មន្ត្រីជំនាញបានចុះប្រមូលគ្រាប់បែកដៃជាង៤០០គ្រាប់ ក្រោយពីបុគ្គលិកក្រុមហ៊ុនខ្សែកាបមួយបានជីកដីប្រទះឃើញគ្រាប់យុទ្ធភណ្ឌទាំងនោះនៅក្បែររបងវិទ្យាល័យ១០មករា ក្នុងសង្កាត់ស្វាយដង្គំ ក្រុងសៀមរាប ខេត្តសៀមរាប។
កាលពីថ្ងៃទី១០ ខែកក្កដា ថ្មីៗនេះ បុគ្គលិកក្រុមហ៊ុនខ្សែកាបមួយបានជីកដីនៅក្បែររបងវិទ្យាល័យ១០មករា ដើម្បីកប់ខ្សែកាប ក៏បានប្រទះឃើញគ្រាប់បែកដៃមិនទាន់ផ្ទុះចំនួន៣២៥គ្រាប់ ហើយពួកគេក៏បានផ្តល់ដំណឹងទៅខាងសមត្ថកិច្ចនិងកម្លាំងស៊ីម៉ាក់។
ប្រធានកងឯកភាពកម្ចាត់មីនទី៤ ប្រចាំខេត្តសៀមរាប និងខេត្តកំពង់ធំ លោក អ៊ាន សុធា មានប្រសាសន៍នៅថ្ងៃអង្គារនេះថា ក្នុងប្រតិបត្តិការចុះពិនិត្យនិងប្រមូលគ្រាប់បែកមិនទាន់ផ្ទុះនេះ ក្រុមមន្ត្រីជំនាញបានរកឃើញគ្រាប់បែកដៃសរុបជាង៤២០គ្រាប់ ក្នុងនោះ ៣២៥គ្រាប់ បានរកឃើញកាលពីថ្ងៃទី១០ ខែកក្កដា និងជាង៨០គ្រាប់ទៀត រកឃើញថ្ងៃទី១២ ខែកក្កដា ម្សិលមិញ។
លោកបន្តថា គ្រាប់បែកដៃទាំងនោះត្រូវបានប្រមូលយកទៅរក្សាទុកនៅសារមន្ទីរសន្តិភាពសកម្មភាពកម្ចាត់មីន ដើម្បីត្រៀមកម្ទេចចោលនៅពេលខាងមុខ។
ចំណែកប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) លោក ហេង រតនា បានសរសេរនៅលើទំព័រហ្វេសប៊ុករបស់លោកថា គ្រាប់បែកដៃទាំងជាង៤០០គ្រាប់នោះ ជាប្រភេទគ្រាប់បែកដៃ No36 UK ផលិតនៅប្រទេសអង់គ្លេស ដែលជាសំណល់ពីសង្រ្គាម។ លោកបន្តថា គ្រាប់បែកដៃប្រភេទ No36 UK នេះ ផលិតនិងប្រើប្រាស់តាំងពីឆ្នាំ១៩១៥មកម៉្លេះ។
លោកបន្ថែមថា គិតមកដល់ថ្ងៃនេះ បេសកកម្មជីករាវរកគ្រាប់បែកដៃនៅក្បែររបងវិទ្យាល័យ១០មករានោះ បានបញ្ចប់ដោយជោគជ័យនិងប្រកបដោយសុវត្ថិភាព ហើយគ្រាប់បែកទាំងនោះត្រូវបានយកទៅរក្សាទុក ដើម្បីត្រៀមកម្ទេចនៅពេលខាងមុខ៕