មន្ត្រីជាន់ខ្ពស់ក្រសួងមហាផ្ទៃ បានឱ្យដឹងថា អ្នកជាប់ឃុំនិងមន្ត្រីពន្ធនាគារខេត្តសៀមរាបដែលឆ្លងជំងឺកូវីដ-១៩បានកើនដល់ជាង៣០នាក់ហើយ ក្រោយពីក្រុមគ្រូពេទ្យធ្វើតេស្តលើមនុស្សចំនួនជិត៣០០នាក់កាលពីថ្ងៃម្សិលមិញ។
អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា មានប្រសាសន៍នៅថ្ងៃពុធនេះថា ក្រុមគ្រូពេទ្យនៅមន្ទីរសុខាភិបាលបានចុះទៅយកសំណាកនិងធ្វើតេស្តលើមន្ត្រីពន្ធនាគារនិងអ្នកជាប់ឃុំសរុបជិត៣០០នាក់ កាលពីថ្ងៃទី១៣ ខែកក្កដា ម្សិលមិញ ដោយបានរកឃើញអ្នកឆ្លងជំងឺកូវីដ-១៩ ចំនួន៣២នាក់ ក្នុងនោះមានប្រធានពន្ធនាគារខេត្តសៀមរាប លោក ភាន ឆវ័ន្ត និងមន្ត្រីឆ្មាំពន្ធនាគារចំនួន៥នាក់ រួមទាំងអ្នកជាប់ឃុំចំនួន២៦នាក់ផងដែរ។
អ្នកនាំពាក្យរូបនេះបញ្ជាក់ថា ដើមចមដែលនាំឱ្យមានការឆ្លងរាលដាលនៃជំងឺកូវីដ-១៩ចូលទៅក្នុងពន្ធនាគារ ដោយសារឆ្លងពីប្រធានពន្ធនាគារខេត្ត និងមន្ត្រីប្រចាំការនៅទីនោះ។
លោកមានប្រសាសន៍ថា៖ «ដំបូងផ្ទុះចេញពីមន្ត្រីយើង ដែលមានទាំងប្រធានពន្ធនាគារ។ យើងរកឃើញថា គាត់បានឆ្លងមេរោគកូវីដ ហើយមន្ត្រីអប់រំកែប្រែក៏មានឆ្លង មន្ត្រីសន្តិសុខម្នាក់ ពេលហ្នឹងយើងធ្វើសំណាកភ្លាមៗតែម្តង»។
លោក នុត សវនា បញ្ជាក់ថា អ្នកដែលឆ្លងជំងឺកូវីដ-១៩ គឺមានសុខភាពធម្មតា មិនធ្ងន់ធ្ងរនោះទេ ហើយក្រុមគ្រូពេទ្យបានទុកឱ្យពួកគេសម្រាកព្យាបាលនៅក្នុងពន្ធនាគារតែម្តង ខណៈអ្នកជាប់ឃុំជិត២ ០០០នាក់ផ្សេងទៀតដែលមិនពាក់ព័ន្ធ ក្រុមគ្រូពេទ្យមិនបានធ្វើតេស្តនោះទេ។
ជំងឺកូវីដ-១៩ បានឆ្លងទៅដល់អ្នកជាប់ឃុំមុនគេនៅពន្ធនាគារខេត្តព្រះសីហនុ កាលពីអំឡុងដើមខែឧសភា ឆ្នាំ២០២១។ បន្ទាប់មក ត្រូវបានរកឃើញឆ្លងចូលពន្ធនាគារខេត្តកណ្តាល ពន្ធនាគារព្រៃស ឬម១ និងម២ នៅរាជធានីភ្នំពេញ ពន្ធនាគារខេត្តកំពង់ស្ពឺ និងពន្ធនាគារខេត្តបន្ទាយមានជ័យ ស្វាយរៀង និងប៉ៃលិន។ ករណីឆ្លងរាលដាលជំងឺកូវីដ-១៩ ក្នុងពន្ធនាគារនេះ ក៏មានស្ត្រីម្នាក់អាយុ៦៦ឆ្នាំដែលជាអ្នកជាប់ឃុំនៅពន្ធនាគារខេត្តកំពង់ស្ពឺបានស្លាប់ដោយសារជំងឺផ្លូវដង្ហើមមួយនេះផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៦៣ ៦១៥នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន៥៥ ៣៦៥នាក់ អ្នកស្លាប់សរុប៩៨៦នាក់ និងករណីនាំចូលពីក្រៅប្រទេសសរុប៥ ៣៤៧នាក់៕