ក្រសួងមហាផ្ទៃ បានប្រកាសពន្យារពេលការរៀបចំវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាថ្នាក់ក្រោមជាតិ ក្រោយមានការរីករាលដាលជំងឺកូវីដ-១៩ខ្លាំង ស្របពេលក្រសួងសុខាភិបាលរកឃើញប្រភេទវីរុសកូវីដ-១៩បំប្លែងខ្លួនថ្មី ដែលតា (Delta) ឆ្លងចូលសហគមន៍កាន់តែគួរឱ្យបារម្ភផងដែរ។
ការសម្រេចនេះ ធ្វើឡើងតាមរយៈលិខិតមួយរបស់ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ លោក ស ខេង ទៅកាន់គណៈអភិបាលរាជធានី-ខេត្ត ក្រុង-ស្រុក-ខណ្ឌ ចុះកាលពីថ្ងៃទី២៧ ខែកក្កដា ឆ្នាំ២០២១នេះ។
លិខិតនោះបានលើកឡើងថា ដើម្បីបន្តចូលរួមទប់ស្កាត់ការរីករាលដាលនៃជំងឺកូវីដ-១៩នេះ ក្រសួងណែនាំដល់រដ្ឋបាលរាជធានី-ខេត្ត ក្រុង-ស្រុក-ខណ្ឌ ឱ្យពន្យារពេលក្នុងការរៀបចំវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាថ្នាក់ក្រោមជាតិ រហូតដល់មានដំណឹងជូនជាថ្មីម្ដងទៀត។
គួរបញ្ជាក់ផងដែរថា វេទិកាពិគ្រោះយោបល់របស់ក្រុមប្រឹក្សាថ្នាក់ក្រោមជាតិ ធ្វើឡើងដើម្បីលើកកម្ពស់គណនេយ្យភាព តម្លាភាព និងការចូលរួមរបស់ប្រជាពលរដ្ឋទាំងបុរសនិងស្រី្ដ ក្នុងកិច្ចដំណើរការរបស់ក្រុមប្រឹក្សានៃរដ្ឋបាលថ្នាក់ក្រោមជាតិ ដែលក្នុងនោះមានរាជធានី ខេត្ត ក្រុង ស្រុក និងខណ្ឌ។
យោងតាមសេចក្ដីជូនព័ត៌មានរបស់ក្រសួងសុខាភិបាល កាលពីថ្ងៃទី២៧ ខែកក្កដា ឆ្នាំ២០២១នេះ ឱ្យដឹងថា ករណីមេរោគកូវីដ-១៩បំប្លែងថ្មី B.1.617.2 ឬហៅថា ដែលតា (Delta) ដែលរកឃើញលើពលរដ្ឋ រួមមាន ២១នាក់ជាអ្នកដំណើរមកពីប្រទេសថៃ ៤នាក់ជាបុគ្គលិកសុខាភិបាល ប្រជាពលរដ្ឋក្នុងសហគមន៍ដែលបានប៉ះពាល់មានចំនួន៦នាក់ និងប្រជាពលរដ្ឋក្នុងសហគមន៍មិនប៉ះពាល់ផ្ទាល់ចំនួន៨នាក់ផងដែរ៕
