រាជរដ្ឋាភិបាលសម្រេចផ្អាកជាបណ្ដោះអាសន្នចំពោះការធ្វើដំណើរចេញចូលឆ្លងកាត់ព្រំដែនកម្ពុជា-វៀតណាម ដើម្បីទប់ស្កាត់ការឆ្លងរាលដាលជំងឺកូវីដ-១៩។
ក្នុងលិខិតរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១៣ ខែកក្កដា ឆ្នាំ២០២១ ផ្ញើទៅឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម បានលើកឡើងថា ការផ្អាកជាបណ្ដោះអាសន្នសម្រាប់ការធ្វើដំណើរចេញចូលឆ្លងកាត់ព្រំដែនកម្ពុជា-វៀតណាមនេះ ធ្វើឡើងចំពោះកម្មករជំនាញ អ្នកបច្ចេកទេស និងបុគ្គលិកក្រុមហ៊ុននានារបស់វៀតណាម។ ប៉ុន្តែការផ្អាកនេះក៏មានការលើកលែងចំពោះអ្នកជំងឺដែលត្រូវទៅព្យាបាលជំងឺនៅប្រទេសវៀតណាម អ្នកការទូត មន្ត្រីរាជការ ដែលមានបេសកកម្ម តបការអញ្ជើញរបស់អាជ្ញាធរនៃប្រទេសទាំងពីរ ដូចជា និស្សិត សិក្ខាកាម ដែលបានបញ្ចប់វគ្គសិក្សា ឬករណីមានការអនុញ្ញាតពិសេសពីរាជរដ្ឋាភិបាល។
លិខិតដដែលបន្តថា ការផ្អាកនេះមានរយៈពេល១ខែ និងអនុវត្តចាប់ពីថ្ងៃទី១៨ ខែកក្កដា ឆ្នាំ២០២១នេះទៅ។
ក្រសួងការបរទេសកម្ពុជា បញ្ជាក់ទៀតថា ចំពោះបុគ្គលិកនិងកម្មករជំនាញរបស់ក្រុមហ៊ុនវៀតណាមដែលបានចូលមកកម្ពុជារួចហើយ ទាំងអ្នកដែលបានធ្វើចត្តាឡីស័ករួច និងអ្នកជាប់ធ្វើចត្តាឡីស័ក គឺមិនអនុញ្ញាតឱ្យត្រឡប់ទៅប្រទេសវៀតណាមវិញឡើយ ក្នុងអំឡុងពេលផ្អាកការចេញចូលបណ្តោះអាសន្ននេះ។
ក្រសួងការបរទេស ក៏បានប្រាប់ទៅឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម ឱ្យសហការជាមួយវៀតណាម ដើម្បីឱ្យអាជ្ញាធរនៃប្រទេសទាំងពីរជួយសម្របសម្រួលលើការដឹកជញ្ជូនការនាំចេញនិងការនាំចូលទំនិញនានា ដោយអនុវត្តយ៉ាងម៉ឺងម៉ាត់តាមវិធានការក្រសួងសុខាភិបាលរបស់ប្រទេសទាំងពីរផងដែរ។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា លោក កុយ គួង មានប្រសាសន៍នៅថ្ងៃពុធនេះថា ការផ្អាកបណ្ដោះអាសន្នចំពោះការធ្វើដំណើរឆ្លងកាត់ព្រំដែនកម្ពុជា-វៀតណាម គឺដើម្បីទប់ស្កាត់ការឆ្លងរាលដាលជំងឺកូវីដ-១៩ មិនប៉ះពាល់ដល់ទំនាក់ទំងប្រទេសទាំងពីរនោះទេ។
