បវរកញ្ញាចក្រវាលកម្ពុជាឆ្នាំ២០២០ ប្រកាសគាំទ្រយុទ្ធនាការ “កិច្ចគាំពារមាតុភាព” របស់អង្គការអុកស្វាម និងចូលរួមលើកកម្ពស់ការពង្រឹងសិទ្ធិអំណាចស្រ្តីនៅអំឡុងពេលជួបវិបត្តិកូវីដ-១៩ ខណៈស្ត្រីពុំមានសិទ្ធិក្នុងការទទួលបានកិច្ចគាំពារមាតុភាពនៅឡើយ។
ក្នុងសេចក្តីប្រកាសព័ត៌មានរបស់អគ្គការអុកស្វាម បានឱ្យដឹងនៅថ្ងៃចន្ទនេះថា កាលពីពាក់កណ្តាលខែមិថុនា បវរកញ្ញាចក្រវាលកម្ពុជាឆ្នាំ២០២០ កញ្ញា រ៉េត សារីតា បានមើលវីដេអូនិងតាមដានយុទ្ធនាការ “កិច្ចគាំពារមាតុភាព” លើទំព័រហ្វេសប៊ុករបស់អង្គការអុកស្វាម ហើយឃើញស្ត្រីខ្មែរជាច្រើនត្រូវប្រឈមនឹងការលំបាកក្នុងការរក្សាតុល្យភាពរវាងការងារនិងការថែទាំគ្រួសារ ខណៈពេលដែលពួកគេពុំមានសិទ្ធិក្នុងការទទួលបានកិច្ចគាំពារមាតុភាពនៅឡើយ។
ករណីនេះ កញ្ញា សារីតា បង្ហាញការចាប់អារម្មណ៍ និងយកជាតួនាទីរបស់ខ្លួន ដើម្បីគាំទ្រយុទ្ធនាការ “កិច្ចគាំពារមាតុភាព” របស់អង្គការអុកស្វាម តាមរយៈការប្រើប្រាស់វេទិកាប្រព័ន្ធផ្សព្វផ្សាយសង្គមដ៏ល្បីល្បាញរបស់ខ្លួន ដើម្បីចូលរួមលើកកម្ពស់ការពង្រឹងសិទ្ធិអំណាចស្រ្តីនៅកម្ពុជាផងដែរ។
កញ្ញា សារីតា និយាយក្នុងសេចក្តីប្រកាសព័ត៌មានថា៖ «ក្នុងនាមជាស្ត្រីកម្ពុជាមួយរូប នាងខ្ញុំមានការភ្ញាក់ផ្អើលនិងសោកស្តាយនៅពេលដឹងថា ប្រហែលជា៩០% នៃស្ត្រីជាកម្មករក្នុងប្រទេសកំណើតរបស់ខ្ញុំ មិនមានសិទ្ធិទទួលបានអត្ថប្រយោជន៍កិច្ចគាំពារមាតុភាព ពីព្រោះពួកគេបំពេញការងារក្នុងវិស័យក្រៅប្រព័ន្ធ»។
កញ្ញាក៏បានបន្ថែមទៀតថា៖ «ស្ត្រីកម្ពុជាសមទទួលបានភាពល្អប្រសើរជាងនេះ។ ស្រ្តីជាសសរទ្រូងនៃគ្រួសារនិងសង្គម ដូច្នេះ យើងគួរតែធានាថា ពួកគេទទួលបានការគាំទ្រពេញលេញមួយអំឡុងពេលពរពោះនិងសម្រាកមាតុភាព ជាពិសេស គឺក្នុងអំឡុងពេលមានវិបត្តិជំងឺកូវីដ-១៩តែម្តង ដែលម្តាយធ្វើការទាំងអស់ រួមទាំងអ្នកធ្វើការក្រៅប្រព័ន្ធក៏ដោយ ពិតជាសមនឹងទទួលបានការការពារពីច្បាប់ ហើយអាចទទួលបានប្រាក់ចំណូលគ្រប់គ្រាន់ក្នុងការថែរក្សាខ្លួននិងកូនៗរបស់ពួកគេ»។
