រដ្ឋាភិបាលគ្រោងចាក់វ៉ាក់សាំងការពារកូវីដ-១៩ ដល់កុមារចាប់ពីអាយុ១២ឆ្នាំ ដល់១៧ឆ្នាំ ដើម្បីទប់ស្កាត់ការឆ្លងរាលដាលជំងឺកូវីដ-១៩ បង្កើតភាពស៊ាំក្នុងសង្គម និងជាការគិតគូរមួយសម្រាប់ការបើកសាលារៀនឡើងវិញ។
លោកនាយករដ្ឋមន្ត្រី ហ៊ុន សែន បានថ្លែងសារពិសេសនៅថ្ងៃសុក្រនេះថា រដ្ឋាភិបាលបានរៀបចំផែនការសម្រាប់ចាក់វ៉ាក់សាំងដល់កុមារនិងយុវជនដែលក្រោមអាយុ១៨ឆ្នាំ បន្ទាប់ពីដំណើរការចាក់វ៉ាក់សាំងសម្រាប់អ្នកដែលមានអាយុចាប់ពី១៨ឆ្នាំឡើងទៅ បានប្រមាណ៥លាន៤សែននាក់រួចហើយ។ លោកបន្តថា ការចាក់វ៉ាក់សាំងជូនកុមារអាយុចាប់ពី១២ឆ្នាំ ទៅ១៧ឆ្នាំនេះ ជាចំណុចពិសេសក្នុងការបើកដំណើរការសង្គមឡើងវិញ ជាពិសេសការបើកដំណើរការសាលារៀនឡើងវិញ ដែលយ៉ាងហោចណាស់ចាប់ពីថ្នាក់អនុវិទ្យាល័យឡើងទៅ។
លោកបានបញ្ជាក់ពីមូលហេតុថា៖ «ដោយមានការគិតគូរយ៉ាងម៉ត់ចត់ទៅលើបរិយាកាសភាពស៊ាំក្នុងសង្គម និងគិតគូរទៅដល់អនាគតរបស់កុមារនិងយុវជន ជាពិសេសផ្តោតការយកចិត្តទុកដាក់ទៅលើសុខុមាលភាព ពាក់ព័ន្ធការបើកឡើងវិញនូវសាលារៀនដែលជាការបាត់បង់ដ៏ធំធេងរបស់ពិភពលោក ក៏ដូចជាកម្ពុជា ក្នុងការបណ្តុះបណ្តាលធនធានមនុស្ស ដែលសាលាត្រូវបានបិទក្នុងរយៈពេលយូរ។ ដូច្នេះ ពិតប្រាកដណាស់ យើងមានតម្រូវការចាក់វ៉ាក់សាំងសម្រាប់កុមារនិងយុវវ័យចាប់ពីអាយុ១២ឆ្នាំ ដល់១៧ឆ្នាំ»។
លោកនាយករដ្ឋមន្ត្រី ហ៊ុន សែន បន្តទៀតថា តាមរយៈការពិភាក្សាជាមួយមន្ត្រីពាក់ព័ន្ធ រដ្ឋាភិបាលត្រូវការវ៉ាក់សាំងចំនួន៤លានដូស ឬជាង៤លានដូស ដើម្បីចាក់ជូនកុមារនិងយុវវ័យដែលមានអាយុចាប់ពី១២ឆ្នាំ ទៅ១៧ឆ្នាំ ចំនួនប្រមាណ១លាន៩សែននាក់។
តែយ៉ាងណា លោកមិនទាន់បញ្ជាក់ថាតើរដ្ឋាភិបាលគ្រោងនឹងចាក់វ៉ាក់សាំងជូនកុមារអាយុក្រោម១៨ឆ្នាំនៅពេលណានោះទេ។
ប៉ុន្តែលោកថា រដ្ឋាភិបាលកំពុងពិចារណាលើជម្រើសចំនួន២ ទី១ គឺចាក់វ៉ាក់សាំងជូនមនុស្សពេញវ័យចាប់ពីអាយុ១៨ឆ្នាំឡើងទៅ ក្នុងចំនួន១០លាននាក់ឱ្យរួចរាល់សិន ទើបចាប់ផ្តើមអនុវត្តការចាក់វ៉ាក់សាំងសម្រាប់កុមារ និងទី២ អាចធ្វើដំណាលគ្នានឹងការចាក់វ៉ាក់សាំងលើមនុស្សពេញវ័យដែលនៅសល់ជាង៤លាននាក់នេះ ដោយចាប់ផ្តើមពីរាជធានីភ្នំពេញ ខេត្តកណ្តាល និងខេត្តព្រះសីហនុ រួចបន្តទៅបណ្តាខេត្តផ្សេងៗទៀតដូចដែលបានធ្វើនាពេលកន្លងមក។
ស្របពេលគ្នានេះដែរ លោកក៏បានអំពាវនាវដល់ប្រជាពលរដ្ឋដែលជាមាតាបិតានិងអាណាព្យាបាលត្រៀមខ្លួនដើម្បីនាំកូនៗរបស់ខ្លួន ទៅចាក់វ៉ាក់សាំង នៅពេលយុទ្ធនាការចាក់វ៉ាក់សាំងដល់កុមារនិងយុវវ័យមកដល់ ដើម្បីការពារការវាយប្រហារពីជំងឺកូវីដ-១៩៕
អត្ថបទទាក់ទង
សិស្សនិស្សិតខ្លះប្រឈមបោះបង់ចោលការសិក្សា ខណៈជំងឺកូវីដ-១៩នៅតែបន្តអូសបន្លាយ
