ក្រសួងមហាផ្ទៃ ក្រើនរំឭកមន្ត្រីឱ្យសិក្សាឡើងវិញនូវភាពខ្វះចន្លោះនៃបទប្បញ្ញត្តិនានាដែលមានស្រាប់ ដើម្បីចូលរួមទប់ស្កាត់បទល្មើសកេងប្រវ័ញ្ចផ្លូវភេទកុមារតាមប្រព័ន្ធអនឡាញឱ្យមានប្រសិទ្ធភាព។
ការក្រើនរំឭកនេះធ្វើឡើងនៅក្នុងពិធីប្រកាសដាក់ឱ្យប្រើប្រាស់ជាផ្លូវការនូវផែនការសកម្មភាព ដើម្បីបង្ការទប់ស្កាត់ និងឆ្លើយតបការកេងប្រវ័ញ្ចផ្លូវភេទកុមារតាមប្រព័ន្ធអនឡាញឆ្នាំ២០២១-២០២៥ តាមប្រព័ន្ធវីដេអូ នៅថ្ងៃពុធនេះ។
រដ្ឋមន្ត្រីក្រសួងមហាផ្ទៃ លោក ស ខេង បានថ្លែងក្នុងពិធីនោះថា ការកេងប្រវ័ញ្ចផ្លូវភេទកុមារបច្ចុប្បន្នជាបញ្ហាសកល ក្នុងនោះមានទាំងកម្ពុជាផងដែរ ដែលករណីនេះកំពុងបង្កឱ្យមានការព្រួយបារម្ភពីហានិភ័យដល់កុមារ។
លោកបន្តថា នៅឆ្នាំ២០២០ របាយការណ៍មជ្ឈមណ្ឌលជាតិសម្រាប់កុមារបាត់ខ្លួននិងត្រូវបានកេងប្រវ័ញ្ចរបស់សហរដ្ឋអាមេរិក បានបង្ហាញពីចំនួនកើនឡើងនៃការកេងប្រវ័ញ្ចផ្លូវភេទកុមារតាមអនឡាញដែលមានដល់ទៅជាង២១,៧លានករណី ក្នុងនោះ ជនល្មើសភាគច្រើនជាមនុស្សដែលកុមារមិនស្គាល់មុខ។
លោកបន្តទៀតថា របាយការណ៍របស់សហគមន៍បណ្តាញរាយការណ៍បន្ទាន់អន្តរជាតិ ឆ្នាំ២០២០ ក៏បានបង្ហាញថា ៧៦ភាគរយនៃកុមាររងគ្រោះពីរូបភាពរំលោភបំពានផ្លូវភេទ មានអាយុចន្លោះពី៣ទៅ១៣ឆ្នាំ និង ១ភាគរយជាកុមារមានអាយុចន្លោះពី០ទៅ២ឆ្នាំ ក្នុងនោះ ៩៣ភាគរយជាក្មេងស្រី។
លោក ស ខេង គូសបញ្ជាក់ទៀតថា សម្រាប់នៅកម្ពុជា មិនទាន់មានទិន្នន័យផ្លូវការជាក់លាក់បញ្ជាក់ពីទំហំនៃការកេងប្រវ័ញ្ចផ្លូវភេទកុមារតាមអនឡាញនៅឡើយទេ។ ប៉ុន្តែលោកថា បើតាមការរាយការណ៍ពីសាធារណជនមកកាន់សមត្ថកិច្ច និងបណ្តាញរាយការណ៍តាមអ៊ីនធឺណិត (Internet Hotline) គឺជាមធ្យមមានជាង១៥០ករណីក្នុង១ឆ្នាំ ដែលជាករណីសង្ស័យទាក់ទងនឹងការលួងលោមកុមារតាមអនឡាញ ការផលិត និងចែកចាយរូបភាព-សម្ភារអាសអាភាសកុមារ និងគំរាមខាងផ្លូវភេទ ជាដើម។
មួយវិញទៀត លោកថា យោងតាមការសិក្សាស្រាវជ្រាវស្តីពី «ការវិភាគស្ថានភាពដំបូងនៃការកេងប្រវ័ញ្ចផ្លូវភេទកុមារតាមអនឡាញនៅកម្ពុជាឆ្នាំ២០២០» របស់ក្រុមប្រឹក្សាជាតិកម្ពុជាដើម្បីកុមារ បង្ហាញថា ៦០ភាគរយនៃកុមារកម្ពុជាដែលបានចូលរួមក្នុងដំណើរការអង្កេត ត្រូវបានរាយការណ៍ថា ធ្លាប់បានជួបប្រទះហានិភ័យនៃការកេងប្រវ័ញ្ចផ្លូវភេទតាមអនឡាញ នៅពេលពួកគេប្រើប្រាស់អ៊ិនធឺណិត។
