ក្រសួងសុខាភិបាលបានរកឃើញករណីឆ្លងវីរុសកូវីដ-១៩បំប្លែងថ្មី B.1.617.2 ឬហៅថា ដែលតា (Delta) ចំនួន៣៩ករណីបន្ថែមទៀត ចាប់ពីថ្ងៃទី២២ ដល់ថ្ងៃទី២៥ ខែកក្កដា ឆ្នាំ២០២១ ខណៈមេរោគបំប្លែងថ្មីនេះឆ្លងលឿននិងបង្កគ្រោះថ្នាក់ដល់សុខភាពធ្ងន់ធ្ងរ។
យោងតាមសេចក្តីជូនព័ត៌មានរបស់ក្រសួងនៅថ្ងៃទី២៧ ខែកក្កដា ឆ្នាំ២០២១នេះ ឱ្យដឹងថា ករណីមេរោគកូវីដ-១៩ បំប្លែងថ្មី B.1.617.2 ឬហៅថា ដែលតា (Delta) ដែលរកឃើញនេះ រួមមាន ២១នាក់ជាអ្នកដំណើរមកពីប្រទេសថៃ, ៤នាក់ជាបុគ្គលិកសុខាភិបាល, ប្រជាពលរដ្ឋក្នុងសហគមន៍ដែលប៉ះពាល់ផ្ទាល់មានចំនួន៦នាក់ និងប្រជាពលរដ្ឋក្នុងសហគមន៍មិនប៉ះពាល់ផ្ទាល់ចំនួន៨នាក់ផងដែរ។
ក្រសួងបញ្ជាក់ថា គិតចាប់ពីថ្ងៃទី៣១ ខែមីនា ដល់ថ្ងៃទី២៥ ខែកក្កដា កម្ពុជារកឃើញអ្នកមានវិជ្ជមានមេរោគកូវីដ១៩ បំប្លែងថ្មី Delta ចំនួន១១៤នាក់ហើយ ក្នុងនោះមានស្ត្រី៥៩នាក់។
ទាក់ទិននឹងមេរោគបំប្លែងថ្មីនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានក្រើនរម្លឹកជាថ្មីទៀត និងអំពាវនាវដោយទទូចដល់ប្រជាពលរដ្ឋនៅទូទាំងប្រទេសកម្ពុជា បន្តប្រុងប្រយ័ត្នខ្ពស់ ចេះអនាម័យ និងការពារខ្លួនកុំឱ្យឆ្លងជំងឺកូវីដ-១៩ ដើម្បីកាត់ផ្តាច់នូវខ្សែចម្លងឱ្យមានប្រសិទ្ធភាពខ្ពស់។
លោកបានគូសបញ្ជាក់ថា៖ «រៀនរស់នៅធម្មតាជាមួយវីរុសកូវីដ-១៩តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ជាពិសេសពពួកប្រភេទបំប្លែងថ្មីនេះឬក៏ប្រភេទថ្មីផ្សេងទៀតដែលអាចកើតមានក្នុងព្រះរាជាណាចក្រកម្ពុជាយើងជាយថាហេតុណាមួយ និងត្រូវបន្តការអនុវត្តឱ្យបានខ្ជាប់ខ្ជួននូវវិធានការ “៣ការពារ និង៣កុំ”»។
លោក ម៉ម ប៊ុនហេង ក៏បានណែនាំទៅពលរដ្ឋទាំងអស់កុំទៅកាន់ទីតាំង «៣ ជ» រួមមាន កន្លែងមនុស្សជួបជុំអ៊ូអរច្រើន កន្លែងមនុស្សនៅជិតៗគ្នា និងកន្លែងដែលបិទជិត ដែលជាទីតាំងមានហានិភ័យឆ្លងខ្ពស់បំផុត ដូចជា ជួបជុំគ្នាដើម្បីទទួលទានបាយរួម ឬបង្កឱ្យមានការជួបជុំ ពិធីភ្ជាប់ពាក្យ ឬពិធីបុណ្យទានអ្វីមួយ និងកាត់បន្ថយការធ្វើដំណើរចល័ត ឬនៅផ្ទះប្រសិនមិនមានភារកិច្ចចាំបាច់ត្រូវចេញក្ រៅជាដើម។
អ្វីដែលគួរឱ្យកត់សម្គាល់ ក្រសួងសុខាភិបាលបានបង្ហាញការសង្កេតរបស់ខ្លួននៅថ្ងៃទី២៧ ខែកក្កដានេះដែរថា ការចម្លងវីរុសកូវីដ-១៩ បំប្លែងថ្មីនាបច្ចុប្បន្ននេះ មានសន្ទុះកើនឡើងលើយុវវ័យ ដោយពួកគេបានដើរចេញក្រៅផ្ទះច្រើន ឬមានការជួបជុំមិត្តភក្តិ។ ករណីនេះ យុវវ័យគ្រប់រូបត្រូវចូលរួមអនុវត្ត «៣ការពារ ៣កុំ» និងកុំទៅកាន់ទីតាំង «៣ ជ» ដើម្បីការពារបុគ្គលខ្លួនឯង កុំនាំវីរុសកូវីដមកចូលផ្ទះ និងដើម្បីការពារសមាជិកគ្រួសាររបស់ខ្លួន ជាពិសេសឪពុកម្តាយជីដូន ជីតាផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃចន្ទ ទី២៦ ខែកក្កដា ម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៧៣ ៧០១នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន៦៥ ៩៥០នាក់ អ្នកស្លាប់សរុប១ ៣០៥នាក់ និងករណីនាំចូលពីក្រៅប្រទេសសរុប៩ ១៥២នាក់៕