មន្ត្រីជាន់ខ្ពស់ក្រសួងមហាផ្ទៃ អះអាងថា មានអ្នកជាប់ឃុំម្នាក់ទៀតបានស្លាប់ដោយសារជំងឺកូវីដ-១៩ និងឆ្លងទៅកាន់អ្នកផ្សេងទៀតនៅក្នុងពន្ធនាគារខេត្តបន្ទាយមានជ័យ ប៉ុន្តែមិនច្រើនដូចព័ត៌មានដែលបានចែកចាយលើបណ្តាញសង្គមនោះទេ។
អ្នកប្រើប្រាស់បណ្តាញសង្គម កាលពីម្សិលមិញ បានចែករំលែកព័ត៌មានតៗគ្នាថា មានអ្នកជាប់ឃុំនៅពន្ធនាគារខេត្តបន្ទាយមានជ័យ ចំនួន៣នាក់ស្លាប់ និងជាង១០០នាក់ទៀតបានឆ្លងជំងឺកូវីដ-១៩ ក្នុងនោះមានទាំងមន្ត្រីពន្ធនាគារផងដែរ។
ប៉ុន្តែអ្នកនាំពាក្យអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ប្រាប់ VOD នៅថ្ងៃអង្គារនេះថា ករណីនៅពន្ធនាគារខេត្តបន្ទាយមានជ័យ មានអ្នកជាប់ឃុំតែម្នាក់ប៉ុណ្ណោះដែលស្លាប់ ដោយសារគាត់មានបញ្ហាសួតធ្ងន់ធ្ងរ។
តែយ៉ាងណា លោកសុំមិនបង្ហាញចំនួនតួលេខអ្នកឆ្លងសរុបក្នុងពន្ធនាគារនេះទេ ដោយឱ្យសួរទៅអាជ្ញាធរខេត្តវិញ។
លោកថា៖ «មាន[ស្លាប់]មួយរូបកាលពីម្សិលមិញហ្នឹង ដោយសារគាត់មានជំងឺប្រចាំកាយធ្ងន់ធ្ងរពីមុនមក ជំងឺសួតតែម្នាក់ទេ! មិនមែន៣នាក់ដូចការផ្សព្វផ្សាយទេ! [ឆ្លងប៉ុន្មាននាក់បង?] អាហ្នឹង ខ្ញុំស្នើឱ្យសួរទៅរដ្ឋបាលខេត្ត ខ្ញុំអត់មានសមត្ថកិច្ចបកស្រាយរឿងហ្នឹងទេ ដោយសាររឿងនេះជាការងារសន្តិសុខ»។
អភិបាលរងខេត្តបន្ទាយមានជ័យ និងជាអ្នកនាំពាក្យ លោក លី សារី បដិសេធឆ្លើយតប ដោយថា លោកមិនមានតួលេខនៃការឆ្លងទេ ហើយលោកបានបង្វែរសំណួរឱ្យសួរទៅអ្នកគ្រប់គ្រងពន្ធនាគារវិញ។
ប្រធានពន្ធនាគារខេត្តបន្ទាយមានជ័យ លោក អ៊ុង ស៊ីផាន សុំមិនអត្ថាធិប្បាយលម្អិតឡើយ ដោយឱ្យសួរទៅអ្នកនាំពាក្យនៃអគ្គនាយកដ្ឋានពន្ធនាគារក្រសួងមហាផ្ទៃវិញ។
លោកថា៖ «កុំជឿគេ អារឿងហ្នឹងនោះ! [អ្នកវិជ្ជមាន]ជាជនជាប់ឃុំថ្មី គេយកទៅធ្វើតេស្តទេ! បងឯងចង់ដឹងអី សួរទៅខាងអ្នកនាំពាក្យទៅ»។
អនុប្រធានមន្ទីរសុខាភិបាលខេត្តបន្ទាយមានជ័យ និងជាអ្នកនាំពាក្យ លោក រឿន សុធី ថ្លែងថា លោកមានតែតួលេខអ្នកឆ្លងសរុបនៅទូទាំងខេត្ត ហើយមិនបានញែកចំនួនអ្នកស្លាប់និងអ្នកឆ្លងនៅក្នុងពន្ធនាគារទេ។
លោកថា៖ «ខ្ញុំបានទទួលតែតួលេខសរុប តែខាងពន្ធនាគារប៉ុន្មាន អត់បានដឹងផង! [សរុបប៉ុន្មាននៅខេត្តឥលូវ?] ឆ្លងជាង៨ ០០០នាក់ និងស្លាប់៦៥នាក់»។
