មនុស្សជំនិតនឹងលោក កឹម សុខា និយាយថា ខ្លួនមិនជឿលើព័ត៌មានដែលថាកូនស្រីច្បងរបស់មេដឹកនាំអតីតបក្សប្រឆាំងមួយនេះមានគម្រោងទៅបង្កើតគណបក្សថ្មីនោះទេ ហើយថា ការលើកឡើងនេះជាការញុះញង់ដើម្បីបំបែកបំបាក់ផ្ទៃក្នុងនិងកេងចំណេញខាងនយោបាយ។
នៅថ្ងៃពុធនេះ សារព័ត៌មានមួយចំនួនបានស្រង់ប្រសាសន៍អតីតមេធាវីការពារក្តីឱ្យអតីតប្រធានគណបក្សសង្គ្រោះជាតិ លោក កឹម សុខា គឺលោកមេធាវី ផាន់ ច័ន្ទសាក់ មកចុះផ្សាយថា កញ្ញា កឹម មនោវិទ្យា ដែលជាកូនស្រីច្បងរបស់លោក កឹម សុខា គ្រោងនឹងបង្កើតគណបក្សថ្មីនៅចុងឆ្នាំ២០២១នេះ ដើម្បីចូលរួមប្រកួតការបោះឆ្នោតខាងមុខ។
មេធាវីរូបនេះអះអាងទៀតថា ដើម្បីបានសិទ្ធិធ្វើនយោបាយឡើងវិញ កញ្ញា កឹម មនោវិទ្យា នឹងធ្វើលិខិតសុំទោសលោកនាយករដ្ឋមន្ត្រី ហ៊ុន សែន ការដែលខ្លួនបានចេញទៅក្រៅប្រទេស ធ្វើនយោបាយការទូតប្រឆាំងនឹងសាលដីការំលាយគណបក្សសង្គ្រោះជាតិ កាលពីឆ្នាំ២០១៧។
វីអូឌី មិនអាចសុំការអត្ថាធិប្បាយជុំវិញករណីនេះពីកញ្ញា កឹម មនោវិទ្យា បានទេ នៅថ្ងៃនេះ។
ប៉ុន្តែអតីតមន្ត្រីជាន់ខ្ពស់មួយរូប និងជាមនុស្សជំនិតនឹងលោក កឹម សុខា គឺលោក មាជ សុវណ្ណារ៉ា បានច្រានចោលការអះអាងរបស់មេធាវីរូបនេះ។
លោក មាជ សុវណ្ណារ៉ា បានគូសបញ្ជាក់ថា លោក កឹម សុខា គ្មានបំណងឱ្យកូនរបស់គាត់ស្នងត្រកូលក្នុងជីវិតនយោបាយ អំឡុងលោកមិនទាន់បោះបង់សិទ្ធិធ្វើនយោបាយនោះទេ។
លោកថា៖ «លោកប្រធាន កឹម សុខា លោកដាច់ខាតហើយ គាត់មិនឱ្យកូនគាត់ប្រឡូកក្នុងពេលដែលគាត់មានវត្តមានជាអ្នកនយោបាយ ព្រោះគាត់មិនចង់ថាឱ្យមានតកូនតចៅអីបន្តជាពូជត្រកូលនយោបាយ។ នេះបើតាមការអះអាងរបស់គាត់ [លោក កឹម សុខា] ថ្មីៗនេះ ជាមួយខ្ញុំ។ ហើយខ្ញុំក៏មិនជឿថា មនោវិទ្យា ក៏ដូចលោក សុខា គាត់ឱ្យកូនហ្នឹងបើកគណបក្សបក្សដែរ ខ្ញុំមិនជឿទេ! អាហ្នឹងជាពាក្យញុះញង់ដើម្បីបំបែកទេ»។
លោក ផាន់ ច័ន្ទសាក់ ជាអតីតមន្ត្រីនៅក្នុងគណៈកម្មាធិការនាយករបស់អតីតគណបក្សសង្គ្រោះជាតិ ដែលបានជាប់បម្រាមហាមធ្វើនយោបាយជាមួយអតីតមន្ត្រីជាន់ខ្ពស់១១៨រូបផ្សេងទៀតចាប់តាំងពីចុងឆ្នាំ២០១៧មក ប៉ុន្តែលោកត្រូវបានរដ្ឋាភិបាលយល់ព្រមឱ្យធ្វើនយោបាយឡើងវិញកាលពីពេលថ្មីៗនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកករណីនេះថា ជាបញ្ហាផ្ទៃក្នុងរបស់គណបក្សដែលតុលាការបានរំលាយ មិនជាប់ពាក់ព័ន្ធនឹងគណបក្សកាន់អំណាចទេ។
