ពលរដ្ឋនៅក្រុងសៀមរាប និងសង្គមស៊ីវិលមួយចំនួន សោកស្តាយចំពោះការបាត់បង់ដើមឈើកម្រៗនៅក្នុងតំបន់រមណីយដ្ឋានអង្គរ ដោយសារតែជនល្មើសបានលួចកាប់ជាបន្តបន្ទាប់។
ការលើកឡើងនេះបានធ្វើឡើងក្រោយពីដើមឈើមួយដើមនៅរមណីដ្ឋានអង្គរ ស្ថិតនៅភូមិធ្លង់ ឃុំលាងដៃ ស្រុកអង្គរធំ ខេត្តសៀមរាប ត្រូវបានជនល្មើសលួចកាប់កាលពីថ្ងៃទី១២ ខែកក្កដា ឆ្នាំ២០២១។ មន្ត្រីអាជ្ញាធរជាតិអប្សរា ឱ្យដឹងថា ដើមឈើដែលត្រូវជនល្មើសលួចកាប់នេះ ជាដើមឈើទាលមានអាយុកាលច្រើនឆ្នាំមកហើយ។
អ្នកលក់ភេសជ្ជៈនៅក្បែរតំបន់ប្រាសាទអង្គរវត្ត នៅភូមិក្រវ៉ាន់ សង្កាត់អង្គរធំ ក្រុងសៀមរាប លោកស្រី អឿន មុំ នៅថ្ងៃទី១៣ ខែកក្កដានេះ បានបង្ហាញការសោកស្តាយ ក្រោយទទួលបានព័ត៌មានពីការបាត់បង់ដើមឈើនៅតំបន់រមណីយដ្ឋានអង្គរបន្ថែមទៀតនេះ។ ករណីនេះ អ្នកស្រីបានជំរុញឱ្យអាជ្ញាធរពាក់ព័ន្ធពង្រឹងវិធានការទប់ស្កាត់និងបង្កើនការយកចិត្តទុកដាក់បន្ថែមទៀត។
អ្នកស្រីថា៖ «នៅក្នុងចិត្តយើងសោកស្ដាយដែរ ប៉ុន្តែមិនដឹងធ្វើម៉េច! បើគេកាត់ទៅហើយ គ្រាន់តែថា អ្នកដែលធ្វើហ្នឹងអត់មានគិតថាជួយថែរក្សាអីទេ។ បើមានហើយ ជួយរក្សាទុកទៅ ព្រោះកន្លែងនេះ វាមិនទៅប៉ះពាល់អីដល់លំនៅដ្ឋានយើងណា! […] ព្រៃឈើអង្គរ យើងថែរក្សាទៅ ដូនតាយើងបានបន្សល់ទុកឱ្យ»។
ស្រដៀងគ្នានេះ ពលរដ្ឋម្នាក់ទៀតជាអ្នកលាងម៉ូតូនៅភូមិក្រវ៉ាន់ សង្កាត់អង្គរធំ ជាប់នឹងរមណីយដ្ឋានអង្គរដែរនោះ លោក សន់ គឹមសុង ក៏បានបង្ហាញការសោកស្តាយផងដែរដែលជនល្មើសនៅតែបន្តលួចកាប់ឈើដោយខុសច្បាប់នៅតំបន់អង្គរ។ លោកថា ដើមឈើទាំងនោះជាកេរមរតកពីដូនតា ដែលប្រជាពលរដ្ឋទាំងអស់គ្នាត្រូវចូលរួមអភិរក្សទាំងអស់គ្នា។
បុរសវ័យ៣៤ឆ្នាំរូបនេះចោទជាសំណួរថា កន្លងមក លោកសង្កេតឃើញមន្ត្រីឧទ្យានអង្គរតែងតែចុះល្បាតព្រៃឈើនៅតំបន់នោះជាហូរហែមក ប៉ុន្តែមិនដឹងថាមូលហេតុអ្វីបានជានៅមានជនល្មើសអាចលួចកាប់បាន។
លោកថា៖ «ត្រង់ហ្នឹងខ្ញុំដូចឆ្ងល់ដែរ! ខាងអភិរក្សព្រៃ ខាងអប្សរាអីមានអស់ហើយ ហេតុអ្វីចោរលួចបានទៀត? ខ្ញុំឆ្ងល់ដែរហ្នឹង មិនដឹងម៉េចដែរដល់អ៊ីចឹងទៅ។ ការពារហើយ នៅតែលួចបានទៀត»។
