ក្រសួងបរិស្ថាន អះអាងថា ចំនួនសត្វក្រៀលនៅលើពិភពលោក រួមទាំងនៅកម្ពុជា បានធ្លាក់ចុះ ដោយសារអត្រាស្លាប់មានកម្រិតខ្ពស់ ខណៈអត្រាបង្កកំណើតនៅមានកម្រិតទាបនៅឡើយ។
ទំព័រហ្វេសប៊ុករបស់ក្រសួងបរិស្ថាន កាលពីថ្ងៃទី១៩ ខែកក្កដា ឆ្នាំ២០២១ បានលើកឡើងថា សត្វក្រៀលដែលជាប្រភេទសត្វកម្រ និងជាសត្វស្លាបដែលមានកម្ពស់ខ្ពស់ជាងគេនៅលើពិភពលោក មានការធ្លាក់ចុះខ្លាំង ក្នុងនោះ ប្រទេសកម្ពុជាក៏មានការធ្លាក់ចុះដែរ។ ប៉ុន្តែក្រសួងមិនបានបញ្ជាក់ថា ការធ្លាក់ចុះសត្វក្រៀលនៅកម្ពុជាក្នុងទំហំប៉ុន្មានឱ្យប្រាកដនោះឡើយ។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្រ្ដា បានពន្យល់អំពីកត្ដាគំរាមកំហែងដល់សត្វក្រៀលទាំងនោះថា ចំនួនសត្វក្រៀលយ៉ាងច្រើនដែលធ្លាក់ចុះនៅលើពិភពលោក គឺបណ្ដាលមកពីអត្រាស្លាប់មានកម្រិតខ្ពស់ ខណៈអត្រាបង្កកំណើតនៅមានកម្រិតទាបនៅឡើយ ព្រមទាំងកត្តាផ្សេងៗទៀត។
លោកបញ្ជាក់ថា៖ «ការធ្លាក់ចុះចំនួនសត្វក្រៀលនៅទូទាំងពិភពលោកនេះ គឺបណ្ដាលមកពីកត្តាគំរាមកំហែងផ្សេងៗដែលបង្កឡើងដោយមនុស្សនិងធម្មជាតិ ដូចជា ការបាត់បង់តំបន់ដីសើមដែលជាទីជម្រកដ៏សំខាន់របស់សត្វក្រៀល ការរំខាននៅតំបន់ពងកូនដែលនាំឱ្យអាត្រាបង្កកំណើតទាប ការបំពុលដោយថ្នាំពុលកសិកម្ម ការថយចុះនូវវត្តមានចំណីអាហារ ការកែប្រែប្រព័ន្ធជលសាស្ត្រ ជំងឺឆ្លង ការយកស៊ុតឬកូនសត្វក្រៀលពីសំបុកដើម្បីចិញ្ចឹមឬជួញដូរ ការសម្លាប់ដោយសត្វឆ្កែខាំ និងការប្រែប្រួលអាកាសធាតុ ជាដើម»។
យ៉ាងនេះក្តី លោក នេត្រ ភក្រ្ដា បានអំពាវនាវដល់ប្រជាពលរដ្ឋទាំងអស់ចូលរួមការពារនិងអភិរក្សសត្វក្រៀលដែលជាប្រភេទសត្វដ៏កម្រនេះ រួមមាន ការថែរក្សាទីជម្រកពងកូន និងតំបន់ដីសើមដែលជាកន្លែងស្វែងរកចំណីរបស់សត្វក្រៀលនិងសត្វស្លាបផ្សេងទៀត។
យោងទៅតាមជំរឿនសត្វក្រៀលនៅកម្ពុជា នាឆ្នាំ២០១៩ និងដើមឆ្នាំ២០២០ សត្វក្រៀលចំនួន១៩៤ក្បាលត្រូវបានគេរកឃើញនិងកត់ត្រាទុក ដែលស្ថិតនៅប្រមាណ១០ទីតាំងផ្សេងៗគ្នានៅក្នុងប្រទេសកម្ពុជា។ ការជំរឿននេះត្រូវបានគេធ្វើឡើងរៀងរាល់ឆ្នាំ ចាប់ពីខែធ្នូ ដល់ខែឧសភា ដើម្បីតាមដានចំនួនកើនឡើងឬថយចុះចំនួនសត្វក្រៀល និងដើម្បីការពារនិងអភិរក្សបន្ថែមទៀត។
ស្របពេលនេះដែរ យោងទៅតាមទិន្នន័យរបស់អ្នកជំនាញ ចំនួនសត្វក្រៀលនៅលើពិភពលោកមានចំនួនចន្លោះពី១៣ ០០០ ទៅ១៥ ០០០ក្បាលនាពេលបច្ចុប្បន្ន ហើយក្នុងនោះមាននៅប្រទេសឥណ្ឌា ប្រទេសអូស្រ្ដាលី ប្រទេសវៀតណាម ប្រទេសឡាវ និងប្រទេសកម្ពុជា។ សត្វក្រៀលត្រូវបានចាត់ជាប្រភេទសត្វងាយរងគ្រោះនៅក្នុងបញ្ជីក្រហមរបស់អង្គការ IUCN ផងដែរ៕
