ក្រសួងធនធានទឹក និងឧតុនិយម អំពាវនាវឱ្យប្រជាពលរដ្ឋមានការប្រុងប្រយ័ត្នចំពោះបញ្ហាអាកាសធាតុនៅក្នុងសប្តាហ៍នេះ ខណៈកម្ពុជារងឥទ្ធិពលខ្យល់ព្យុះទី៧ និងឥទ្ធិពលពីមូសុងនិរតីកម្រិតខ្លាំង ដែលធ្វើឱ្យតំបន់មួយចំនួនមានភ្លៀងធ្លាក់ពីមធ្យមទៅច្រើនលាយឡំខ្យល់កន្ត្រាក់បក់ខ្លាំង។
យោងតាមសេចក្តីប្រកាសរបស់ក្រសួងធនធានទឹក និងឧតុនិយម ចេញផ្សាយនៅព្រឹកថ្ងៃទី២០ ខែកក្កដានេះ បានបញ្ជាក់ថា ចាប់ពីថ្ងៃទី២១និង២២ ខែកក្កដា កម្ពុជានឹងទទួលនូវឥទ្ធិពលពីមូសុងនិរតីខ្លាំង និងប្រព័ន្ធសម្ពាធទាបភ្ជាប់នឹងព្យុះលើកទី៧ សេមប៉ាកា (CEMPAKA) ហើយពីថ្ងៃទី២៣ដល់ទី២៧ ខែកក្កដា ទទួលឥទ្ធិពលពីមូសុងនិរតីកម្រិតខ្លាំង ជ្រលងសម្ពាធទាបពីប្រទេសចិន និងប្រព័ន្ធសម្ពាធទាប។
ក្រសួងដដែលបន្តថា ស្ថានភាពអាកាសធាតុនេះនឹងធ្វើឱ្យបណ្តាខេត្តនៅតំបន់វាលទំនាបកណ្តាល អាចនឹងមានភ្លៀងធ្លាក់ពីមធ្យមទៅបង្គួរ លាយឡំនឹងខ្យល់កន្ត្រាក់បក់ខ្លាំង លើកលែងតែបណ្តាខេត្តនៅភាគខាងក្រោមដែលនឹងមានភ្លៀងពីតិចទៅមធ្យមលាយឡំខ្យល់កន្ត្រាក់បក់ខ្លាំង។
ចំណែកបណ្តាខេត្តជាប់ជួរភ្នំដងរែក និងខ្ពង់រាបឦសាន ក្រសួងថា អាចនឹងមានភ្លៀងធ្លាក់ពីកម្រិតបង្គួរទៅច្រើន លាយឡំនឹងផ្គររន្ទះតិចតួច និងខ្យល់កន្ត្រាក់ក្នុងល្បឿនខ្លាំង ពិសេសនៅតាមតំបន់ជួរភ្នំក្រវាញ ជួរភ្នំដងរែក និងបណ្តាខេត្តស្ថិតនៅតាមដងទន្លេមេគង្គ។
ដោយឡែក នៅតំបន់មាត់សមុទ្រវិញ ក្រសួងថា អាចនឹងមានជំនន់ទឹកភ្លៀងដែលបណ្តាលមកពីភ្លៀងធ្លាក់ពីកម្រិតបង្គួរទៅច្រើន ផ្គររន្ទះបង្គួរ លាយឡំនឹងខ្យល់កន្ត្រាក់ក្នុងល្បឿនខ្លាំង និងរលកសមុទ្រខ្ពស់។
ករណីនេះ ក្រសួងបានអំពាវនាវដល់ប្រជាពលរដ្ឋបង្កើនការប្រុងប្រយ័ត្នខ្ពស់ចំពោះស្ថានភាពអាកាសធាតុនេះ ជាពិសេសប្រជានេសាទ៕
