ក្រសួងប្រៃសណីយ៍ និងទូរគមនាគមន៍ ណែនាំដល់ក្រុមហ៊ុនផ្ដល់សេវាទូរសព្ទទាំងអស់ត្រូវលុបបំបាត់ការហៅចូលលេខរបស់អ្នកប្រើប្រាស់ ដើម្បីផ្សព្វផ្សាយពាណិជ្ជកម្មអំពីសេវាកម្មបន្ថែម និងបញ្ឈប់បន្ទាន់រាល់ការប្រើលេខកូដទូរគមនាគមន៍ទាំងឡាយដែលគ្មានការអនុញ្ញាតពីក្រសួង។
សេចក្តីជូនដំណឹងរបស់ក្រសួងចេញថ្ងៃទី២៦ ខែកក្កដា ឱ្យដឹងថា កន្លងមក និយ័តករទូរគមនាគមន៍កម្ពុជាបានរកឃើញប្រតិបត្តិករផ្តល់សេវាទូរសព្ទចល័តមួយចំនួនហៅចូលទៅកាន់អ្នកប្រើប្រាស់ ដើម្បីផ្សព្វផ្សាយពាណិជ្ជកម្មអំពីសេវាបន្ថែម (VAS) របស់ខ្លួន ដោយអ្នកប្រើប្រាស់មិនបានចុះឈ្មោះប្រើប្រាស់ជាមុន។ ក្រសួងចាត់ទុកថា សកម្មភាពនេះបានរំខានដល់ជីវភាពប្រចាំថ្ងៃ ផ្ទុយពីឆន្ទៈរបស់អ្នកប្រើប្រាស់។
និយ័តករទូរគមនាគមន៍កម្ពុជា រកឃើញផងដែរថា ក្រុមហ៊ុនផ្ដល់សេវាទូរសព្ទមួយចំនួនបានប្រើប្រាស់លេខកូដខ្លីឬលេខផ្សេងៗគ្នាជាច្រើនក្នុងការហៅទៅផ្សព្វផ្សាយពាណិជ្ជកម្មអំពីសេវាកម្មរបស់ខ្លួនទៅកាន់លេខអ្នកប្រើប្រាស់ ហើយលេខទាំងនោះមិនដែលបានសុំការអនុញ្ញាតប្រើប្រាស់ពីនិយតករទូរគមនាគមន៍កម្ពុជាឡើយ។
ក្រសួងគូសបញ្ជាក់ថា៖ «ក្រុមហ៊ុនផ្តល់សេវាទូរសព្ទចល័តទាំងអស់បញ្ឈប់រាល់ការរំខានដល់អ្នកប្រើប្រាស់តាមការហៅចូលលេខទូរសព្ទចល័តជាបន្ទាន់ ព្រោះសេវាហៅចូលនេះពុំមានការចុះឈ្មោះប្រើប្រាស់ជាមុនដោយអ្នកប្រើប្រាស់ឡើយ។ បញ្ឈប់ជាបន្ទាន់រាល់ការប្រើប្រាស់លេខកូដទូរគមនាគមន៍ទាំងឡាយណាដែលគ្មានការអនុញ្ញាតពីនិយ័តករទូរគមនាគមន៍កម្ពុជា។»
ក្នុងករណីប្រតិបត្តិករផ្តល់សេវាទូរសព្ទចល័តពុំអនុវត្តតាមការណែនាំនេះទេ ក្រសួងថា នឹងចាត់វិធានការម៉ឺងម៉ាត់ដោយណែនាំឱ្យនិយ័តករទូរគមនាគមន៍កម្ពុជាបង្កករាល់ការស្នើសុំនានារបស់ប្រតិបត្តិករទាំងនោះ ព្រមទាំងចាត់វិធានការស្របតាមមាត្រា៦៩ និងមាត្រា៧៨ នៃច្បាប់ស្តីពីទូរគមនាគមន៍៕
