សមត្ថកិច្ចខេត្តកំពត កំពុងតាមរកចាប់ខ្លួនម្ចាស់សិប្បកម្មផលិតស្រាមួយកន្លែង ក្រោយពីមានមនុស្សយ៉ាងហោចណាស់៤នាក់បានស្លាប់ដោយសារពុលស្រាសដែលទិញមកពីសិប្បកម្មនោះ។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ មានប្រសាសន៍នៅថ្ងៃទី២៨ ខែកក្កដានេះថា យ៉ាងហោចណាស់ ប្រជាពលរដ្ឋចំនួន៤នាក់ស្លាប់ ដោយសង្ស័យថាបណ្តាលមកពីពុលស្រាស ក្រោយពីពួកគាត់បានទទួលទានស្រាសនៅក្នុងអំឡុងពេលកំដរបុណ្យសពអ្នកភូមិ ស្ថិតនៅភូមិក្រសាំងមានជ័យ ឃុំដូនយ៉យ ស្រុកឈូក ខេត្តកំពត កាលពីថ្ងៃទី២៥ ខែកក្កដា ឆ្នាំ២០២១។
លោកបន្តថា ក្រោយកើតហេតុ សមត្ថកិច្ចបានចុះទៅទីតាំងដែលផលិតស្រាសនោះ ប៉ុន្តែម្ចាស់សិប្បកម្មផលិតស្រាបានរត់គេចខ្លួនបាត់។ លោកថា បច្ចុប្បន្ន សមត្ថកិច្ចជំនាញកំពុងស្រាវជ្រាវតាមរកចាប់ខ្លួនម្ចាស់សិប្បកម្មនោះ ដើម្បីយកទៅផ្តន្ទាទោសតាមច្បាប់។
លោកមានប្រសាសន៍ថា៖ «បើអ្នកដែលគាត់ផលិតនេះ នឹងប្រឈមមុខចំពោះផ្លូវច្បាប់ ព្រោះស្រានេះគឺគាត់ធ្វើខុសបច្ចេកទេស។ យើងចូលរួមសហការជាមួយនឹងខាងកាំកុងត្រូល ពិនិត្យទៅ វាមានជាតិមេតាណុលខ្ពស់ ដែលបណ្តាលឱ្យពុល»។
ចំណែកប្រធានមន្ទីរសុខាភិបាលខេត្តកំពត លោក ញា ប៊ុនថន បានអំពាវនាវដល់ប្រជាពលរដ្ឋបញ្ឈប់ការទទួលទានស្រាសដែលផលិតគ្មានបច្ចេកទេសត្រឹមត្រូវនេះ ដើម្បីចៀសវាងមានគ្រោះថ្នាក់ដល់អាយុជីវិត។
លោកថា៖ «ស្រាដែលគ្មានប្រភពច្បាស់លាស់ ស្រាសដែលបិទលួចលាក់តាមភូមិ តាមស្រុក វាមិនល្អទេ! វាប៉ះពាល់សុខភាពហើយ! ប្រុងប្រយ័ត្ន! គឺកុំពិសាស្រាសដែលផលិតគ្មានច្បាប់ គ្មានទម្លាប់ទៅ ឱ្យគាត់ថែរក្សាសុខភាព ព្រោះអ្នកដែលផឹកស្រា មិនមែនដើម្បីសុខភាពឯណា ផឹកទៅស្លាប់ខ្លួនអីចឹង។ […] មើលម៉េចដឹង! សូម្បីតែខ្ញុំក៏មើលមិនដឹងថា ស្រាសនោះសុទ្ធឬមិនសុទ្ធដែរ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា មួយរយៈចុងក្រោយនេះ ករណីពុលស្រាស ស្រាថ្នាំ ជាសោកនាដកម្មមួយដែលធ្វើឱ្យប្រជាពលរដ្ឋបាត់បង់ជីវិត និងប៉ះពាល់សុខភាពជាបន្តបន្ទាប់។
លោកបន្តថា ការណែនាំបិទអាជីវកម្ម និងអប់រំពលរដ្ឋកុំឱ្យពិសាស្រាស គ្រាន់តែជាផ្នែកមួយតូច មិនសូវមានប្រសិទ្ធភាពនោះទេ។ ករណីនេះ លោកស្នើទៅរដ្ឋាភិបាលពន្លឿនការបង្កើតច្បាប់គ្រប់គ្រងគ្រឿងស្រវឹង ដើម្បីយកទៅអនុវត្តលើម្ចាស់សិប្បកម្មបិទស្រាសឬផលិតស្រាខុសបច្ចេកទេស នោះទើបអាចទប់ស្កាត់បញ្ហាប្រឈមទាំងនោះបាន។
លោកមានប្រសាសន៍ថា៖ «អនុវត្តច្បាប់ស្តីពីការគ្រប់គ្រងផលិតផលគ្រឿងស្រវឹងឱ្យបានឆាប់ ដើម្បីឱ្យអាជ្ញាធរខេត្តឬក៏ថ្នាក់មូលដ្ឋានអាចយកទៅប្រើប្រាស់នៅក្នុងការបង្ការ ទប់ស្កាត់ ដើម្បីកុំឱ្យមានករណីបែបហ្នឹងកើតឡើង។ ហើយទី២ ជាវិធានការបណ្តោះអាសន្ន មានសេចក្តីណែនាំជារួមមួយដែលយើងអាចដកស្រង់ពីមន្ទីរពិសោធន៍ដែលកើតឡើងកន្លងមកនៅតាមបណ្តាខេត្តផ្សេងៗពាក់ព័ន្ធនឹងពុលស្រា ដើម្បីបង្ការហានិភ័យហ្នឹងវាកើតឡើងនៅក្នុងកន្លែងដដែលឬក៏នៅកន្លែងផ្សេងៗទៀត»។
បើតាមសមត្ថកិច្ចខេត្តកំពត តាំងពីថ្ងៃទី២១ ដល់ថ្ងៃទី២៥ ខែឧសភា ឆ្នាំ២០២១ សមត្ថកិច្ចបានឃាត់ខ្លួនម្ចាស់សិប្បកម្មផលិតស្រាស ចំនួន២នាក់ បញ្ជូនទៅតុលាការ ក្រោយពីមានពលរដ្ឋចំនួន១០នាក់បានស្លាប់ និងជិត៦០នាក់ទៀតត្រូវបានបញ្ជូនទៅព្យាបាលនៅមន្ទីរពេទ្យ ដោយសារពុលស្រាសក្នុងកម្មវិធីបុណ្យសពមួយកន្លែងស្ថិតនៅភូមិធ្នង់ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត។
ក្រោយមក នៅដើមខែកក្កដា ឆ្នាំ២០២១នេះដែរ នៅភូមិកោះឈ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត ក៏មានករណីពលរដ្ឋចំនួន៤នាក់បានស្លាប់ និង១២នាក់ផ្សេងទៀតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ដោយសារតែពុលស្រាសនេះផងដែរ៕