ចំណែកសកម្មជនបរិស្ថាននៃសមាគមបណ្ដាញយុវជនកម្ពុជា (CYN) លោក សាន់ ម៉ាឡា មានប្រសាសន៍ថា ការបាត់បង់ព្រៃឈើប្រភេទកម្រនៅតំបន់រមណីយដ្ឋានអង្គរ បានបញ្ជាក់ពីភាពខ្វះចន្លោះនៃការទប់ស្កាត់បទល្មើសពីសំណាក់អាជ្ញាធរនិងអ្នកពាក់ព័ន្ធ។
ករណីនេះ លោកថា បើសិនជាអាជ្ញាធរនៅតែបន្តព្រងើយកន្តើយ មិនរកឱ្យឃើញជនប្រព្រឹត្តទេ នោះព្រៃឈើនិងធនធានធម្មជាតិដទៃទៀតនឹងបន្តបាត់បង់កាន់តែខ្លាំង។
លោក សាន់ ម៉ាឡា បានគូសបញ្ជាក់ថា៖ «ខ្ញុំគិតថា បើស្ថានភាពបែបនេះនៅតែបន្ត វានឹងបង្កជាផលប៉ះពាល់ខ្លាំងចំពោះធនធានធម្មជាតិនៅក្នុងប្រទេសកម្ពុជា ជាពិសេសធ្វើឱ្យប្រជាពលរដ្ឋលែងមានក្ដីសង្ឃឹមឬការជឿជាក់ចំពោះការគ្រប់គ្រងធនធានធម្មជាតិរបស់អាជ្ញាធរ»។
ទោះជាយ៉ាងណា អ្នកនាំពាក្យអាជ្ញាធរជាតិអប្សរា លោក ឡុង កុសល មានប្រសាសន៍ថា អាជ្ញាធរបានយកចិត្តទុកដាក់ខ្ពស់ក្នុងការថែរក្សានិងអភិរក្សព្រៃឈើនិងធនធានធម្មជាតិក្នុងតំបន់រមណីយដ្ឋានអង្គរនេះ ប៉ុន្តែនៅមានជនខិលខូចមួយចំនួនតូចនៅបន្តឆ្លៀតឱកាសលួចកាប់នៅពេលយប់។
លោកបន្តថា ពាក់ព័ន្ធនឹងករណីបាត់បង់ដើមឈើទាលមួយដើមនេះ អាជ្ញាធរកំពុងស្រាវជ្រាវដើម្បីតាមចាប់ជនល្មើសយកមកផ្តន្ទាទោសទៅតាមច្បាប់។
ជាមួយគ្នានេះដែរ អ្នកនាំពាក្យរូបនេះក៏បានអំពាវនាវដល់ប្រជាពលរដ្ឋនិងអ្នកពាក់ព័ន្ធចូលរួមអភិរក្សនិងការពារព្រៃឈើទាំងអស់គ្នា នោះទើបអាចទប់ស្កាត់បទល្មើសឱ្យមានប្រសិទ្ធភាព។
លោកថា៖ «វាពិតណាស់ តំបន់របស់យើងហ្នឹងគឺថា វាធំទំហំដល់ទៅ៤០១ម៉ែតក្រឡា។ អាហ្នឹងចាំបាច់ណាស់ក្នុងការទាមទារការសហការគ្រប់រូបភាពពីគ្រប់អង្គភាព គ្រប់ផ្នែកពាក់ព័ន្ធ មិនតែយើងអាជ្ញាធរជាតិអប្សរាជាតិនោះទេ»។
កាលពីថ្ងៃទី៣១ ខែមីនា ឆ្នាំ២០២១ ក៏មានករណីជនល្មើសបានលួចកាប់ដើមឈើគ្រញូងមួយដើមនៅក្នុងតំបន់ការពារទី១ នៃរមណីយដ្ឋានអង្គរផងដែរ។
បើតាមរបាយការណ៍ពីមន្ត្រីបរិស្ថានខេត្តសៀមរាប ឱ្យដឹងកាលពីពេលថ្មីៗនេះថា គិតចាប់ពីឆ្នាំ២០២០ រហូតដល់ដើមឆ្នាំ២០២១នេះ បទល្មើសលួចកាប់ដើមគ្រញូងក្នុងតំបន់អង្គរមានប្រមាណជាង១០ករណី ក្នុងនោះក៏មានករណីមួយចំនួន ត្រូវបានមន្រ្តីបរិស្ថានបានរឹបអូសវត្ថុតាងនិងកសាងសំណុំរឿងទៅតុលាការផងដែរ។ ក្រៅពីការលួចកាប់ឈើប្រណិត ក៏មានករណីពលរដ្ឋខ្លះបានកាប់ទន្រ្ទានព្រៃធ្វើចម្ការខុសច្បាប់ ដោយករណីនេះ អាជ្ញាធរគ្រាន់តែធ្វើកិច្ចសន្យានិងផាកពិន័យតែប៉ុណ្ណោះ៕