អាជ្ញាធរខេត្តកំពង់ស្ពឺ បានឱ្យដឹងថា ក្រុមហ៊ុនឯកជនដែលផ្សព្វផ្សាយផលិតផលគ្រឿងស្រវឹង បានរុះរើផ្ទាំងប៉ាណូផ្សាយពាណិជ្ជកម្មស្រា ឬស្លាកយីហោដែលជ្រកក្រោមស្លាកស្រាបៀរចេញអស់ពីខេត្តមួយនេះ ធ្វើឱ្យខេត្តមានសោភ័ណភាព និងជួយកាត់បន្ថយការពិសារគ្រឿងស្រវឹងថែមទៀត។
អភិបាលខេត្តកំពង់ស្ពឺ លោក វ៉ី សំណាង ប្រាប់ វីអូឌី នៅថ្ងៃទី១៨ ខែកក្កដា ឆ្នាំ២០២១នេះថា ក្រោយពីលោកទុកពេលយ៉ាងយូរត្រឹមថ្ងៃទី១៥ ខែមិថុនា ឆ្នាំ២០២១ គឺក្រុមហ៊ុនឯកជនដែលផ្សព្វផ្សាយផលិតផលគ្រឿងស្រវឹង ត្រូវរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹង ឬស្លាកយីហោដែលជ្រកក្រោមស្លាកស្រាបៀរចេញឱ្យអស់ពីខេត្តដើម្បីរៀបចំសោភ័ណភាពខេត្តកំពង់ស្ពឺ ។ ប៉ុន្តែលោកថា មិនទាន់ដល់ថ្ងៃកំណត់ផង ស្រាប់តែក្រុមហ៊ុនឯកជនទាំងនោះ បានរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងចេញអស់ពីខេត្តតែម្តង។
លោកអះអាងដូចនេះថា៖ «ជាការល្អដែលក្រុមហ៊ុនឯកជនចូលរួមជាមួយអាជ្ញាធរក្នុងការរៀបចំសណ្តាប់ធ្នាប់ កាត់បន្ថយបាននូវការបំពុលនៅការផ្សព្វផ្សាយនូវគ្រឿងស្រវឹង ហើយកាត់បន្ថយការចង់សាក ចង់ផឹក ហើយវាសល់ពេលវេលារកស៊ី រកលុយទុកឱ្យប្រពន្ធកូន»។
មន្ត្រីឃ្លាំមើលសិទ្ធិមនុស្សលីកាដូប្រចាំខេត្តកំពង់ស្ពឺ លោក អ៊ុង សាមិត្ត គាំទ្រវិធានការរបស់រដ្ឋបាលខេត្តកំពង់ស្ពឺ ដែលធ្វើឱ្យក្រុមហ៊ុនឯកជនដែលមានផ្ទាំងប៉ាណូផ្សាយពាណិជ្ជកម្មគ្រឿងស្រវឹង ឬស្លាកពាណិជ្ជកម្មគ្រឿងស្រវឹងនៅតាមដងផ្លូវ រុះរើចេញអស់តាមការកំណត់របស់អាជ្ញាធរ។
លោកលើកទឹកចិត្តដល់អាជ្ញាធរខេត្តផ្សេងៗទៀត ត្រូវយកគំរូតាមខេត្តកំពង់ស្ពឺ ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ កាត់បន្ថយការជួបជុំ និងកាត់បន្ថយគ្រោះថ្នាក់ចរាចរណ៍ នៅពេលពិសារគ្រឿងស្រវឹងជាដើម។
លោកមានប្រសាសន៍ថា៖ «បើសិនជាខេត្តផ្សេងៗគាត់អាចធ្វើបែបហ្នឹងបានដែរ វានឹងកាត់បន្ថយគ្រោះថ្នាក់ផ្សេងៗ ដូចជា គ្រោះថ្នាក់ចរាចរណ៍ ដែលកើតចេញពីការពិសាគ្រឿងស្រវឹង ហើយកាត់បន្ថយការឆ្លងជំងឺកូវីដ-១៩ កាត់បន្ថយការជួបជុំ ហើយធ្វើឱ្យទីក្រុងមានសោភណ្ឌភាពល្អ»។
យុទ្ធនាការណែនាំឱ្យពលរដ្ឋនិងក្រុមហ៊ុនឯកជនរុះរើស្លាកពាណិជ្ជកម្មស្រា ឬយីហោដែលជ្រកក្រោមស្លាកស្រាបៀរនេះ ទើបតែមាននៅខេត្តកំពង់ស្ពឺមួយប៉ុណ្ណោះ ខណៈខេត្តផ្សេងទៀតនៅមិនទាន់អនុវត្តវិធានការនេះនៅឡើយទេ ស្របពេលក្រុមសង្គមស៊ីវិលមួយចំនួនចង់ឃើញវិធានការផ្អាកការផ្សព្វផ្សាយគ្រឿងស្រវឹងបែបនេះធ្វើឡើងនៅទូទាំងប្រទេសតែម្តង។
មជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព ធ្លាប់បានបង្ហាញពីលទ្ធផលនៃការស្ទង់មតិរបស់ខ្លួននៅអំឡុងឆ្នាំ២០១៧ ដោយរកឃើញថា មានមនុស្សប្រមាណ៩០ភាគរយបានឃើញការផ្សព្វផ្សាយពីផលិតផលគ្រឿងស្រវឹងនៅតាមមធ្យោបាយផ្សេងៗ ហើយក្នុងចំណោមអ្នកដែលបានឃើញការផ្សព្វផ្សាយនោះ ប្រមាណ៧០ភាគរយ ចង់សាកល្បងប្រើប្រាស់គ្រឿងស្រវឹងផងដែរ៕