មន្ត្រីជាន់ខ្ពស់ក្រសួងអប់រំ យុវជន និងកីឡា ឱ្យដឹងថា ក្រសួងមួយនេះនៅពុំទាន់អនុញ្ញាតឱ្យគ្រឹះស្ថានអប់រំទាំងអស់បើកដំណើរការឡើងវិញដូចការផ្សព្វផ្សាយនៅក្នុងបណ្តាញសង្គមនោះទេ។
មានការផ្សព្វផ្សាយតាមបណ្តាញសង្គម នៅថ្ងៃទី១៣ ខែកក្កដា ឆ្នាំ២០២១ ថាក្រសួងអប់រំ យុវជន និងកីឡា នឹងសម្រេចបើកសាលាឱ្យសិស្សចូលរៀនវិញនៅថ្ងៃទី១៩ ខែកក្កដានេះ ហើយបានឱ្យសិស្សត្រៀមខ្លួនចូលរៀនសារជាថ្មីផងដែរ។
តែយ៉ាងណា អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានច្រានចោលព័ត៌មាននេះភ្លាមៗ ដោយថា ជាព័ត៌មានមិនពិត។
ក្រសួងអប់រំ យុវជន និងកីឡា បានផ្អាកដំណើរការសាលារដ្ឋនិងឯកជននៅទូទាំងប្រទេសកាលពីអំឡុងខែមីនា ឆ្នាំ២០២១ ដោយសារស្ថានភាពជំងឺកូវីដ-១៩ បានផ្ទុះខ្លាំងនៅក្នុងសហគមន៍៕