លោកបន្ថែមថា៖ «លិខិតដែលបណ្តាញសារព័ត៌មានបានទទួលនិងផ្សព្វផ្សាយមានខ្លឹមសារនិងហេតុផលច្បាស់លាស់ហើយ។ លិខិតគឺដើម្បីទប់ស្កាត់ការរាលដាលជំងឺកូវីដ មិនប៉ះពាល់ដល់ទំនាក់ទំនងប្រទេសទាំងពីរទេ ហើយមានប្រសិទ្ធភាពយ៉ាងណានោះទេ សូមចាំមើលសិនទៅ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សាទរចំពោះវិធានការផ្អាកការឆ្លងកាត់ព្រំដែនកម្ពុជា-វៀតណាម ដើម្បីទប់ស្កាត់ការឆ្លងរាលដាលជំងឺកូវីដ-១៩នេះ ប៉ុន្តែលោកហាក់មិនមានជំនឿថា អាជ្ញាធរអាចទប់ស្កាត់ការលួចឆ្លងដែនខុសច្បាប់ក្នុងអំឡុងពេលនេះឱ្យមានប្រសិទ្ធភាពនោះឡើយ។
លោកបន្ថែមថា៖ «នៅក្នុងរឿងនេះ ខ្ញុំក៏អំពាវនាវដល់អាជ្ញាធរនិងរដ្ឋាភិបាលផងដែរ បើថាបិទ គឺធ្វើយ៉ាងម៉េចឱ្យការបិទនោះមានប្រសិទ្ធភាព បានយើងអាចបង្ការការឆ្លងទៅឆ្លងមកនៃវីរុសហ្នឹងបាន។ បើមិនអ៊ីចឹងទេ នឹងធ្វើឱ្យមានបញ្ហាចោទប្រកាន់គ្នាទៅវិញទៅមក ឬក៏វិធានការបង្ការរបស់រដ្ឋាភិបាលហ្នឹងមិនមានប្រសិទ្ធភាពទេ»។
អភិបាលរង និងជាអ្នកនាំពាក្យរដ្ឋបាលខេត្តស្វាយរៀង លោក រស់ សុផារិទ្ធ មានប្រសាសន៍ថា អាជ្ញាធរខេត្តនឹងអនុវត្តវិធានការនេះឱ្យបានតឹងរ៉ឹងនិងមានប្រសិទ្ធភាព មិនថានៅតាមច្រកទ្វារអន្តរជាតិនិងច្រករបៀងនោះទេ។
អ្នកនាំពាក្យរូបនេះអះអាងថា កន្លងមក រដ្ឋបាលខេត្តបានធ្វើកិច្ចការងារនេះរហូតមកហើយ ក្រោយពីរដ្ឋមន្ត្រីក្រសួងមហាផ្ទៃ លោក ស ខេង ប្រាប់ឱ្យពង្រឹងការទប់ស្កាត់ការលួចឆ្លងដែនខុសច្បាប់ ដើម្បីទប់ស្កាត់ការឆ្លងរាលដាលជំងឺកូវីដ-១៩។
លោកបន្ថែមថា៖ «សម្រាប់នៅច្រករបៀង យើងបានគ្រប់គ្រងមិនឱ្យមានការឆ្លងដែនដោយខុសច្បាប់ទេ ទៅតាមការណែនាំរបស់ប្រមុខរដ្ឋាភិបាល ក៏ដូចជាក្រសួងមហាផ្ទៃ ដែលមិនឱ្យមានការឆ្លងដែនខុសច្បាប់ច្រករបៀងនេះ។ ហើយយើងតែងតែពង្រឹងកិច្ចការងារនេះ ដើម្បីត្រួតពិនិត្យកុំឱ្យមានការឆ្លងដែនខុសច្បាប់។ ហើយទៅថ្ងៃខាងមុខ យើងកាន់តែរឹងបន្តឹងថែមទៀត»។
កាលពីថ្ងៃទី១២ ខែកក្កដានេះ ក្រសួងកសិកម្ម រុក្ខាប្រមាញ់ និងនេសាទ ក៏បានប្រាប់ទៅម្ចាស់ឬតំណាងក្រុមហ៊ុនវៀតណាមដែលទទួលបានដីសម្បទានសេដ្ឋកិច្ចនៅកម្ពុជា ត្រូវផ្អាកឱ្យបុគ្គលិកនិងកម្មករជនជាតិវៀតណាមចេញចូលកម្ពុជា ជាបណ្តោះអាសន្ន ក្នុងកាលៈទេសៈនៃការរីករាលដាលជំងឺកូវីដ-១៩នេះដែរ។
យោងតាមទីភ្នាក់ងារសារព័ត៌មាន Reuters រដ្ឋាភិបាលវៀតណាម កាលពីថ្ងៃទី១២ ខែកក្កដា ថ្មីៗនេះ បានដាក់ចេញវិធានការរឹតបន្តឹងការធ្វើដំណើរនៅក្នុងទីក្រុងមួយចំនួនក្នុងប្រទេស ដើម្បីប្រយុទ្ធប្រឆាំងនឹងការឆ្លងរីករាលដាលនៃជំងឺកូវីដ-១៩ ខណៈតួលេខឆ្លងប្រចាំថ្ងៃបានកើនឡើងដល់កម្រិតខ្ពស់ជិត២ ០០០ករណីក្នុងមួយថ្ងៃ៕