កញ្ញា សារីតា ធ្លាប់ធ្វើការងារតស៊ូមតិជាយូរមកហើយអំពីបញ្ហាសិទ្ធិរបស់ស្ត្រី និងចេញមុខលើខ្សែភាពយន្តភាគដែលមានចំណងជើងថា Love9 របស់ ប៊ីប៊ីស៊ី មេឌា អេកស៊ិន ដ៏ល្បីល្បាញមួយ។ កាលណោះ កញ្ញាសម្តែងជាតួអង្គ ម៉ារីម៉ា ដែលមានអត្តចរិតចង់ដឹងចង់ឃើញ និងពោរពេញដោយទំនុកចិត្តនោះ។ កញ្ញា សារីតា បានប្រើប្រាស់បុគ្គលិកលក្ខណៈរបស់ខ្លួន ក្នុងការលើកកម្ពស់សមភាពយេនឌ័រ ព្រមទាំងសុខភាពផ្លូវភេទ និងការបន្តពូជ។
ក្រោយមក នៅក្នុងឆ្នាំ២០១៦ កញ្ញា សារីតា ទទួលបានពានរង្វាន់ “ជើងឯកយុវជន” ពីមូលនិធិប្រជាជនអង្គការសហប្រជាជាតិ ដែលជាទីភ្នាក់ងារឈានមុខគេរបស់អង្គការសហប្រជាជាតិ លើផ្នែកសិទ្ធិមាតានិងសិទ្ធិបន្តពូជទៀតផង។
ចំណែក នយិកាអង្គការអុកស្វាម លោកស្រី លឹម សូលីន ស្វាគមន៍ចំពោះការគាំទ្ររបស់បវរកញ្ញាចក្រវាលរូបនេះ ដែលចូលរួមក្នុងយុទ្ធនាការលើកកម្ពស់កិច្ចគាំពារមាតុភាពសម្រាប់ស្ត្រីនិងម្តាយនៅកម្ពុជាទាំងអស់ ដើម្បីធានាបាននូវសុខភាព សន្តិសុខ និងសេចក្តីថ្លៃថ្នូររបស់ស្ត្រី កូនៗ និងគ្រួសាររបស់ពួកគេ។
លោកស្រីមានប្រសាសន៍ថា៖ «យុទ្ធនាការនេះ គឺជាការងារមួយដ៏សំខាន់នៃកម្មវិធីកិច្ចគាំពារសង្គមក្នុងតំបន់របស់អង្គការអុកស្វាម ដើម្បីលើកកម្ពស់ការងារសមរម្យ សម្រាប់ការអភិវឌ្ឍប្រកបដោយចីរភាព សមភាព និងវឌ្ឍនភាព នៅទូទាំងតំបន់អាស៊ាន»។
នាយិកាអង្គការអុកស្វាម មានប្រសាសន៍បន្ថែមទៀតថា៖ «កិច្ចគាំពារមាតុភាព គឺកិច្ចគាំពារសង្គមដែលបណ្តាប្រទេសជាច្រើន ដូចជាប្រទេសកម្ពុជា ពុំអាចបន្តមើលរំលងតទៅទៀតបាននោះទេ។ ប្រសិនបើមានការផ្តល់នូវកិច្ចគាំពារមាតុភាព កម្មការិនីនឹងអាចមានឱកាសក្នុងការលើកកម្ពស់ខ្លួននិងក្រុមគ្រួសារ ប្រយុទ្ធចេញពីភាពក្រីក្របាន ហើយជាពិសេសនោះ សម្រាប់កម្មការិនីក្រៅប្រព័ន្ធដែលងាយរងគ្រោះតែម្តង នេះជាការល្អសម្រាប់សង្គមនិងសេដ្ឋកិច្ច»៕
