រដ្ឋាភិបាល នឹងចាប់ផ្តើមយុទ្ធនាការចាក់វ៉ាក់សាំងកូវីដ-១៩ ដល់កុមារ និងយុវវ័យចាប់ពីអាយុ ១២ឆ្នាំ ដល់ក្រោម១៨ឆ្នាំ នៅរាជធានីភ្នំពេញ និងខេត្តចំនួន៣ ទៀត ចាប់ពីដើមខែសីហាទៅ ដើម្បីបង្កើនការទប់ស្កាត់ការឆ្លងរាលដាលនៃជំងឺកូវីដ-១៩។
សេចក្តីជូនព័ត៌មានរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេសនៃក្រសួងសុខាភិបាល នៅថ្ងៃទី២៧ ខែកក្កដានេះ បានលើកឡើងថា យុទ្ធនាការចាក់វ៉ាក់សាំងកូវីដ-១៩ ដូសទី១ ដល់កុមារ និងយុវវ័យនេះ នឹងចាប់ផ្តើមពីរាជធានីភ្នំពេញ ពីថ្ងៃទី១ ខែសីហា ឆ្នាំ២០២១ទៅ បន្ទាប់មកនឹងបន្តទៅខេត្តកណ្តាល ព្រះសីហនុ និងកោះកុង។
គណៈកម្មការនេះបន្តថា ចំពោះការចាក់វ៉ាក់សាំងដូសទី២ ជូនកុមារ និងយុវវ័យ ត្រូវមានគម្លាត ២១ថ្ងៃ បន្ទាប់ពីចាក់ដូសទី១រួច នៅតាមទីតាំងដែលបានចាក់កាលពីដូសទី១។
ចំពោះការចាក់វ៉ាក់សាំងកូវីដ-១៩ ជូនកុមារនិងយុវវ័យ នៅខេត្តកណ្តាល ព្រះសីហនុ និងកោះកុង នឹងរៀបចំដោយរដ្ឋបាលខេត្តទាំង៣នេះ ទៅតាមការកំណត់ទីតាំង និងកាលបរិច្ឆេតរបស់អាជ្ញាធរខេត្តនៅពេលខាងមុខ។
គណៈកម្មការចំពោះកិច្ចចាក់វ៉ាក់សាំងកូវីដ-១៩ ក៏បានអំពាវនាវដល់ប្រជាពលរដ្ឋ ដែលកំពុងរស់នៅរាជធានីភ្នំពេញ និងខេត្តទាំង៣ ចូលរួមដោយនាំកូនចៅ និងក្មួយៗរបស់ខ្លួនដែលជាកុមារ ឬយុវវ័យដែលមានអាយុ ១២ឆ្នាំដល់ក្រោម១៨ឆ្នាំ ទៅចាក់វ៉ាក់សាំងដោយស្ម័គ្រចិត្ត និងឥតគិតថ្លៃ នៅពេលដល់វេនរបស់ខ្លួន។
សម្រាប់តាមបណ្តាខេត្តផ្សេងៗ គណៈកម្មការនេះ បានស្នើពលរដ្ឋដែលមិនទាន់ដល់វេន រក្សាការអត់ធ្មត់ ដោយគណៈកម្មការនឹងបន្តយុទ្ធនាការនៅតាមបណ្តាខេត្តនានាក្នុងពេលឆាប់ៗខាងមុខ។
តាមរយៈការថ្លែងសារពិសេសកាលពីថ្ងៃទី១៦ ខែកក្កដា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ការចាក់វ៉ាក់សាំងជូនកុមារអាយុចាប់ពី ១២ឆ្នាំ ដល់ ១៧ឆ្នាំនេះ ជាចំណុចពិសេសមួយ ក្នុងការបើកដំណើរការសង្គមឡើងវិញ ជាពិសេសការបើកដំណើរការសាលារៀនឡើងវិញ ដែលយ៉ាងហោចណាស់ចាប់ពីថ្នាក់អនុវិទ្យាល័យឡើងទៅ។
លោកបានបញ្ជាក់ពីមូលហេតុថា៖ «ដោយមានការគិតគូរយ៉ាងម៉ត់ចត់ទៅលើបរិយាកាសភាពស៊ាំក្នុងសង្គម និងគិតគូរទៅដល់អនាគតរបស់កុមារ និងយុវជន ជាពិសេសផ្តោតការយកចិត្តទុកដាក់ទៅលើសុខុមាលភាព ពាក់ព័ន្ធការបើកឡើងវិញនូវសាលារៀន ដែលជាការបាត់បង់ដ៏ធំធេងរបស់ពិភពលោក ក៏ដូចជាកម្ពុជា ក្នុងការបណ្តុះបណ្តាលធនធានមនុស្ស ដែលសាលាត្រូវបានបិទក្នុងរយៈពេលយូរ។ ដូច្នេះពិតប្រាកដណាស់ យើងមានតម្រូវការចាក់វ៉ាក់សាំងសម្រាប់កុមារ និងយុវវ័យចាប់ពីអាយុ ១២ឆ្នាំ ដល់១៧ឆ្នាំ»។
លោកនាយករដ្ឋមន្ត្រី ហ៊ុន សែន បន្តទៀតថា តាមរយៈការពិភាក្សាជាមួយមន្ត្រីពាក់ព័ន្ធ រដ្ឋាភិបាល ត្រូវការវ៉ាក់សាំងចំនួន ៤លានដូស ឬជាង៤លានដូស ដើម្បីចាក់ជូនកុមារ និងយុវវ័យ ដែលមានអាយុចាប់ពី១២ឆ្នាំទៅ១៧ឆ្នាំ ដែលមានចំនួនប្រមាណ ១លាន៩សែននាក់៕