លោកថា៖ «អាហ្នឹងរឿងផ្ទៃក្នុងគាត់ទេៗ ខ្ញុំគ្មានមតិអីទេ! បើសិនណាកញ្ញា [កឹម មនោវិទ្យា] គាត់ចង់ដាក់ ហើយអ្នកណារារាំង ក៏រារាំងមិនបានដែរ ព្រោះអាហ្នឹងវាជាការសម្រេចរបស់សាម៉ីជនម្នាក់ៗ។ តែបើគាត់មិនចង់ដាក់ អ្នកណាទៅញុះញង់អី ក៏គាត់មិនដាក់ដែរ អាហ្នឹងក៏រឿងរបស់គាត់ដែរ»។
អ្នកនាំពាក្យរូបនេះបញ្ជាក់ថា ការសុំសិទ្ធិធ្វើនយោបាយឡើងវិញជាសិទ្ធិរបស់បុគ្គលម្នាក់ៗតបតាមច្បាប់ដែលមានស្រាប់ និងមានការយល់ព្រមពីក្រសួងមហាផ្ទៃ លើកលែងតែអ្នកនោះនៅជាប់បណ្តឹងនៅតុលាការ។
គិតត្រឹមថ្ងៃពុធនេះ អតីតមន្ត្រីគណបក្សសង្គ្រោះជាតិជាង២០នាក់ហើយបានចេញសុំសិទ្ធិធ្វើនយោបាយឡើងវិញ ហើយបច្ចុប្បន្ន អ្នកដែលបានសម្រេចដើរចេញពីគណបក្សនេះ ទៅបង្កើតគណបក្សថ្មីសម្រាប់ត្រៀមខ្លួនប្រកួតការបោះឆ្នោតនៅពេលខាងមុខ គឺមានចំនួន៦គណបក្សហើយ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា អតីតគណបក្សប្រឆាំងដែលតុលាការបានរំលាយ បានបែកបាក់ផ្ទៃក្នុងយូរណាស់មកហើយ។ តែលោកគិតថា កូនស្រីរបស់លោក កឹម សុខា នឹងមិនចេញមកបង្កើតបក្សថ្មី ទទួលយកសាលដីកាតុលាការកំពូលដែលផ្តន្ទាទោសឪពុករបស់ខ្លួន ដូចការលើកឡើងនោះទេ។
លោកថា៖ «ទី១ យើងមើលហេតុផល លោក កឹម សុខា ហ្នឹងគាត់ជាប់នៅពន្ធនាគារ [ស្ថិតក្រោមការត្រួតពិនិត្យរបស់តុលាការ] ហើយកូនស្រីខ្លួនឯងហ្នឹង រឿងអីមកប្រកួតប្រជែងជាមួយឪយកការគាំទ្រខ្លួនឯងក្នុងគណបក្សប្រឆាំង អ៊ីចឹងវាមិនអាចទៅរួចទេ! កាលណាធ្វើអ៊ីចឹង វាហាក់ដូចទម្លាក់អាការប្រព្រឹត្តកន្លងមកដែលគណបក្សកាន់អំណាចចោទហ្នឹងគឺត្រឹមត្រូវ! កូនចោទទៅឪ ដូចមិនទំនងទេ ទស្សនៈខ្ញុំ»។
គណបក្សសង្រោះជាតិ ត្រូវបានតុលាការកំពូលចេញសាលដីការំលាយតាមបណ្តឹងរបស់រដ្ឋាភិបាលកាលពីចុងឆ្នាំ២០១៧ ក្រោយពីគណបក្សនេះទទួលបានសំឡេងគាំទ្រទាំងនៅក្នុងរដ្ឋសភានិងឃុំសង្កាត់ជិតស្មើគណបក្សកាន់អំណាច។
តែយ៉ាងណា វិធានការនេះត្រូវបានសហគមន៍អន្តរជាតិរិះគន់ថា របត់នយោបាយនៅកម្ពុជាបានដើរចេញពីគន្លងប្រជាធិបតេយ្យ និងជំរុញឱ្យគណបក្សនេះបានចូលរួមការបោះឆ្នោតដោយសេរី ត្រឹមត្រូវ និងយុត្តិធម៌ឡើងវិញនៅពេលខាងមុខ៕