ក្រសួងប្រៃសណីយ៍ និងទូរគមនាគមន៍ រម្លឹកដល់ប្រតិបត្តិករផ្តល់សេវាទូរសព្ទចល័តទាំងអស់ ពង្រឹងការគ្រប់គ្រងនិងនីតិវិធីនៃការចែកចាយនិងលក់ស៊ីមកាតទូរសព្ទចល័តឱ្យបានត្រឹមត្រូវជូនអតិថិជន ក្រោយពីក្រសួងរកឃើញថា ក្រុមហ៊ុនស្មាត (Smart Axiata Co., Ltd.) បានអនុវត្តខុសនីតិវិធីក្នុងការបើកលេខទូរសព្ទជូនអតិថិជន។
យោងតាមសេចក្តីប្រកាសព័ត៌មានរបស់ក្រសួងប្រៃសណីយ៍ កាលពីថ្ងៃទី២២ ខែកក្កដា ម្សិលមិញ បានលើកឡើងថា ថ្មីៗនេះ ក្រសួងបានរកឃើញថា ក្រុមហ៊ុន ស្មាត អាស្យាតា ខូអិលធីឌី (Smart Axiata Co., Ltd.) បានកាត់ផ្តាច់លេខទូរសព្ទរបស់អតិថិជនដែលកំពុងប្រើប្រាស់រាល់ថ្ងៃ ហើយយកទៅលក់បន្តឱ្យអតិថិជនថ្មីដោយគ្មានការយល់ព្រមពីម្ចាស់ដើម។
ដើម្បីការពារសិទ្ធិនិងផលប្រយោជន៍អ្នកប្រើប្រាស់សេវាទូរសព្ទចល័ត ក្រសួងបានណែនាំឱ្យក្រុមហ៊ុនស្មាត (Smart Axiata Co., Ltd.) ត្រូវសុំទោសជាសាធារណៈ និងសន្យាមិនឱ្យមានហេតុការណ៍នេះកើតឡើងជាថ្មី ព្រមទាំងត្រូវផ្តល់សំណងខូចខាតដល់ម្ចាស់ដើម ចំពោះការប្រព្រឹត្តខុសនឹងនីតិវិធីក្នុងការបិទលេខទូរសព្ទពីអតិថិជនដែលកំពុងប្រើប្រាស់នេះ ហើយម្ចាស់ដើមមានសិទ្ធិទទួលបានលេខទូរសព្ទនោះមកប្រើប្រាស់វិញ។
ក្រសួងបន្តថា រាល់បុគ្គលពាក់ព័ន្ធនឹងករណីនេះ នឹងត្រូវទទួលខុសត្រូវចំពោះមុខច្បាប់ជាធរមាន។
ក្រសួងប្រៃសណីយ៍ ក៏បានរម្លឹកជាថ្មីដល់ប្រតិបត្តិករផ្តល់សេវាទូរសព្ទចល័តទាំងអស់ត្រូវពង្រឹងការគ្រប់គ្រងនិងនីតិវិធីនៃការចែកចាយនិងលក់ស៊ីមកាតឱ្យបានត្រឹមត្រូវដល់អតិថិជនរបស់ខ្លួន និងចៀសវាងមានករណីបែបនេះកើតឡើងទៀត។
ក្រសួងបានព្រមានដែរថា៖ «ក្រសួងប្រៃសណីយ៍ និងទូរគមនាគមន៍ នឹងបន្តតាមដាននិងចាត់វិធានការយ៉ាងតឹងរ៉ឹងបំផុត ស្របតាមច្បាប់និងលិខិតបទដ្ឋានគតិយុត្តិជាធរមាន ចំពោះប្រតិករផ្តល់សេវាទូរសព្ទចល័តណាដែលបានប្រព្រឹត្តខុស»។
ក្រោយមានការព្រមានពីក្រសួង នៅថ្ងៃសុក្រនេះ ក្រុមហ៊ុន Smart បានប្រកាសសុំទោសចំពោះអតិថិជនមួយរូប ដែលរងផលប៉ះពាល់ចំពោះបញ្ហានេះ និងបានប្តេជ្ញាដោះស្រាយសំណងសមរម្យជូនអតិថិជនរូបនោះ។
ក្រុមហ៊ុន Smart បន្ថែមថា ខ្លួនបានរកឃើញកំហុសរបស់បុគ្គលិកមួយរូបដែលប្រព្រឹត្តទង្វើផ្ទុយស្រឡះពីស្តង់ដារ ក្រមសីលធម៌ និងវិជ្ជាជីវៈរបស់ក្រុមហ៊ុន ហើយបុគ្គលិករូបនោះក៏ត្រូវបានព្យួរពីការងារនិងទទួលទណ្ឌកម្មវិន័យនានាយោងតាមបទបញ្ជាផ្ទៃក្នុងផងដែរ។
ក្រុមហ៊ុននេះបញ្ជាក់ថា៖ «យើងខ្ញុំនឹងពង្រឹងនីតិវិធីផ្ទៃក្នុងនិងដាក់ចេញនូវវិធានការបន្ថែមនានា ដើម្បីធានាមិនឱ្យឧប្បត្តិហេតុដដែលនេះកើតឡើងសារជាថ្មីទៀតឡើយ»។
បើតាមសេចក្តីជូនដំណឹងរបស់ក្រុមហ៊ុនស្មាត កាលពីថ្ងៃទី២៩ ខែឧសភា ឆ្នាំ២០២១ បុគ្គលិកក្រុមហ៊ុនមួយរូបបានផ្ទេរសិទ្ធិលើកម្មសិទ្ធិលេខទូរសព្ទរបស់អតិថិជនខ្លួនមួយរូបទៅឱ្យអតិថិជនថ្មី ដោយគ្មានការយល់ព្រមឬព្រមព្រៀងគ្នាជាមុនពីម្ចាស់ដើម។ ក្រោយហេតុការណ៍នេះមួយថ្ងៃ ក្រុមហ៊ុន Smart បានទទួលបណ្តឹងនិងបានផ្អាកដំណើរលេខទូរសព្ទនោះជាបណ្ណោះអាសន្ន មុនពេលប្រគល់ឱ្យម្ចាស់ដើមវិញ។
ក្រុមហ៊ុន Smart អះអាងថា នៅថ្ងៃទី៨ ខែមិថុនា ឆ្នាំ២០២១ ចំពោះករណីនេះ ខ្លួនក៏បានជូនដំណឹងទៅនិយ័តករទូរគមនាគមន៍កម្ពុជា (TRC) និងស្ថាប័នមានសមត្ថកិច្ចពាក់ព័ន្ធដែលបានទទួលពាក្យបណ្តឹងពីអតិថិជននោះផងដែរ ហើយក្រុមហ៊ុនបានទាក់ទងជាមួយអតិថិជនដែលរងការប៉ះពាល់ និងស្នើផ្តល់ជាដំណោះស្រាយជូនគាត់ ក៏ប៉ុន្តែសំណើនោះត្រូវបានបដិសេធ៕