ក្រសួងធនធានទឹក និងឧតុនិយម អំពាវនាវឱ្យប្រជាពលរដ្ឋមានការប្រុងប្រយ័ត្នចំពោះស្ថានភាពទឹកទន្លេមេគង្គក្នុងរយៈពេលពី៣ទៅ៤ថ្ងៃខាងមុខ ដែលអាចជន់លិចដល់ខេត្តស្ទឹងត្រែង ក្រចេះ កំពង់ចាម និងត្បូងឃ្មុំ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយនៅថ្ងៃទី២៦ ខែកក្កដា បានបញ្ជាក់ថា ក្នុងរយៈពេលកន្លងមក កម្ពុជាបានទទួលរងព្យុះទី៧ ឈ្មោះ សេមប៉ាកា (CEMPAKA) និងបណ្តាឥទ្ធិពលនៃព្យុះផ្សេងៗទៀត ដែលធ្វើឱ្យមានឥទ្ធិពលមកលើអាងទន្លេមេគង្គ បណ្តាលឱ្យមានភ្លៀងធ្លាក់ក្នុងកម្រិតពីបង្គួរទៅច្រើន។
ក្រសួងដដែលបន្តថា ស្ថានភាពបែបនេះបានធ្វើឱ្យទឹកទន្លេមេគង្គហក់ឡើង ហើយនឹងបន្តឡើងក្នុងរយៈពេលពី៣ទៅ៤ថ្ងៃខាងមុខទៀត ដែលអាចបណ្តាលឱ្យជន់លិចតំបន់ទំនាបអមសងខាងមាត់ទន្លេមេគង្គលើ នៅខេត្តស្ទឹងត្រែង ក្រចេះ កំពង់ចាម និងខេត្តត្បូងឃ្មុំ។ តែក្រសួងថា ការហក់ឡើងនេះមិនទាន់ដល់កម្រិតកម្ពស់ដែលត្រូវឱ្យមានការប្រុងប្រយ័ត្ននៅឡើយនោះទេ។
ករណីនេះ ក្រសួងអំពាវនាវឱ្យអាជ្ញាធរដែនដីនិងប្រជាពលរដ្ឋដែលរស់នៅអមសងខាងទន្លេមេគង្គនិងតំបន់ទំនាបនានា រួសរាន់ប្រមូលកសិផលឱ្យទាន់ពេល និងបង្កើនការប្រុងប្រយ័ត្នខ្ពស់៕