បើតាមលោក នុត សវនា គឹតត្រឹមថ្ងៃអង្គារនេះ មានពន្ធនាគារចំនួន៨ហើយដែលមានការឆ្លងរាលដាលជំងឺកូវីដ-១៩ ពាក់ព័ន្ធព្រឹត្តិការណ៍សហគមន៍២០កុម្ភៈ ក្នុងនោះក៏មានស្ត្រីម្នាក់ជាប់ឃុំនៅពន្ធនាគារខេត្តកំពង់ស្ពឺបានស្លាប់ផងដែរ។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា កន្លងមក ស្ថាប័នជាតិនិងអន្តរជាតិ ធ្លាប់បានជំរុញទៅរដ្ឋាភិបាលឱ្យបង្ហាញតម្លាភាពពីករណីឆ្លងជំងឺកូវីដ-១៩ទៅលើអ្នកជាប់ឃុំ ដើម្បីងាយស្រួលក្នុងការចូលរួមស្វែងរកដំណោះស្រាយ។
អ្នកឃ្លាំមើលសិទ្ធិមនុស្សរូបនេះបារម្ភថា ហានិភ័យអាចកើតឡើង បើអាជ្ញាធរនៅតែបន្តលាក់បាំងការពិត ខណៈវិធានការដោះស្រាយភាពចង្អៀតណែនក្នុងពន្ធនាគារនៅបន្តជាប់គាំងនោះ។
លោកថា៖ «ខ្ញុំគិតថា វាគួរតែមានតម្លាភាពក្នុងការផ្តល់ព័ត៌មានពាក់ព័ន្ធស្ថានភាពឆ្លងកូវីដនៅក្នុងពន្ធនាគារ។ ទី២ វាគួរតែដោះស្រាយបញ្ហាចង្អៀតណែនក្នុងពន្ធនាគារឱ្យបានលឿនផងដែរ ទាក់ទងនឹងការដោះលែងអ្នកជាប់ឃុំ ទៅតាមសេចក្តីសម្រេចរបស់ក្រសួងយុត្តិធម៌ ទាក់ទិននឹងការដោះលែងទណ្ឌិតដែលជិតផុតទោស»។
អង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃទី២៣ ខែឧសភា ឆ្នាំ២០២១ បាននិយាយក្នុងរបាយការណ៍រួមគ្នាមួយថា បច្ចុប្បន្ន កម្ពុជាមានអ្នកជាប់ឃុំសរុប៣៩ ០០០នាក់នៅក្នុងពន្ធនាគារទូទាំងប្រទេសចំនួន២៨ពន្ធនាគារ ហើយថា ភាពចង្អៀតណែននៅក្នុងពន្ធនាគារ គឺជាហានិភ័យនៃការឆ្លងជំងឺកូវីដ-១៩។
ស្ថាប័នអន្តរជាតិទាំងពីរនេះបានទាមទារឱ្យអាជ្ញាធរកម្ពុជាស្វែងរកជម្រើសដោះលែងអ្នកទោសស្រាលៗ និងជនជាប់ឃុំបណ្តោះអាសន្នរង់ចាំសវនាការកាត់ទោស ឱ្យបាននៅក្រៅឃុំ ដើម្បីកាត់បន្ថយហានិភ័យនៃរលកចម្លងជំងឺរលាកផ្លូវដង្ហើមធ្ងន់ធ្ងរមួយនេះ។
យ៉ាងណា អ្នកនាំពាក្យក្រសួងយុត្តិធម៌ លោក គឹម សន្តិភាព ឱ្យដឹងកាលពីដើមខែកក្កដានេះថា វិធានការដោះលែងទណ្ឌិតតាមលក្ខខណ្ឌច្បាប់ ដើម្បីកាត់បន្ថយភាពចង្អៀតណែនក្នុងពន្ធនាគារក្នុងបរិបទកូវីដ-១៩ បានពិភាក្សាចប់សព្វគ្រប់ហើយជាមួយក្រសួងមហាផ្ទៃ នៅរង់ចាំការចុះហត្ថលេខាចុងក្រោយពីរដ្ឋមន្ត្រីក្រសួងយុត្តិធម៌ប៉ុណ្ណោះ៕