិនមានការរឹតបន្តឹងគម្លាតសុវត្ថិភាព គឺជាកំហុសដ៏ធំមួយរបស់អាជ្ញាធរដែលនាំឱ្យការឆ្លងរាលដាលកើនឡើង។
លោកមានប្រសាសន៍បន្តថា៖ «ប្រសិនជាអាជ្ញាធរនៅតែបណ្តែតបណ្តោយឱ្យមានការប្រើប្រាស់គ្រឿងស្រវឹង ឱ្យមានការលក់គ្រឿងស្រវឹងតទៅទៀត ស្ថានការអត់ងាយអាចទប់ទល់បានទេ។ រឿងដែលល្អបំផុត គឺត្រូវតែ ប្រសិនបើយើងចង់ឱ្យវិស័យផ្សេងៗអាចបើកដំណើរការបាន លុះត្រាតែយើងបិទការផឹកស៊ី បិទការលក់ដូរគ្រឿងស្រវឹង ការផ្សាយពាណិជ្ជកម្មគ្រឿងស្រវឹងអីហ្នឹងមួយរយៈសិន»។
កាលពីថ្ងៃទី២១ ខែឧសភា ឆ្នាំ២០២១ រដ្ឋាបាលរាជធានីភ្នំពេញបានសម្រេចបិទបញ្ចប់បម្រាមលក់គ្រឿងស្រវឹងគ្រប់ប្រភេទ និងអនុញ្ញាតឱ្យគ្រប់ភោជនីយដ្ឋានទាំងអស់អាចបើកដំណើរការឡើងវិញនិងទទួលភ្ញៀវឱ្យចូលអង្គុយញ៉ាំអាហារក្នុងបរិវេណអាហារដ្ឋានបាន ប៉ុន្តែត្រូវគោរពវិធានការ «៣កុំ៣ការពារ» បន្ទាប់ពីប្រកាសផ្អាកចាប់ពីថ្ងៃទី១០ ខែមេសា។
តាមរបាយការណ៍របស់ក្រសួងសុខាភិបាល ករណីឆ្លងជំងឺកូវីដ-១៩នៅទូទាំងប្រទេសបានកើនឡើងប្រមាណ២ដង គិតក្នុងរយៈពេល២សប្តាហ៍ចុងក្រោយ បៀបធៀបនឹងរយៈពេល២សប្តាហ៍មុនពេលដកបម្រាមលក់គ្រឿងស្រវឹងនិងការអនុញ្ញាតឱ្យភោជនីយដ្ឋាននានាបើកទទួលភ្ញៀវធម្មតាឡើងវិញ ជាមួយតួលេខកើនជាមធ្យមប្រមាណពី៤៥០ករណីដល់ជាង៩០០ករណីក្នុងមួយថ្ងៃ៕
