ក្រសួងកសិកម្ម ហាមប្រើប្រាស់សារធាតុគ្រោះថ្នាក់មួយចំនួនដែលប៉ះពាល់ដល់សុខភាពនិងផលិតកម្មសត្វ ក្រោយពីក្រសួងរកឃើញថា សារធាតុគ្រោះថ្នាក់ទាំងនោះកំពុងចរាចរនៅតាមទីផ្សារ និងប្រើប្រាស់ដោយខុសច្បាប់នៅតាមកសិដ្ឋានចិញ្ចឹមសត្វ។
ក្នុងសេចក្តីណែនាំរបស់ក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី១៥ ខែកក្កដា ឆ្នាំ២០២១ ឱ្យដឹងថា ថ្មីៗនេះ សមត្ថកិច្ចជំនាញ នៃអគ្គនាយកដ្ឋានសុខភាពសត្វ និងផលិតកម្មសត្វ បានចុះធ្វើអធិការកិច្ចនៅតាមទីតាំងកសិដ្ឋានចិញ្ចឹមសត្វ រោងចក្រឬកន្លែងផលិតចំណីសត្វ ក្រុមហ៊ុនពាណិជ្ជកម្ម និងដេប៉ូលក់ចំណីសត្វនៅតាមបណ្តារាជធានី-ខេត្ត។
ក្រសួងបន្តថា ការចុះធ្វើអធិការកិច្ចនោះ មន្ត្រីជំនាញបានរកឃើញថា មានទីតាំងអាជីវកម្មមួយចំនួនបានធ្វើទាំងបំពានច្បាប់ ដោយបានប្រើប្រាស់សារធាតុហាមឃាត់ សារធាតុគ្រោះថ្នាក់ សារធាតុជំរុញឱ្យសត្វលូតលាស់ខុសប្រក្រតី និងប្រើប្រាស់អង់ទីប៊ីយូទិកលើសការកំណត់ ដែលអាចបង្កគ្រោះថ្នាក់ដល់សុខភាពនិងអាយុជីវិតមនុស្សសត្វ។
ក្រសួងបញ្ជាក់ថា សារធាតុ អង់ទីប៊ីយូទិក ដែលហាមឃាត់នោះមានដូចជា Chloramphenicol, Clenbuterol, Fluoroquinolones, Glycopeptides, Vancomycin, Nitromidazoles, Dimetridaszole, Ipronidazole, Meteronidazole, និងអង់ទីប៊ីយូទិកហាមឃាត់ដទៃទៀតដែលមានចែងក្នុង Codex Alimentarius សម្រាប់ចំណីសត្វ។
ករណីនេះ ក្រសួងកសិកម្ម បានណែនាំដល់កសិដ្ឋានចិញ្ចឹមសត្វ អ្នកចិញ្ចឹមសត្វ រោងចក្រ ឬកន្លែងផលិតចំណីសត្វ ក្រុមហ៊ុនពាណិជ្ជកម្ម និងដេប៉ូលក់ចំណីសត្វ រួមទាំងអ្នកពាក់ព័ន្ធផ្សេងទៀត ឈប់ប្រើប្រាស់សារធាតុទាំងនេះ ដើម្បីកុំឱ្យមានគ្រោះថ្នាក់ដល់ជីវិតសត្វនិងមនុស្ស។
ក្រសួងបានស្នើដល់ម្ចាស់កសិដ្ឋានត្រូវប្រើប្រាស់សារធាតុគីមីនិងថ្នាំសម្លាប់មេរោគដែលត្រូវបានអនុញ្ញាតដោយច្បាប់ ខណៈដែលចំណីសត្វ វត្ថុធាតុដើម សារធាតុបន្ថែមផ្សំចំណីសត្វ និងបសុឱសថ ត្រូវចុះបញ្ជីមុនធ្វើពាណិជ្ជកម្មនៅក្នុងប្រទេសកម្ពុជា រួមទាំងអនុវត្តនូវវិធានការផ្សេងៗទៀត។ ក្រសួងក៏បានព្រមានចាត់វិធានការច្បាប់ចំពោះអ្នកពាក់ព័ន្ធណាដែលមិនគោរពតាមសេចក្តីណែនាំនេះផងដែរ។
វីអូឌី មិនអាចសុំការបញ្ជាក់បន្ថែមពីប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម លោក តាន់ ផាន់ណារ៉ា បានទេ នៅថ្ងៃសុក្រនេះ។
ប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ បានសាទរចំពោះសេចក្តីណែនាំរបស់ក្រសួងកសិកម្មនេះ។ លោកថា សារធាតុដែលក្រសួងហាមប្រើប្រាស់ ជាសារធាតុគីមីដែលធ្វើឱ្យប៉ះពាល់ដល់សុខភាពអ្នកប្រើប្រាស់។
លោក ស្រ៊ុន ពៅ បន្តថា ប្រសិនបើគ្រប់ភាគីពាក់ព័ន្ធអនុវត្តបាននូវសេចក្តីណែនាំរបស់ក្រសួងនេះ វាជាគុណតម្លៃរបស់អ្នកផលិតឬចិញ្ចឹមសត្វ និងមិនប៉ះពាល់ទៅដល់សុខភាពប្រជាពលរដ្ឋថែមទៀត។
ប្រធានសមាគមរូបនេះ អះអាងថា រូបលោកក៏បានណែនាំបន្តទៅដល់សមាជិករួចហើយពីផលប៉ះពាល់ និងមិនឱ្យប្រើសារធាតុគ្រោះថ្នាក់ទាំងនោះទៅតាមសេចក្តីណែនាំរបស់ក្រសួងកសិកម្មផងដែរ។
លោកបន្ថែមថា៖ «សារធាតុហាមឃាត់នេះជាសារធាតុគីមី ប្រសិនណាជាយើងចៀសវាងបាន វាជាការល្អសម្រាប់កសិដ្ឋានឬក្រុមហ៊ុនចិញ្ចឹមសត្វ និងប្រជាពលរដ្ឋនៅក្នុងប្រទេសរបស់យើង។ សេចក្តីណែនាំនេះបានធ្លាក់មកដល់សមាគមហើយ ហើយខ្ញុំក៏ប្រជុំមួយចំនួនហើយដែរ ដើម្បីណែនាំដល់កសិដ្ឋានឬក្រុមហ៊ុនចិញ្ចឹមសត្វ គឺសុំចៀសវាងការប្រើប្រាស់អ្វីដែលរដ្ឋហាមឃាត់នេះ។ បើយើងនៅតែធ្វើ គេនឹងចុះចាត់វិធានការតាមហ្នឹងហើយ»។
