ប្រជាពលរដ្ឋជាង៦០គ្រួសារ រស់នៅភូមិរំដេង ឃុំកន្ទួតខ្នាក្រៅ ស្រុកស្វាយលើ ខេត្តសៀមរាប ស្នើឱ្យរដ្ឋាភិបាលនិងអាជ្ញាធរខេត្តដោះស្រាយបញ្ហាវិវាទដីធ្លីជូនពួកគាត់ ក្រោយពីដីទំហំជាង៥០០ហិកតាដែលពួកគាត់ធ្លាប់អាស្រ័យផល ត្រូវបានអាជ្ញាធរមូលដ្ឋានដកហូតយកទៅបង្កើតជាដីសហគមន៍ព្រៃឈើ។
ពលរដ្ឋម្នាក់ក្នុងចំណោមជាង៦០គ្រួសារ រស់នៅភូមិរំដេង លោកស្រី ពួច រឿន បានលើកឡើងនៅថ្ងៃទី២១ ខែកក្កដា ឆ្នាំ២០២១នេះថា អ្នកស្រីបានរស់នៅនិងអាស្រ័យផលលើដីនេះអស់រយៈពេល១៥ឆ្នាំមកហើយ ប៉ុន្តែរយៈពេលប៉ុន្មានឆ្នាំចុងក្រោយនេះ ស្រាប់តែអាជ្ញាធរនិងរដ្ឋបាលព្រៃឈើបានចោទពួកគាត់ថារស់នៅលើដីនោះដោយខុសច្បាប់ និងដកហូតយកដីនោះទៅធ្វើជាដីសហគមន៍ទុកចែកឱ្យពលរដ្ឋផ្សេងទៅវិញ។
ស្ត្រីវ័យ៦០ឆ្នាំរូបនេះបន្តថា ក្រោយមានទំនាស់ដីធ្លីនេះ អាជ្ញាធរបានរារាំងពួកគាត់ទាំងជាង៦០គ្រួសារមិនឱ្យចូលទៅធ្វើស្រែចម្ការឬដាំដំណាំផ្សេងៗនៅលើដីនោះទេ ដែលធ្វើឱ្យពួកគាត់ជួបការលំបាកខ្លាំងក្នុងជីវភាពរស់នៅដោយសារពុំមានមុខរបរអ្វីផ្សេងពីនេះ។
អ្នកស្រីអះអាងថា៖ «គេប្រមាថដក គេប្រមាថដាក់ខ្នោះ គេប្រមាថដុតផ្ទះនេះចោល។ មានអ្វីគេយកអស់ តែពេលគេមក ខ្ញុំលាក់ដាក់ក្នុងព្រៃអស់ទៅ។ គេប្រមាថសព្វគ្រប់ហើយ គេរើ គេមិនឱ្យនៅទេកន្លែងនេះ! បើមិនរើ គេរើខ្លួនគេ បានខ្ញុំវេទនាណាស់។»
ប្រជាពលរដ្ឋមួយរូបទៀត លោក តក់ ធាង បានលើកឡើងដែរថា ពួកគាត់បានខកខានប្រកបរបរធ្វើស្រែចម្ការនិងដាំដំណាំផ្សេងៗលើដីទំនាស់នោះអស់រយៈពេល២ឆ្នាំមកហើយ ដោយសារតែអាជ្ញាធរមូលដ្ឋានរារាំងនិងបានគំរាមចាប់ខ្លួន ព្រមទាំងដកហូតយកសម្ភាររបស់ពួកគាត់ថែមទៀតផង បើសិនជាពួកគាត់ចូលទៅធ្វើស្រែចម្ការនៅលើដីនោះ។
ករណីនេះ លោកបានស្នើថា៖ «ខ្ញុំសំណូមពរដល់សម្ដេចនាយករដ្ឋមន្រ្តី ឬក្រសួង និងសម្ដេច ស ខេង [រដ្ឋមន្ត្រីក្រសួងមហាផ្ទៃ] ដែលលោកជាអ្នកច្បាប់ខាងលើ សូមមេត្តាជួយដល់កូនចៅខាងក្រោម ទោះបីថាប្រជាពលរដ្ឋអត់សូវដឹងទេ ទាំងគេ ទាំងខ្ញុំ! តែរស់នៅបានអាស្រ័យផលហើយនេះ ខុសត្រូវយ៉ាងណា សូមឱ្យជួយ ធ្វើជាផលជាអីបានផង។ បើសិនជាពីមុនមានបោះបង្គោលសហគមន៍ទីនេះ ប្រជាពលរដ្ឋពួកខ្ញុំមិនមាននរណាហ៊ានទេ»។
