រដ្ឋាភិបាលសហរដ្ឋអាមេរិក សម្រេចបញ្ជូនវត្ថុបុរាណ «រូបចម្លាក់ព្រះស្កន្ទគង់លើក្ងោក» ដែលរឹបអូបពីការកាន់កាប់ខុសច្បាប់នៅទីក្រុងញូយ៉ក ប្រគល់មកកម្ពុជា ដែលជាប្រទេសម្ចាស់ដើមវិញ។
បើតាមសេចក្ដីជូនព័ត៌មានចេញដោយក្រសួងវប្បធម៌ និងវិចិត្រសិល្បៈ ក្នុងថ្ងៃទី១៦ ខែកក្កដានេះ ឱ្យដឹងថា វត្ថុបុរាណដ៏ល្អរបស់ខ្មែរមួយទៀតនេះ បានរឹបអូសយកមកវិញដោយការិយាល័យស៊ើបអង្កេតសន្តិសុខជាតិអាមេរិក សហការជាមួយការិយាល័យរដ្ឋអាជ្ញាប្រចាំសង្កាត់ខាងត្បូងទីក្រុងញូវយ៉ក ហើយនឹងត្រូវបញ្ជូមមកដល់កម្ពុជាវិញឆាប់ៗខាងមុន។ ប៉ុន្ដែមិនទាន់បញ្ជាក់ថ្ងៃមកដល់ច្បាស់លាស់នៅឡើយទេ។
ក្នុងសេចក្ដីជូនព័ត៌មានថា រូបចម្លាក់ «ព្រះស្កន្ទគង់លើក្ងោក» នេះត្រូវបានយកចេញពីប្រាសាទក្រចាប់ ជាប្រាសាទមួយក្នុងតំបន់រមណីយដ្ឋានប្រាសាទកោះកេរ ខេត្តព្រះវិហារ អតីតរាជធានីនៃអាណាចក្រខ្មែរនាសតវត្សទី១០ នៃគ.ស. ដែលធ្លាប់តំបន់អសន្តិសុខ និងជាគោលដៅនៃការលួចទ្រង់ទ្រាយធំអស់ជាច្រើនឆ្នាំ អំឡុងពេលសង្រា្គម។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងក្នុងសេចក្ដីជូនដំណឹងថា៖ «ការវិលត្រឡប់នៃរូបចម្លាក់នេះ បញ្ជាក់ពីការប្ដេជ្ញាចិត្តរបស់កម្ពុជា ក្នុងការស្វែងរក និងនាំយកមកវិញនូវព្រលឹងរបស់បុព្វបុរសយើង ដែលបានចាកចេញពីមាតុភូមិអស់រយៈជាច្រើនឆ្នាំកន្លងមក ក្នុងអំឡុងពេលសង្គ្រាម»។
លោកស្រីបន្ដថា៖ «យើងខ្ញុំរំភើបឥតឧបមា នៅពេលដែលអាចទទួលបានមកវិញនូវសម្បត្តិវប្បធម៌ដ៏មានតម្លៃជាច្រើន ដែលបាននាំចេញដោយខុសច្បាប់ពីប្រទេសកម្ពុជា ជាអាទិ៍ រូបចម្លាក់ព្រះឥសូរ និងព្រះស្កន្ទ ដែលនឹងបញ្ជូនមកកម្ពុជាឆាប់ៗខាងមុខនេះ។ ហើយជឿជាក់ថាបានយកចេញពីកន្លែងតែមួយជាមួយរូបចម្លាក់ព្រះស្កន្ទគង់លើក្ងោក នៃតួប៉មកណ្ដាលប្រាសាទក្រចាប់»។
ក្រសួងបញ្ជាក់ថា ការប្រគល់នេះ គឺអនុលោមតាមអនុស្សារណៈយោគយល់គ្នារវាងកម្ពុជា និងអាមេរិក។ តាមរយៈអនុស្សារណៈនេះ កន្លងមកអាមេរិក បានប្រគល់វត្ថុបុរាណមកកម្ពុជាវិញជាបន្តបន្ទាប់។
សូមបញ្ជាក់ថា កាលពីខែមិថុនា ២០២១ កន្លងទៅថ្មីៗ អាមេរិកក៏បានប្រកាសបញ្ជូនសម្បត្តិវប្បធម៌ខ្មែរ ដែលជារូបចម្លាក់បុរាណចំនួន ២៧រូប មកឱ្យកម្ពុជាវិញផងដែរ៕