ករណីនេះ លោក ស ខេង រំឭកថា ដើម្បីចូលរួមទប់ស្កាត់បទល្មើសនេះ ក្នុងបរិបទនៃការរីកចម្រើនផ្នែកបច្ចេកវិទ្យានិងការវាយលុកពីជំងឺកូវីដ-១៩ មន្ត្រីពាក់ព័ន្ធត្រូវសិក្សាឡើងវិញនូវភាពខ្វះចន្លោះបទប្បញ្ញត្តិដែលមានជាធរមាន លើបទល្មើសឧក្រិដ្ឋកម្មផ្នែកបច្ចេកវិទ្យាលើកុមារ លើកកម្ពស់វិធានការបបង្ការ ទប់ស្កាត់ និងស្តារនីតិសម្បទាជនរងគ្រោះ និងលើកកម្ពស់យុត្តិធម៌ព្រហ្មទណ្ឌ ជាដើម ប្រកបដោយឆន្ទៈខ្ពស់និងការទទួលខុសត្រូវ។
លោកថា៖ «សូមអនុវត្តដោយឈរលើគោលការណ៍ ដោយផ្អែកលើមូលដ្ឋានគ្រឹះនៃសិទ្ធិមនុស្សនិងសិទ្ធិកុមារដែលកម្ពុជាបានផ្តល់សច្ចាប័ន និងមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា»។
ប្រធានសមាគមការពារសិទ្ធិមនុស្សអាដហុក លោក នី សុខា គាំទ្រនឹងវិធានការនេះ ប៉ុន្តែជំរុញទៅរដ្ឋាភិបាលត្រូវពង្រឹងការអនុវត្តច្បាប់ឱ្យមានតម្លាភាពរវាងអ្នកមាននិងអ្នកក្រី ទើបទទួលបានផលវិជ្ជមានខ្ពស់។
លោកមានប្រសាសន៍ថា៖ «ដើម្បីឱ្យមានយុត្តិធម៌ទាំងអស់គ្នានៅក្នុងសង្គម គឺថា ត្រូវអនុវត្តច្បាប់ឱ្យបានស្មើភាពគ្នា មិនថាអ្នកនោះមាន ឬអ្នកហ្នឹងក្រ អ្នកមានអំណាចទេ ត្រូវតែអនុវត្តច្បាប់ដូចគ្នា។ បើសិនជាអ្នកនោះមានកំហុស ត្រូវទទួលទោស ទទួលទណ្ឌកម្ម ឬក៏វិន័យដូចគ្នាដែរ»។
ចំណែកប្រធានស្តីទីអង្គការយូនីសេហ្វប្រចាំកម្ពុជា លោក ចាឡា អាប់ដែលវ៉ាអាប់ ថ្លែងថា ការកេងប្រវ័ញ្ចផ្លូវភេទលើកុមារ តាមប្រព័ន្ធអនឡាញ ជាទិសដៅថ្មីមួយនៃការរំលោភបំពានដែលសម្របសម្រួលដោយអ៊ីនធឺណិត តាមរយៈការប្រើប្រាស់គេហទំព័រ បណ្ដាញទំនាក់ទំនងសង្គម និងកម្មវិធីទូរសព្ទឆ្លាតវៃ។
លោកបន្តថា ការបិទសាលាដោយសារការរាតត្បាតជាសកលនៃជំងឺកូវីដ-១៩ជុំវិញពិភពលោក រួមទាំងកម្ពុជា បានធ្វើឱ្យកុមារកាន់តែប្រឈមនឹងការកេងប្រវ័ញ្ចនិងការរំលោភបំពាន ប្រសិនបើគ្មានការគាំទ្រពីឪពុកម្ដាយ ព្រោះកុមារកាន់តែច្រើនប្រើប្រាស់វេទិកាអនឡាញ ដើម្បីរៀនសូត្រនិងធ្វើទំនាក់ទំនងសង្គម៕
