រដ្ឋាភិបាលជប៉ុនបានផ្ដល់ជំនួយឥតសំណងចំនួន៣,៣១លានដុល្លារដល់រដ្ឋាភិបាលកម្ពុជា សម្រាប់ជួយដល់គម្រោង «អាហារូបករណ៍អភិវឌ្ឍន៍ធនធានមនុស្ស» ក្នុងឆ្នាំ២០២១។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចេញផ្សាយនៅថ្ងៃទី២៣ ខែកក្កដា ឆ្នាំ២០២១ ឱ្យដឹងថា ជំនួយឥតសំណងចំនួន៣,៣១លានដុល្លារនេះ បានចូលរួមចំណែកដល់ការលើកកម្ពស់ការអភិវឌ្ឍធនធានមនុស្សក្នុងប្រទេសកម្ពុជា និងជួយពង្រឹងបន្ថែមទៀតនូវកិច្ចសហប្រតិបត្តិការជិតស្និទ្ធនិងចំណងមិត្តភាពរវាងកម្ពុជានិងជប៉ុន។
បើតាមក្រសួងដដែលថា ការផ្ដល់ជំនួយនេះនឹងចុះហត្ថលេខាព្រមគ្នាលើលិខិតប្តូរសាររវាងរដ្ឋមន្ត្រីការបរទេស និងសហប្រតិបត្តិការអន្តរជាតិនៃកម្ពុជា លោក ប្រាក់ សុខុន និងឯកអគ្គរាជទូតជប៉ុនប្រចាំកម្ពុជា លោក មិកាមិ ម៉ាសាហ៊ីរ៉ូ។
ក្រៅពីផ្ដល់ជំនួយថវិកាថ្មីៗនេះ រដ្ឋាភិបាលជប៉ុនក៏បានផ្ដល់ជំនួយវ៉ាក់សាំងប្រឆាំងជំងឺកូវីដ-១៩ ប្រភេទ AstraZeneca ដល់កម្ពុជាចំនួន១លានដូស ដែលវ៉ាក់សាំងនេះនឹងដឹកមកដល់រាជធានីភ្នំពេញ នៅថ្ងៃទី២៣ ខែកក្កដា ឆ្នាំ២០២១នេះ។
លើសពីនេះ បើតាមសេចក្ដីប្រកាសរបស់ស្ថានទូតជប៉ុន កាលពីថ្ងៃទី១៣ ខែកក្កដា ឆ្នាំ២០២១ ជប៉ុនក៏បានផ្ដល់ជំនួយច្រើនជាង៥០លានដុល្លារដល់កម្ពុជា រួមមាន ការផ្ដល់បរិក្ខារពេទ្យ ការកែលម្អមន្ទីរពេទ្យ ការគាំទ្រដល់គម្រោងរបស់អង្គការអន្តរជាតិនានា សម្រាប់វិធានការទប់ស្កាត់ការចម្លងជំងឺកូវីដ-១៩នៅតាមព្រំដែន ក៏ដូចជាការផ្ដល់បរិក្ខារសម្រាប់ដឹកជញ្ជូននិងរក្សាទុកវ៉ាក់សាំងឱ្យបានត្រឹមត្រូវ ជាដើម។
ជាងនេះទៀត លោក មិកាមិ ម៉ាសាហ៊ីរ៉ូ លើកឡើងទៀតថា រដ្ឋាភិបាលជប៉ុនក៏បានផ្ដល់កម្ចីប្រមាណ២២៧លានដុល្លារ ដល់រដ្ឋាភិបាលកម្ពុជា ដើម្បីយកទៅប្រើប្រាស់ក្នុងកម្មវិធីឧបត្ថម្ភសាច់ប្រាក់ដល់ប្រជាជនដែលរងផលប៉ះពាល់ដោយសារកូវីដ-១៩ និងសម្រាប់ការពង្រឹងប្រព័ន្ធសុខាភិបាលផងដែរ៕
