ប្រធានអង្គការព័ន្ធកិច្ចអប់រំកុមារកម្ពុជាម្នាក់ ស្ថិតនៅក្រុងសៀមរាប ខេត្តសៀមរាប បានស្លាប់ដោយសារបញ្ហាសួតធ្ងន់ធ្ងរ បើទោះបីជាលោកបានទទួលការព្យាបាលជំងឺកូវីដ-១៩ ជាសះស្បើយហើយក្តី។
យោងតាមលិខិតរបស់មន្ទីរពេទ្យបង្អែកខេត្តសៀមរាប ចេញកាលពីថ្ងៃទី៣០ ខែមិថុនា ឆ្នាំ២០២១ បានបញ្ជាក់ថា ប្រធានអង្គការព័ន្ធកិច្ចអប់រំកុមារកម្ពុជា លោក យន់ សំបូរ អាយុ ៤២ឆ្នាំ រស់នៅស្ថិតភូមិស្រង៉ែ ឃុំស្រង៉ែ ក្រុងសៀមរាប បានជាសះស្បើយពីជំងឺកូវីដ-១៩ ហើយ ប៉ុន្តែលោកត្រូវបន្តធ្វើចត្តាឡីស័ករយៈពេល ១៤ថ្ងៃ នៅផ្ទះបន្ថែមទៀត។ ប៉ុន្តែកំឡុងពេលធ្វើចត្តាឡីស័កនោះ លោកក៏មានបញ្ហាសុខភាពធ្ងន់ធ្ងរ ដោយមានអាការៈស្លេកស្លាំងនិងក្អកនោះ ភរិយារបស់លោក ក៏បានបញ្ជូនលោកទៅកាន់មន្ទីរពេទ្យវិញ។
លិខិតដដែលបន្តថា ក្រោយពីសម្រាកនៅមន្ទីរពេទ្យបានរយៈពេល ១៣ថ្ងៃនោះ ពោលគឺនៅថ្ងៃទី១៣ ខែកក្កដា ឆ្នាំ២០២១ លោកបានទទួលមរណភាពដោយក្រុមគ្រូពេទ្យអះអាងថា មានបញ្ហាសួតធ្ងន់ធ្ងរ។
លោក យន់ សំបូរ ត្រូវបានរកឃើញមានវិជ្ជមានកូវីដ-១៩ កាលពីថ្ងៃទី១៨ ខែមិថុនា ឆ្នាំ២០២១។ បន្ទាប់ពីទទួលបានការព្យាបាល គ្រូពេទ្យអះអាងថា លោកបានជាសះស្បើយពីជំងឺនេះហើយ និងបានអនុញ្ញាតឱ្យចេញពីមន្ទីរពេទ្យបង្អែក នៅថ្ងៃទី៣០ ខែមិថុនា ក្រោយពីធ្វើតេស្តអវិជ្ជមាន។
អ្នកស្រី វ៉ាត សុផាត ដែលត្រូវជាភរិយា លោក យន់ សំបូរ បានបង្ហាញការមិនអស់ចិត្តនៅពេលដែលគ្រូពេទ្យអះអាងថា ស្វាមីរបស់គាត់ជាពីជំងឺកូវីដ-១៩ ប៉ុន្តែបែរជានៅបន្តព្យាបាលម្ដងទៀត។ អ្នកស្រីថ្លែងថា ក្រុមគ្រូពេទ្យបានយកស្វាមីរបស់អ្នកស្រីទៅដាក់ព្យាបាលនៅកន្លែងសម្រាកអ្នកជំងឺកូវីដ-១៩ ដដែលវិញ។
អ្នកស្រីនិយាយថា៖ «ប្ដីខ្ញុំឆាតមកប្រាប់ខ្ញុំថា អត់ទាន់ស្រួលខ្លួនទេ ប៉ុន្តែពេទ្យឱ្យមកផ្ទះ ខ្ញុំក៏មានអារម្មណ៍អត់សប្បាយចិត្ត ខ្ញុំថា បងអត់និយាយជាមួយពេទ្យថា ខ្ញុំក្អក។ គាត់ថា គាត់បានប្រាប់ពេទ្យហើយ ប៉ុន្តែគេថា គាត់ជាកូវីដហើយឱ្យទៅផ្ទះ។ ខ្ញុំសួរប្ដីស្រួលខ្លួនអត់ ហើយគាត់ថា ចុកដៃ ចុកជើង អត់ស្រួលខ្លួនទេ ដល់អ៊ីចឹងខ្ញុំមិនដឹងម៉េច ហើយខ្ញុំប្រាប់ពេទ្យថាគេពេទ្យគេចេះដឹង ខ្ញុំខំប្រកែកជាមួយប្ដី ខ្ញុំឱ្យប្ដីមកផ្ទះ។ ដល់ស្អែកឡើងថ្ងៃទី១ ខែកក្កដា ស្ថានភាពប្តីខ្ញុំយ៉ាប់ ក៏នាំទៅពេទ្យវិញ»។
អ្នកស្រីបន្ថែមថា៖ «គាត់មកដល់ផ្ទះ គាត់យ៉ាប់ហ្មង គាត់ដើរអត់ចង់រួចទេ ពេលខ្ញុំយកទៅពេទ្យវិញគេមិនចង់ទទួលទេ ប៉ុន្តែបានគេដាក់ក្នុងក្រដាសថា បើមានបញ្ហាអីមកពេទ្យខេត្តវិញ ក្នុងពេលធ្វើចត្តាឡីស័ក១៤ ថ្ងៃហ្នឹង ពេលខ្ញុំទៅហើយ ម៉េចក៏យើងជាកូវីដហើយ គេយកយើងទៅដាក់នៅកន្លែងកូវីដវិញ ខ្ញុំឆ្ងល់អ៊ីចឹង»។
