តុលាការសាលាដំបូងរាជធានីភ្នំពេញ ផ្ដន្ទាទោសអតីតមន្ត្រីគណបក្សសង្រ្គោះជាតិម្នាក់ឱ្យជាប់ពន្ធនាគារ១ឆ្នាំ៦ខែ បន្ទាប់ពីលោកចូលរួមតវ៉ាទាមទារឱ្យដោះលែងមេដឹកនាំសហភាពសហជីពកម្ពុជា លោក រ៉ុង ឈុន និងការផ្តល់បទសម្ភាសន៍ជាមួយអ្នកសារព័ត៌មានអំពីបញ្ហាព្រំដែន។
ក្នុងបន្ទប់សវនាការ ចៅក្រមជំនុំជម្រះសាលាដំបូងរាជធានីភ្នំពេញ លោក ហុក ពៅ នៅថ្ងៃពុធនេះ បានប្រកាសសាលក្រម ផ្ដន្ទាទោសអតីតសមាជិកក្រុមប្រឹក្សាខណ្ឌដូនពេញបក្សប្រឆាំង លោក ប៉ែន ច័ន្ទសង្គ្រាម ឱ្យជាប់ពន្ធនាគារ១ឆ្នាំកន្លះ និងពិន័យប្រាក់ចូលរដ្ឋចំនួន៣លានរៀល ក្រោមបទចោទប្រកាន់«ញុះញង់ឱ្យប្រព្រឹត្តបទឧក្រិដ្ឋជាអាទិ៍»។
លោក ប៉ែន ច័ន្ទសង្គ្រាម ប្រាប់អ្នកសារព័ត៌មានក្រៅបន្ទប់សវនាការ បន្ទាប់ពីមន្ត្រីនាំលោកទៅកាន់ពន្ធនាគារ ថាការសម្រេចរបស់តុលាការសាលាដំបូង ជារឿងអយុត្តិធម៌ ហើយលោកនឹងប្តឹងជំទាស់ទៅតុលាការជាន់ខ្ពស់បន្តទៀត ។
វីអូឌី មិនអាចសុំការបញ្ជាក់បន្ថែមពីលោក សំ សុគង់ មេធាវីការពារក្តីឱ្យលោក ប៉ែន ច័ន្ទសង្គ្រាម បានទេ នៅថ្ងៃនេះ។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព កត់សម្គាល់ថា ប៉ុន្មានឆ្នាំចុងក្រោយនេះ បទល្មើស «ញុះញង់ និង រួមគំនិតក្បត់» ត្រូវបានអាជ្ញាធរយកមកប្រើ ដើម្បីប្រឆាំងនឹងសកម្មជននយោបាយនិងសកម្មជនសិទ្ធិមនុស្ស រួមទាំងយុវជនបរិស្ថាន ដែលតវ៉ាដោយសន្តិវិធី និងធានាដោយច្បាប់ជាតិនិងអន្តរជាតិ។
លោកស្រីបន្តថា រដ្ឋាភិបាលមានកាតព្វកិច្ចក្នុងការធានាលំហសេរីភាពសម្រាប់ពលរដ្ឋគ្រប់រូប ដោយមិនមានការរើសអើងឬដៅមុខសញ្ញាដល់បុគ្គលណាម្នាក់ នៅពេលដែលពួកគេជួបជុំបញ្ចេញមតិបង្ហាញកង្វល់នានាពាក់ព័ន្ធនឹងបញ្ហាសង្គម។ លោកស្រីថា ការបញ្ចេញមតិដោយសន្តិវិធី មិនគួរចាត់ចូលជាបទល្មើសឡើយ។
លោកស្រី ចក់ សុភាព ថ្លែងថា៖ «ទាំងនេះវាបង្ហាញនូវបរិបទជាលក្ខណៈរឹតបន្តឹង ឬជាការបង្ក្រាបទៅលើរាល់មតិរិះគន់ ឬការទាមទាររបស់ពលរដ្ឋដែលសកម្មនៅក្នុងជីវភាពសង្គម សេដ្ឋកិច្ច ឬនយោបាយ ជាដើម។ ដូចខ្ញុំបានគូសបញ្ជាក់ សិទ្ធិទាំងអស់នេះគឺត្រូវបានធានាការពារដោយច្បាប់ជាតិនិងអន្តរជាតិ ដែលរដ្ឋាភិបាលមានកាតព្វកិច្ចត្រូវធានាដល់ការគោរពនូវវិធានបទដ្ឋានសិទ្ធិមនុស្សអន្តរជាតិ ហើយត្រូវការពាររាល់មានការគំរាមកំហែងដល់ពលរដ្ឋដែរ មិនមែនត្រូវប្រើប្រាស់ប្រព័ន្ធច្បាប់ឬតុលាការដើម្បីបំបិទសិទ្ធិនោះទេ»។
លោក ប៉ែន ច័ន្ទសង្គ្រាម ត្រូវបានតុលាការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីលោកចូលរួមតវ៉ាទាមទារឱ្យដោះលែងមេដឹកនាំសហជីព លោក រ៉ុង ឈុន និងបានសម្ភាសជាមួយអ្នកសារព័ត៌មានអំពីបញ្ហាព្រំដែនកម្ពុជា-វៀតណាម និងបញ្ហាសង្គមមួយចំនួនទៀត កាលពីអំឡុងខែសីហា ឆ្នាំ២០២០ នៅមុខផ្សារស៊ីធីម៉ល (City Mall) ស្ថិតនៅជិតសាលាដំបូងរាជធានីភ្នំពេញ៕
