ក្រសួងសុខាភិបាលអនុញ្ញាតឱ្យគ្រឹះស្ថានឱសថអាចនាំចូលវ៉ាក់សាំងកូវីដ-១៩ដែលទទួលស្គាល់ដោយអង្គការសុខភាពពិភពលោក អាចចែកចាយចាក់តាមទីកន្លែងផ្តល់សេវាសុខាភិបាលឯកជនស្របច្បាប់បាន ដោយត្រូវគោរពស្តង់ដារបច្ចេកទេស។
ការអនុញ្ញាតនេះ ធ្វើឡើងតាមរយៈលិខិតមួយរបស់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ទៅកាន់ប្រធានគ្រឹះស្ថានអាហរ័ណ-នីហរ័ណឱសថ ចុះថ្ងៃទី២៧ ខែកក្កដា ឆ្នាំ២០២១នេះ។
លិខិតនោះបានលើកឡើងថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ក្រសួងសុខាភិបាលអនុញ្ញាតឱ្យគ្រឹះស្ថានអាហរ័ណ-នីហរ័ណឱសថ អាចស្នើសុំនាំចូលវ៉ាក់សាំងកូវីដ-១៩ដែលទទួលស្គាល់ដោយអង្គការសុខភាពពិភពលោក ដើម្បីចែកចាយចាក់តាមទីកន្លែងផ្តល់សេវាសុខាភិបាលឯកជនស្របច្បាប់ក្នុងក្របខណ្ឌទូទាំងប្រទេសបាន ប៉ុន្តែត្រូវប្រតិបត្តិឱ្យបានត្រឹមត្រូវតាមស្តង់ដារបច្ចេកទេសក្នុងការដឹកជញ្ជូន ការថែរក្សា និងការស្តុកវ៉ាក់សាំងកូវីដ-១៩នៅក្នុងឃ្លាំង ដើម្បីធានាបាននូវសុវត្ថិភាពនិងប្រសិទ្ធភាពខ្ពស់។
ទាក់ទងករណីនេះ លោក យ៉ង់ គិមអេង នាយកមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍និងសន្តិភាព មើលឃើញពីគុណសម្បត្តិនៃសេចក្តីសម្រេចរបស់ក្រសួងសុខាភិបាលនេះ ថាបានផ្តល់ជម្រើសច្រើនដល់ប្រជាពលរដ្ឋកម្ពុជា ក្នុងការចាក់វ៉ាក់សាំង។
ក៏ប៉ុន្តែបញ្ហាគុណវិបត្តិវិញ លោកបានលើកឡើងពីការព្រួយបារម្ភថា ការធ្វើបែបនេះ នឹងបង្កើតឱ្យមានអំពើពុករលួយក្នុងការទទួលបានសិទ្ធិនាំចូលវ៉ាក់សាំង ការគ្រប់គ្រងវ៉ាក់សាំង និងប្រសិទ្ធភាពនៃការប្រើប្រាស់វ៉ាក់សាំងជាដើម។ បន្ថែមពីនេះ លោកថា វាក៏នឹងបង្កើតឱ្យមានភាពរើសអើង រវាងអ្នកមាន និងអ្នកក្រផងដែរ។
លោកមានប្រសាសន៍ថា៖ «បើសិនជាក្រុមហ៊ុនឯកជនអាចនាំយកវ៉ាក់សាំងមកលក់នេះបាន ខ្ញុំបង្ហាញការព្រួយបារម្ភ៣សំខាន់ៗ ទី១.គឺអាចនាំឱ្យមានការលួចលក់វ៉ាក់សាំងរបស់រដ្ឋហ្នឹងទៅឱ្យពួកហ្វាម៉ាស៊ី ហើយរឿងទី២.ដែលខ្ញុំព្រួយបារម្ភដែរហ្នឹងគឺត្រង់ថា វ៉ាក់សាំងដែលនាំមកហ្នឹងទុកដាក់មិនបានស្រួល តាមស្តង់ដាគេហ្នឹង អាចធ្វើឱ្យវ៉ាក់សាំងហ្នឹងខូចគុណភាព ធ្វើឱ្យប៉ះពាល់ដល់សុខភាពប្រជាពលរដ្ឋនៅពេលចាក់ ហើយការព្រួយបារម្ភទី៣ គឺការត្រួតពិនិត្យគុណភាពដូចខ្ញុំបានលើកឡើងថា អ្នកខ្លះទៅគាត់មានខ្នង មានខ្សែ មានទុយោដែលអត់បានធ្វើការត្រួតពិនិត្យឱ្យបានដិតដល់ទៅដែលអាចនាំឱ្យកើតមានអំពើពុករលួយនៅក្នុងហ្នឹង»។
គិតចាប់តាំងពីថ្ងៃទី១០ ខែកុម្ភៈ ដល់ថ្ងៃទី២៦ ខែកក្កដា ឆ្នាំ២០២១នេះ ក្រសួងសុខាភិបាល បានចាក់វ៉ាក់សាំងដូសទី១ជូនដល់ពលរដ្ឋចំនួន ៦ ៨៣៩ ១០៩នាក់ហើយ ក្នុងចំណោមអ្នកស្ម័គ្រចិត្តទៅទទួលវ៉ាក់សាំងចំនួន ៦ ៩០៦ ២៣៦នាក់ ក្នុងនោះអ្នកដែលបានចាក់ដូសទី២ មានចំនួន ៤ ៥៤០ ៤៤៥នាក់។ ក្រសួងបន្តថា លទ្ធផលនៃការចាក់វ៉ាក់សាំងជូនពលរដ្ឋនេះ គឺបានជាង ៦៨ភាគរយហើយ ក្នុងគោលដៅនៃការចាក់ជូនពលរដ្ឋឱ្យបាន ១០លាននាក់៕