មេធាវីការពារក្តីឱ្យអតីតប្រធានគណបក្សប្រឆាំង លោក សម រង្ស៊ី និងមន្ត្រីបក្សនេះមួយចំនួន គឺលោក ជូង ជូងី ជំរុញឱ្យក្រសួងមហាផ្ទៃពន្លឿននីតិវិធីផ្តល់សិទ្ធិធ្វើនយោបាយឱ្យលោកឡើងវិញ ខណៈលោកបានដាក់លិខិតស្នើសុំជាង២០ថ្ងៃមកហើយ តែក្រសួងមិនបានផ្តល់ចម្លើយ។
លោក ជូង ជូងី ឱ្យដឹងនៅថ្ងៃសុក្រនេះថា លោកបានដាក់លិខិតស្នើសុំនីតិសម្បទាធ្វើនយោបាយឡើងវិញទៅក្រសួងមហាផ្ទៃ កាលពីថ្ងៃទី២៤ ខែមិថុនា ឆ្នាំ២០២១ ប៉ុន្តែគិតត្រឹមថ្ងៃសុក្រនេះ ក្រសួងនៅមិនទាន់ឆ្លើយតបនៅឡើយ។ ករណីនេះ លោកជំរុញឱ្យក្រសួងពន្លឿននីតិវិធីនេះ ដើម្បីឱ្យរូបលោកអាចបំពេញការងារជាមេធាវី និងចូលរួមក្នុងជីវភាពនយោបាយដោយគ្មានការគំរាមកំហែង។
លោកថា៖ «យើងដឹងហើយតាំងពីឆ្នាំ២០១៨ម៉េស ខ្ញុំបញ្ចេញយោបល់ឬបង្ហាញអត្ថន័យច្បាប់ថា ការដែលមិនទៅបោះឆ្នោតមិនមានទោស ចង់មានការចោទប្រកាន់ថា ខ្ញុំហ្នឹងធ្វើសកម្មភាពនយោបាយ! អ៊ីចឹងដើម្បីឱ្យខ្ញុំហ្នឹងស្រួលក្នុងការការពារសកម្មជននយោបាយ ការពារសកម្មជនបរិស្ថាន ការពារសកម្មជនសិទ្ធិមនុស្សអីឱ្យស្រួល កុំឱ្យមានការចោទប្រកាន់ថា ខ្ញុំធ្វើសកម្មភាពនយោបាយ ខ្ញុំសុំសិទ្ធិធ្វើនយោបាយតែម្តងទៅ»។
តាមលិខិតរបស់លោក ជូង ជូងី ផ្ញើទៅក្រសួងមហាផ្ទៃ បានលើកឡើងថា លោកជាអតីតសមាជិកគណៈកម្មាធិការនាយកគណបក្សសង្គ្រោះជាតិ ស្ថិតក្នុងបញ្ជីឈ្មោះថ្នាក់ដឹកនាំគណបក្សសង្គ្រោះជាតិ ដែលត្រូវបានតុលាការកំពូលសម្រេចហាមឃាត់មិនឱ្យធ្វើសកម្មភាពនយោបាយ៥ឆ្នាំ។
លិខិតនោះបញ្ជាក់ថា ការស្នើសុំនីតិសម្បទាធ្វើនយោបាយឡើងវិញនេះ យោងតាមព្រះរាជក្រមចុះថ្ងៃទី២ ខែមករា ឆ្នាំ២០១៩ ប្រកាសឱ្យប្រើច្បាប់ស្តីពីវិសោធនកម្ម មាត្រា៤៥ (ស្ទួន) នៃច្បាប់ស្តីពីគណបក្សនយោបាយ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា លោក ជូង ជូងី មិនទាន់មានលក្ខណៈសម្បត្តិគ្រប់គ្រាន់ក្នុងការផ្តល់នីតិសម្បទាឱ្យធ្វើនយោបាយឡើងវិញទេ ដោយសារគាត់ជាប់បណ្តឹងមួយនៅតុលាការដែលប្តឹងដោយគណៈកម្មាធិការជាតិរៀបចំការបោះឆ្នោត (គ.ជ.ប) ពីបទ «ញុះញង់មិនឱ្យពលរដ្ឋទៅបោះឆ្នោតអំឡុងឆ្នាំ២០១៨»។
លោកថា៖ «សំណុំរឿងហ្នឹងកំពុងស្ថិតនៅដំណើរការក្នុងនីតិវិធីរបស់តុលាការ។ ដូច្នេះ ខ្លួនគាត់ [ជូង ជូងី] មិនទាន់ស្អាតស្អំទទួលបានងារ ទទួលបាននីតិសម្បទាធ្វើនយោបាយឡើងវិញទេ»។
យ៉ាងណា សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា យល់ថា ការបដិសេធផ្តល់នីតិសម្បទានយោបាយឡើងវិញដល់លោក ជូង ជូងី ពីសំណាក់ក្រសួងមហាផ្ទៃនេះ អាចមកពីលោក ជូង ជូងី មិនមែនជាតួអង្គដែលផ្តល់ផលចំណេញផ្នែកនយោបាយដល់គណបក្សកាន់អំណាច។
លោកបន្តថា៖ «ទី២ គាត់[ជូង ជូងី] គេហៅថា ធ្លាប់ការពារសកម្មជនបក្សប្រឆាំងទាំងអស់ ទាំងអ្នកនយោបាយ អ៊ីចឹងទៅវាជានិមិត្តរូបមួយហើយដែលប្រឆាំងនឹងបក្សកាន់អំណាច។ អ៊ីចឹង ទស្សនៈហ្នឹងហើយធ្វើឱ្យគាត់មិនសូវទទួលការស្វាគមន៍ឱ្យបានដិតដល់ទេ»។
លោក ជូង ជូងី ត្រូវបានហាមធ្វើសកម្មភាពនយោបាយជាមួយអតីតមន្ត្រីបក្សប្រឆាំងចំនួន១១៨រូបផ្សេងទៀតរយៈពេល៥ឆ្នាំ ចាប់ពីថ្ងៃដែលតុលាការកំពូលចេញសាលដីការំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧។ ប៉ុន្តែមួយរយៈចុងក្រោយនេះ អ្នកជាប់បម្រាមជាង២០នាក់បានដាក់លិខិតសុំសិទ្ធិធ្វើនយោបាយឡើងវិញ និងខ្លះទៀតបានបង្កើតគណបក្សថ្មីសម្រាប់ត្រៀមប្រកួតប្រជែងការបោះឆ្នោតនាពេលខាងមុខ៕