ចំណែកពលរដ្ឋម្នាក់ទៀត លោក គឹម ឡាវ៉ូ អាយុ៣៥ឆ្នាំ បានបញ្ជាក់ថា ពួកគាត់បានកាន់កាប់ដីនេះតាំងពីឆ្នាំ២០១២មកម៉្លេះ ដោយមានប្លង់កម្មសិទ្ធិទទួលស្គាល់ពីអាជ្ញាធរមូលដ្ឋាន ប៉ុន្តែនៅឆ្នាំ២០១៧ ស្រាប់តែរដ្ឋបាលព្រៃឈើ ក៏ដូចជាអាជ្ញាធរ បានយកដីនោះទៅបង្កើតជាដីសហគមន៍ ដោយមិនមានការព្រមព្រៀងពីពលរដ្ឋទៅវិញ។
ករណីនេះ លោកបានស្នើដល់រដ្ឋាភិបាល ក៏ដូចជាអាជ្ញាធរពាក់ព័ន្ធ ជួយអន្តរាគម៍ដោះស្រាយនិងប្រគល់ដីនោះទៅឱ្យពលរដ្ឋកាន់កាប់និងអាស្រ័យផលដូចដើមវិញ។
តែយ៉ាងណា អាជ្ញាធរមូលដ្ឋានឃុំកន្ទួតខ្នាក្រៅ លោក សេង លន បានចោទពលរដ្ឋទាំងជាង៦០គ្រួសារនោះថា ជាអ្នកទន្ទ្រានដីសហគមន៍ដោយខុសច្បាប់ បើទោះជាអាជ្ញាធរភូមិឃុំបានចុះអប់រំផ្សព្វផ្សាយជាច្រើនលើកច្រើនសារមកហើយក្តី។
លោកថា៖ «ប្រជាពលរដ្ឋជាង៦០គ្រួសារ ជាអ្នកបំភ្លៃនិងមានការបំប៉ោងពីក្រៅទេ! ដូចខ្ញុំសិក្សាពីមេភូមិ អនុភូមិ ដូចជាមានតែ១១គ្រួសារទេ ដីប្រហែល៧០ហិកតានៅក្នុងដីសហគមន៍នោះ»។
លោកបន្ថែមថា៖ «ប្រធានសហគមន៍តែងតែណែនាំ ក្រុមប្រឹក្សាឃុំតែងតែណែនាំ មេព្រៃតែងតែណែនាំ មានបងប្អូនប្រជាពលរដ្ឋអាស្រ័យផលក្នុងដីសហគមន៍នោះ បើមាន៥ហិកតា ឱ្យធ្វើ៥ហិកតា បើមាន១០ហិកតា ឱ្យធ្វើ១០ហិកតា ប៉ុន្តែវាមិនអ៊ីចឹងទេ […] គាត់មិនមែនធ្វើតែ៥ហិកតាទេ គាត់រុករានទន្រ្ទានកាន់កាប់បន្ត ៥[ហិកតា] ថែម៥[ហិកតា]ទៀត លើដីសហគមន៍ហ្នឹង»។
លោក សេង លន បានអះអាងថា ការបង្កើតដីសហគមន៍ទំហំប្រមាណ៥០៤ហិតតានោះ ធ្វើឡើងស្របទៅតាមច្បាប់ ហើយក៏មានការព្រមព្រៀងពីសំណាក់ប្រជាពលរដ្ឋរស់នៅតំបន់នោះដែរ ដោយពួកគេបានចូលរួមផ្ដល់ស្នាមមេដៃដោយផ្ទាល់និងមានការរៀបចំរចនាសម្ព័ន្ធគណៈកម្មការគ្រប់គ្រងសហគមន៍នេះថែមទៀត។
លោកបញ្ជាក់ថា៖ «ពាក់ព័ន្ធដីសហគមន៍ជប់រំដេងនោះ ប្រជាពលរដ្ឋជាអ្នកផ្តិតមេដៃខ្លួនគាត់ ចូលរួមបដិភាគធ្វើព្រៃសហគមន៍ចំនួនមួយគ្រួសារ ១០ ០០០[រៀល] នៅក្នុងនោះ យើងមានលក្ខណៈបោះឆ្នោតរើសរកប្រធាននិងអនុប្រធានសហគមន៍ថែមទៀត»។
ចំណែកអភិបាលរងខេត្តសៀមរាប លោក លី សំរិទ្ធ បានបដិសេធអត្ថាធិប្បាយ ដោយសារលោកមិនទាន់ទទួលពាក្យបណ្ដឹងសុំអន្តរាគមន៍ពីប្រជាពលរដ្ឋនៅឡើយ៕