អ្នកស្រី វ៉ាត សុផាត យល់ថា ស្វាមីអ្នកស្រីស្លាប់អាចបណ្ដាលមកពីភាពខ្វះចន្លោះរបស់ក្រុមគ្រូពេទ្យ។ អ្នកស្រីស្នើទៅក្រុមគ្រូពេទ្យបង្កើនការយកចិត្តទុកដាក់ពិនិត្យលើអ្នកជំងឺបន្ថែមទៀត ដើម្បីកុំឱ្យមានករណីនេះ កើតឡើងទៅអ្នកដទៃទៀត។
អ្នកស្រីថា៖ «ខ្ញុំចង់ប្រាប់លោកគ្រូពេទ្យថា បើសិនជាគាត់ជាគ្រូពេទ្យហើយដាក់ទំនុកចិត្តខ្ពស់បន្តិចទៅ តែអ្នកឈឺត្រូវការរកគ្រូពេទ្យហើយ»។
ទាក់ទងករណីនេះ ប្រធានមន្ទីរពេទ្យបង្អែកខេត្តសៀមរាប លោកវេជ្ជបណ្ឌិត ប៉ែន ផល្គុន ប្រាប់វីអូឌីនៅថ្ងៃសុក្រនេះថា ការស្លាប់របស់ លោក យន់ សំបូរ គឺដោយសារលោកមានជំងឺសួតធ្ងន់ធ្ងរពីមុនមក។
ប៉ុន្តែនៅពេលសួរថា បើតាមភរិយាអ្នកជំងឺ អះអាងថា គ្រួសារគាត់មានសុខភាពមិនទាន់ធូរស្រាលនៅឡើយពីជំងឺកូវីដ-១៩ ដោយសារគាត់មានអាការៈចេះតែក្អកនៅឡើយ ហេតុអ្វីគ្រូពេទ្យអនុញ្ញាតឱ្យគាត់ចេញពីមន្ទីរពេទ្យបែបនេះ? លោកវេជ្ជបណ្ឌិត ប៉ែន ផល្គុន សុំមិនធ្វើអត្ថាធិប្បាយឡើយ។
លោកនិយាយថា៖ «គាត់តេស្តម្តងទៀតក៏អវិជ្ជមានដែរ គាត់ស្លាប់ ដោយសារជំងឺសួតផ្សេងទៀត គាត់មានជំងឺសួតពីមុនមកទេ ប៉ុណ្ណឹងចុះខ្ញុំជាប់បើកឡាន»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានជំរុញឱ្យក្រុមពេទ្យធ្វើការពិនិត្យ និងបង្កើនការយកចិត្តទុកបន្ថែមទៀត ចំពោះស្ថានភាពអ្នកជំងឺ បើទោះពីជាពួកគាត់បានជាសះស្បើយពីជំងឺកូវីដ-១៩ក៏ដោយ។ ប្រសិនបើសុខភាពអ្នកជំងឺនៅមិនទាន់ធូរស្រាលនោះទេ លោកថា គ្រូពេទ្យគួរអនុញ្ញាតឱ្យគាត់សម្រាកព្យាបាលបន្ត។
លោកថា៖ «ការព្យាបាលជំងឺកូវីដជារឿងមួយដោយឡែក ប៉ុន្តែនៅពេលគាត់មានអាការៈធ្ងន់ធ្ងរដោយសារ ការវាយលុកដោយជំងឺកូវីដ អាហ្នឹងគួរតែមើលជំងឺផ្សេងទៀត មុននឹងឱ្យគាត់ចាកចេញ ដើម្បីឱ្យគាត់ចេញធានាថា គាត់មានសុវត្ថិភាព អីចឹងការមើលជំងឺគាត់ផ្សងៗ អាចបញ្ជូនទៅពេទ្យធម្មតា ឬមានទីកន្លែងដាក់នៅដោយឡែក ដើម្បីព្យាបាលឱ្យគាត់។ គាត់ជាពីកូវីដ ប៉ុន្តែកូវីដហ្នឹងវាយលុកប៉ះពាល់សួតធ្ងន់ធ្ងរអ៊ីចឹងទៅ ហើយមិនទាន់ជាផង ទៅផ្ទះទៀត គឺអាចមានបញ្ហា»។
លោក យន់ សំបូរ គឺជាស្ថាបនិកមួយរូបនៃអង្គការព័ន្ឋកិច្ចអប់រំកុមារកម្ពុជា នៅខេត្តសៀមរាប ដែលបានបង្កើតឡើងកាលពីឆ្នាំ២០១១ រហូតមកដល់សព្វថ្ងៃ។ បច្ចុប្បន្នអង្គការនេះ បាននឹងកំពុងបណ្ដុះបណ្ដាលកុមារផ្នែកភាសាអង់គ្លេស ក្នុងនោះ កុមារ ១៥ភាគរយ ត្រូវអនុញ្ញាតឱ្យសិក្សាដោយគិតថ្លៃពីអង្គការនេះ ខណៈកុមារដែលមានគ្រួសារជីវភាពធូធារត្រូវបង់ថ្លៃ ៥ភាគរយក្នុងមួយខែ៕
