អាជ្ញាធរខេត្តកែប គ្រោងសាងសង់កន្លែងលក់ដូរជាបណ្តោះអាសន្នសម្រាប់អាជីវករនៅ«ផ្សារសេះស»បានប្រកបអាជីវកម្មរបស់ពួកគាត់ឡើងវិញ ក្រោយពីផ្សារនេះត្រូវបានអគ្គិភ័យឆេះទាំងស្រុងអស់ជាង១២០តូបកាលពីយប់ថ្ងៃចន្ទ។
អភិបាលរង និងជាអ្នកនាំពាក្យរដ្ឋបាលខេត្តកែប លោក វ៉ៅ សុខា បានថ្លែងនៅថ្ងៃអង្គារម្សិលមិញថា ផ្សារសេះស មានទីតាំងនៅសង្កាត់អូរក្រសារ ក្រុងកែប ត្រូវបានអគ្គិភ័យឆាបឆេះទាំងស្រុងកាលពីល្ងាចថ្ងៃទី១៩ ខែកក្កដា ឆ្នាំ២០២១ បណ្តាលឱ្យឆេះតូបនិងសម្ភារលក់ដូររបស់អាជីវករអស់ចំនួន១២១តូប ប៉ុន្តែមិនបណ្តាលឱ្យមានអ្នករងរបួសឬស្លាប់ក្នុងហេតុការណ៍នេះទេ។
លោកបន្តថា តាមការស្រាវជ្រាវបឋម អគ្គិភ័យនេះកើតឡើងបណ្តាលមកពីឆ្លងចរន្តអគ្គិសនី ដោយសារមុនពេលកើតហេតុ មានខ្យល់កន្ត្រាក់បក់បោកខ្លាំងបណ្តាលឱ្យប៉ើងដំបូលផ្សារទៅប៉ះនឹងខ្សែចរន្តអគ្គិសនី បង្កជាអណ្តាតភ្លើងឆាបឆេះផ្សារនេះតែម្តង។
លោក វ៉ៅ សុខា បន្ថែមទៀតថា ក្រោយហេតុការណ៍នេះ អាជ្ញាធរខេត្តបានជួយឧបត្ថម្ភជាថវិកា ស្បៀងអាហារ និងសម្ភារប្រើប្រាស់មួយចំនួនដល់អាជីវករ និងគ្រោងសាងសង់កន្លែងលក់បណ្តោះអាសន្ន ដើម្បីឱ្យអាជីវករបានលក់ដូរ បន្ទាប់មកនឹងចរចាជាមួយម្ចាស់ទីតាំងផ្សារដែលឆេះនោះ ដើម្បីសាងសង់ផ្សារឡើងវិញ។
លោកថា៖ «យើងនឹងធ្វើការចរចាជាមួយម្ចាស់ទីតាំង ព្រោះទីតាំងផ្សារហ្នឹងជារបស់ឯកជន»។
តែយ៉ាងណា លោកនៅពុំទាន់បញ្ជាក់ពីទីតាំងនិងការចាប់ផ្តើមរៀបចំទីតាំងថ្មីនៅពេលណានោះទេ។
ដោយឡែក ចំពោះការខូចខាតសម្ភារនិងទ្រព្យសម្បត្តិក្នុងផ្សារដោយសារគ្រោះអគ្គិភ័យនេះ លោក វ៉ៅ សុខា បញ្ជាក់ថា អាជ្ញាធរនៅមិនទាន់វាយតម្លៃបាននៅឡើយ ដោយសារអាជ្ញាធរកំពុងស្រង់របាយការណ៍៕
