ក្រសួងសុខាភិបាល ប្រកាសរកឃើញអ្នកដំណើរចំនួន ៣៧ នាក់ ដែលបានត្រឡប់ពីប្រទេសថៃចូលមកកម្ពុជា វិជ្ជមានកូវីដ-១៩ បំប្លែងខ្លួនថ្មីប្រភេទ B.1.617.2 (Delta) ដែលមានប្រភពពីប្រទេសឥណ្ឌា។
ក្នុងសេចក្ដីប្រកាសព័ត៌មានរបស់ក្រសួងសុខាភិបាលចេញផ្សាយនៅថ្ងៃទី១៦ ខែកក្កដា ឆ្នាំ២០២១ ឱ្យដឹងថា អ្នកដំណើរចំនួន ៣៧ នាក់ ដែលរកឃើញវិជ្ជមានកូវីដ-១៩ បំប្លែងថ្មី B.1.617.2 (Delta) បានមកដល់កម្ពុជានៅថ្ងៃទី០៧ ដល់១៤ ខែកក្កដា ឆ្នាំ២០២១។ ក្រសួងបញ្ជាក់ថា អ្នកដំណើរទាំង ៣៧ នាក់ ក្នុងនោះ មានស្រ្តី ២២នាក់ ដែលពួកគេបានវិលត្រឡប់មកពីប្រទេសថៃវិញ តាមច្រកព្រំដែនកម្ពុជាចំនួន៣៤នាក់ និងអ្នកដំណើរបរទេសតាមយន្តហោះចំនួន៣នាក់។
បើតាមក្រសួងសុខាភិបាលឱ្យដឹងថា ចាប់តាំងពីថ្ងៃទី៣១ ខែមីនា ដល់ថ្ងៃទី១៤ ខែកក្កដា ឆ្នាំ២០២១ កម្ពុជារកឃើញអ្នកមានវិជ្ជមានកូវីដ-១៩ ប្រភេទដែលតា (Delta) ដែលមានប្រភពចេញពីប្រទេសឥណ្ឌា សរុប ៧៥នាក់ ក្នុងនោះ ស្រ្តី ៤០នាក់ ដែលជាករណីនាំចូលពីក្រៅប្រទេស។
ក្រោយពីរកឃើញមានអ្នកវិជ្ជមានកូវីដ-១៩ ប្រភេទដែលតា ជាបន្តបន្ទាប់កាលពីដើមខែកក្កដា ឆ្នាំ២០២១។ លោកនាយករដ្ឋមន្ត្រី ហ៊ុន សែន បានដាក់ចេញវិធានការថ្មីទៀត ដើម្បីទប់ស្កាត់រលកចម្លងជំងឺកូវីដ-១៩ បំប្លែងថ្មី (Delta) ដោយបង្ហាញការព្រួយបារម្ភថា មេរោគបំប្លែងថ្មីនេះអាចនឹងបង្កសោកនាដកម្មដល់កម្ពុជា បើមិនអាចទប់ស្កាត់បាន។
ការដាក់ចេញវិធានការថ្មីនេះ ធ្វើឡើងស្របពេលដែលរដ្ឋមន្រ្តីក្រសួងសុខាភិបាល លោក ម៉ម ប៊ុនហេង កាលពីថ្ងៃទី២៨ ខែមិថុនា ឆ្នាំ២០២១ បានចេញសេចក្តីជូនដំណឹងថា ជំងឺកូវីដ-១៩ ឈ្មោះ «ដែលតា (Delta)» ជាវីរុសបំប្លែងខ្លួនថ្មី មានភាពសាហាវជាងវីរុសបំប្លែងខ្លួនមុនៗចំនួនដល់ទៅ១៥ដង។ បច្ចុប្បន្ននេះ វីរុសកូវីដ-១៩ បំប្លែងថ្មីដែលតា បាននឹងកំពុងវាយលុកនិងបង្កសោកនាដកម្មនៅប្រទេសឥណ្ឌា និងបណ្ដាលប្រទេសផ្សេងៗទៀតនៅលើពិភពលោក។
ក្រសួងសុខាភិបាលបានជូនដំណឹងថា ខ្លួនបានរកឃើញជំងឺកូវីដ-១៩ បំប្លែងថ្មី (Delta) ២២ករណី គិតត្រឹមថ្ងៃទី២៩ ខែមិថុនា ឆ្នាំ២០២១ លើពលករវិលត្រឡប់ពីប្រទេសថៃ ស្របពេលមេរោគនេះ ធ្លាប់វាយលុកនិងបង្កសោកនាដកម្មនៅប្រទេសឥណ្ឌាម្តងរួចមកហើយ៕
