សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន បានឃាត់ខ្លួនមនុស្សចំនួន ៥ នាក់ និងរឹបអូសគ្រឿងញៀនបានជាង ១៥៦ គីឡូក្រាម នៅក្នុងសង្កាត់និរោធនិ៍ ខណ្ឌច្បារអំពៅ រាជធានីភ្នំពេញ កាលពីថ្ងៃទី២០ ខែកក្កដា ឆ្នាំ២០២១។
បើតាមគេហទំព័រអគ្គស្នងការដ្ឋាននគរបាលជាតិចេញផ្សាយនៅថ្ងៃទី២៤ ខែកក្កដា ឆ្នាំ២០២១ ឱ្យដឹងថា មនុស្សទាំង ៥ នាក់ ត្រូវបានសមត្ថកិច្ចឃាត់ខ្លួន នៅផ្ទះលេខ៨០ ផ្លូវM3 បូរីប៉េងហួត (បឹងស្នោ) សង្កាត់និរោធនិ៍ ខណ្ឌច្បារអំពៅ រាជធានីភ្នំពេញ ដែលជាទីតាំងកែច្នៃ រក្សាទុកគ្រឿងញៀន ១៥៦ គីឡូក្រាម។ ជនសង្ស័យទាំង៥នាក់ ដែលសមត្ថកិច្ចឃាត់ខ្លួនបាននោះ រួមមាន ជនជាតិខ្មែរម្នាក់ និង ជនជាតិវៀតណាម ៤ នាក់។
ក្រៅពីឃាត់ខ្លួនមនុស្ស និងរឹបអូសគ្រឿងញៀននោះ សមត្ថកិច្ចបានរឹបអូនសម្ភារៈមធ្យោបាយ និងឧបករណ៍កែច្នៃសារធាតុញៀន ដូចជា ម៉ាស៊ីនសម្រាប់សម្ងួតសារធាតុញៀន, ម៉ាស៊ីនសម្រាប់ក្រឡុក, ពុម្ពសម្រាប់វាយគ្រាប់សារធាតុញៀនមួយចំនួនធំ, ម៉ាស៊ីនសម្រាប់វេចខ្ចប់សារធាតុញៀន១គ្រឿង, ម៉ាស៊ីនរាប់គ្រាប់, ម៉ាស៊ីនសម្រាប់អ៊ុតថង់ផ្លាស្ទិក, ម៉ាស៊ីនសម្រាប់កិន និងក្រឡុក, ថង់សម្រាប់វេចខ្ចប់, ជញ្ជីងសម្រាប់ថ្លឹង, ម៉ាស៊ីនសម្រាប់វាយគ្រាប់, រានសម្រាប់បញ្ឍរសម្ងួត, ចានដែកសម្រាប់ដាក់ម្សៅ និងកញ្ច្រែងសម្រាប់រែងសារធាតុញៀនជាដើម។ បច្ចុប្បន្ន ជនសង្ស័យ និងវត្ថុតាងខាងលើ ត្រូវបានសមត្ថកិច្ចកសាងសំណុំរឿង បញ្ជូនទៅតុលាការសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។
យោងតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀនឱ្យដឹងថា រយៈពេល ៦ខែ ដើមឆ្នាំ២០២១ សមត្ថកិច្ចបានបង្ក្រាបបទល្មើសគ្រឿងញៀនជាង៧តោន ឬស្មើនឹង ៧ ៦២៤ គីឡូក្រាម ខណៈកាលពីឆ្នាំ២០២០ សមត្ថកិច្ចបង្ក្រាបបានតែ ៣ ១៣១ ករណីប៉ុណ្ណោះ។
ចំនួនគ្រឿងញៀនដែលសមត្ថកិច្ចបង្រ្កាបបាននេះ មានការកើនឡើងជិត១០ ភាគរយ បើប្រៀបធៀបនឹងរយៈពេលដូចគ្នា បើទោះកម្ពុជាកំពុងជួបវិបត្តិកូវីដ-១៩ក៏ដោយ។
រដ្ឋមន្ត្រីក្រសួងមហាផ្ទៃលោក ស ខេង បានលើកឡើងនៅលើទំព័រហ្វេសប៊ុករបស់លោកកាលពីថ្ងៃទី១០ ខែកក្កដា ឆ្នាំ២០២១ថា ក្នុងរយៈពេល៦ខែ ឆ្នាំ២០២១នេះ ប្រទេសកម្ពុជាបានប្រឈមមុខនឹងគ្រោះថ្នាក់ធ្ងន់ធ្ងរបណ្ដាលមកពីការឆ្លងរីករាលដាលជំងឺកូវីដ-១៩ ជាកត្តារារាំងដល់កិច្ចប្រតិបត្តិការប្រយុទ្ធប្រឆាំងគ្រឿងញៀននៅក្នុងប្រទេស ដែលធ្វើឱ្យក្រុមឧក្រិដ្ឋជនមានឱកាសបង្កើនការផលិត និងអំណោយផលទីផ្សារប្រើប្រាស់គ្រឿងញៀន។
អង្គការសហប្រជាជាតិ កាលពីថ្ងៃទី១០ ខែមិថុនា ឆ្នាំ២០២១នេះដែរ បានចេញផ្សាយរបាយការណ៍វាយតម្លៃថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរណ៍ ផលិត និងចែកចាយគ្រឿងញៀន ហើយបើទោះបីជាមានការឆ្លងរីករាលដាលនៃជំងឺកូវីដ-១៩ក្តី ប៉ុន្តែការចរាចរ ផលិត និងចែកចាយគ្រឿងញៀន មិនមានការថយចុះឡើយ៕