ក្រសួងសុខាភិបាល អនុញ្ញាតឱ្យរដ្ឋបាលខេត្តចំនួន២២ ប្រើប្រាស់នីតិវិធីប្រតិបត្តិស្ដង់ដារសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩កម្រិតស្រាលនិងគ្មានរោគសញ្ញា នៅតាមផ្ទះ។
យោងតាមប្រកាសរបស់ក្រសួងសុខាភិបាល ចុះថ្ងៃទី២៩ ខែកក្កដា ឆ្នាំ២០២១ បានសម្រេចឱ្យប្រើប្រាស់នីតិវិធីប្រតិបត្តិស្ដង់ដារសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩កម្រិតស្រាលនិងគ្មានរោគសញ្ញានៅតាមផ្ទះ ក្នុងភូមិសាស្រ្តខេត្តចំនួន២២ រួមមាន ខេត្តបាត់ដំបង ប៉ៃលិន ពោធិសាត់ កំពង់ឆ្នាំង កោះកុង ព្រះសីហនុ កំពត កែប តាកែវ កំពង់ស្ពឺ សៀមរាប ឧត្ដរមានជ័យ ព្រះវិហារ កំពង់ធំ កំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី មណ្ឌលគិរី ព្រៃវែង និងស្វាយរៀង។
ប្រកាសរបស់ក្រសួងបញ្ជាក់ថា៖ «អភិបាលនៃគណៈអភិបាលខេត្ត ត្រូវពិនិត្យនិងរៀបចំលក្ខណៈសម្បត្តិនិងពេលវេលាសមស្រប ដើម្បីដាក់ឱ្យដំណើរការព្យាបាលអ្នកជំងឺកូវីដ-១៩មានកម្រិតស្រាលនិងគ្មានរោគសញ្ញានៅផ្ទះ ក្នុងភូមិសាស្រ្តខេត្តនីមួយៗ»។
បើតាមប្រកាសរបស់ក្រសួង ការអនុវត្តនីតិវិធីនេះនឹងត្រូវអនុវត្តចាប់ពីថ្ងៃទី២៩ ខែកក្កដា ឆ្នាំ២០២១នេះតទៅ។
កាលពីថ្ងៃទី២០ ខែមិថុនា ឆ្នាំ២០២១ ក្រសួងសុខាភិបាលក៏បានដាក់ចេញគោលការណ៍ដូចគ្នា ដោយសម្រេចឱ្យអ្នកជំងឺកូវីដ-១៩កម្រិតស្រាលឬគ្មានរោគសញ្ញា ក្នុងរាជធានីភ្នំពេញ ព្យាបាលដាច់ដោយឡែកនៅផ្ទះដោយខ្លួនឯង ក្រោមការផ្តល់ប្រឹក្សាពីគ្រូពេទ្យនិងគ្រប់គ្រងពីអាជ្ញាធរមូលដ្ឋានតាមនីតិវិធីប្រតិបត្តិស្តង់ដារថ្មី។
បើតាមមន្ត្រីសុខភិបាល វិធានការនេះធ្វើឡើងដើម្បីជួយសម្រាលបន្ទុករបស់ក្រុមគ្រូពេទ្យនិងថវិកាចំណាយរបស់រដ្ឋ ស្របពេលស្ថានភាពរីករាលដាលនៃជំងឺផ្លូវដង្ហើមថ្មីមួយនេះមិនមានសញ្ញាថមថយ៕
