គណបក្សកែទម្រង់កម្ពុជា នឹងដាក់ពាក្យសុំចុះបញ្ជីនៅក្រសួងមហាផ្ទៃនាចុងខែនេះ ក្រោយពីប្រមូលស្នាមមេដៃអ្នកគាំទ្របានគ្រប់ចំនួនតាមច្បាប់តម្រូវ ដើម្បីត្រៀមប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ-សង្កាត់នាពេលខាងមុខ។
លោក អ៊ូ ច័ន្ទរ័ត្ន ជាអតីតតំណាងរាស្ត្រគណបក្សសង្គ្រោះជាតិ និងជាស្ថាបនិកគណបក្សកែទម្រង់កម្ពុជា បាននិយាយនៅថ្ងៃនេះថា គណបក្សនឹងដាក់ពាក្យសុំចុះបញ្ជីនៅក្រសួងមហាផ្ទៃ នៅចុងខែកក្កដា ឆ្នាំ២០២១នេះ ដោយមានភ្ជាប់ស្នាមមេដៃអ្នកគាំទ្រចំនួន៤ ៥០០ បើទោះជាច្បាប់តម្រូវឱ្យតែ៤ ០០០ស្នាមមេដៃក៏ដោយ។
លោកថា៖ «យើងដាក់ឱ្យលើស ដោយសារករណីខ្លះថតមិនច្បាស់ ករណីខ្លះវាផ្តិតអត់ល្អអីជាដើម»។
ក្រសួងមហាផ្ទៃ បានអនុញ្ញាតឱ្យលោក អ៊ូ ច័ន្ទរ័ត្ន អតីតតំណាងរាស្រ្តគណបក្សសង្រ្គោះជាតិ បង្កើត«គណបក្សកែទម្រង់កម្ពុជា» កាលពីថ្ងៃទី១៦ ខែមីនា ឆ្នាំ២០២១។
បើតាមលោក អ៊ូ ច័ន្ទរ័ត្ន ថ្ងៃទី២៣ ខែតុលា ឆ្នាំ២០២១ គណបក្សនេះនឹងធ្វើសមាជដែលមានអតីតមន្ត្រីជាន់ខ្ពស់គណបក្សសង្គ្រោះជាតិ លោក ប៉ុល ហំម ឈរឈ្មោះជាបេក្ខជនប្រធានគណបក្សកែទម្រង់កម្ពុជា។
បើតាមច្បាប់ស្តីពីគណបក្សនយោបាយ ការបង្កើតគណបក្សនយោបាយតម្រូវឱ្យដាក់ពាក្យស្នើសុំពីក្រសួងមហាផ្ទៃ ដោយភ្ជាប់ទៅជាមួយនឹងស្នាមមេដៃអ្នកគាំទ្រចំនួន៨០។ ប៉ុន្តែបើគណបក្សនោះចង់ចូលរួមប្រកួតការបោះឆ្នោត គណបក្សត្រូវសុំចុះបញ្ជីឈ្មោះគណបក្សនយោបាយនៅក្រសួងមហាផ្ទៃ ដែលមានស្នាមមេដៃអ្នកគាំទ្រចំនួន៤ ០០០ រួមទាំងភ្ជាប់នឹងឯកសារមួយចំនួនទៀត៕
