មន្ទីរធម្មការ និងសាសនា រាជធានីភ្នំពេញ បានស្នើដល់គ្រប់វត្តអារាមទាំងអស់ដែលមានឈាបនដ្ឋានឬឡដុតសព ឱ្យរក្សាតម្លៃធម្មតាសម្រាប់បូជាសពដែលមិនមែនជាសពអ្នកកើតជំងឺកូវីដ-១៩ បន្ទាប់ពីប្រជាពលរដ្ឋមានការថ្នាំងថ្នាក់ជាមួយអាជ្ញាធរនិងរាជរដ្ឋាភិបាលចំពោះការយកតម្លៃបូជាសពធម្មតាច្រើនហួសហេតុ។
លិខិតរបស់មន្ទីរធម្មការ និងសាសនា រាជធានីភ្នំពេញ កាលពីថ្ងៃទី២០ ខែកក្កដា ដែលទើបផ្សព្វផ្សាយកាលពីថ្ងៃម្សិលមិញ បញ្ជាក់ថា កន្លងមក មានវត្តអារាមខ្លះបានយកតម្លៃបូជាសពដែលមិនមែនជាសពអ្នកជំងឺកូវីដ-១៩ ក្នុងតម្លៃច្រើនលើសពីធម្មតា។
លិខិតដដែលបន្តថា បញ្ហានេះបានបណ្ដាលឱ្យប៉ះពាល់ដល់ជីវភាពរស់នៅរបស់ពលរដ្ឋ និងធ្វើឱ្យពួកគេមានការខកចិត្តចំពោះអាជ្ញាធរនិងរាជរដ្ឋាភិបាល។ បន្ថែមពីនេះ ការយកតម្លៃលើសលុបនេះ គឺជាការប្រព្រឹត្តផ្ទុយពីគោលការណ៍របស់រាជរដ្ឋាភិបាលក្នុងការយកចិត្តទុកដាក់ពីសុខទុក្ខនិងជីវភាពរស់នៅរបស់ប្រជាពលរដ្ឋ។
ដើម្បីដោះស្រាយបញ្ហានេះ ប្រធានមន្ទីរធម្មការ និងសាសនា រាជធានីភ្នំពេញ លោក ទេព គង្គា បានស្នើក្នុងលិខិតនោះថា៖ «សូមព្រះអង្គមេត្តាជួយសម្រួលក្នុងការបូជាសពដែលគ្មានជំងឺកូវីដ-១៩ទៅតាមទម្លាប់ធ្លាប់មានពីមុនមក និងមុននឹងបូជាត្រូវពិនិត្យលិខិតបញ្ជាក់ថាសពនោះមិនពាក់ព័ន្ធនឹងជំងឺកូវីដ-១៩របស់ពេទ្យ អមដោយលិខិតឯកភាពរបស់អាជ្ញាធរមូលដ្ឋាន»។
លោក ទេព គង្គា បានរម្លឹកក្នុងលិខិតថា វត្តអារាមត្រូវអនុវត្តតាមការកំណត់របស់រដ្ឋបាលរាជធានីភ្នំពេញ ដោយអនុញ្ញាតចំនួនសាច់ញាតិសព១៥នាក់ប៉ុណ្ណោះយ៉ាងច្រើន និងតម្រូវឱ្យអ្នកចូលរួមបូជាសពពាក់ម៉ាស់និងរក្សាគម្លាតឱ្យមានសុវត្ថិភាព។
លើសពីនេះ លោកបានក្រើនរម្លឹកបន្ថែមអំពីតម្លៃសេវាបូជាសពថា សេវាបូជាសពត្រូវរក្សាតម្លៃដើម ដោយចៀសវាងការដំឡើងថ្លៃ ដែលធ្វើឱ្យប៉ះពាល់ដល់ជីវភាពរបស់ប្រជាពលរដ្ឋក្នុងគ្រាជួបការលំបាកនេះ។ ជាមួយគ្នានេះ ប្រធានមន្ទីរធម្មការនិងសាសនាដដែល បានរម្លឹកដែរថា ហាមវត្តធ្វើការរៃអង្គាសបច្ច័យគ្រប់រូបភាពពីម្ចាស់សព ក្នុងទម្រង់នៃការកសាងវត្តអារាម ជាដើម។
កាលពីពេលថ្មីៗនេះ មានលិខិតមួយអំពីសេចក្ដីសម្រេចរបស់ចៅអធិការវត្ត«សំបូរមាស» បង្ហាញពីតារាងតម្លៃទទួលបូជាសពដែលចែកចាយលើបណ្តាញសង្គមហ្វេសប៊ុក ដោយតារាងនោះបានកំណត់តម្លៃបូជាសពធម្មតាក្នុងវត្តមួយនេះ ចំនួន៣០០ ០០០រៀល រីឯឡដាក់សពមានតម្លៃ២០០ ០០០រៀល។
ក្នុងនោះ មានសេវាផ្សេងៗទៀតសម្រាប់តម្រូវការរបស់គ្រួសារសព ដូចជា សពដាក់តម្កល់១ថ្ងៃ គិតទាំងថ្លៃទឹកនិងភ្លើងតម្លៃ៤០០ ០០០រៀល ក្ដារមឈូសវត្តតម្លៃ១ ០០០ ០០០រៀល ឡានដឹកសពដោយគិតតាមចម្ងាយជិតនិងឆ្ងាយ គឺមានតម្លៃពី២៤០ ០០០រៀល ដល់៣០០ ០០០ រៀល។ ចំណែកទីតម្កល់មេរុ ឬមេន នៅជិតសាលារៀន តម្លៃ១ ០០០ ០០០រៀល ទីតម្កល់មេរុនៅជិតទីប៉ាឆា តម្លៃ៤០០ ០០០រៀល និងមេក្រូ១ថ្ងៃ តម្លៃ២០០ ០០០ រៀល។
យ៉ាងណា សេចក្តីសម្រេចនេះបានធ្វើឱ្យសាធារណជន ពិសេសអ្នកប្រើប្រាស់បណ្តាញសង្គមហ្វេសប៊ុករិះគន់ជាខ្លាំង ដោយថាជាការធ្វើអាជីវកម្មលើសព ខណៈគ្រួសារពួកគេកំពុងជួបទុក្ខក្រៀមក្រំ ហើយតម្លៃទាំងនោះនឹងធ្វើឱ្យពលរដ្ឋក្រីក្រ គ្មានលទ្ធភាពដើម្បីយកសពទៅបូជាឬរៀបចំពិធីឱ្យបានសមរម្យនោះឡើយ៕
