ប្រទេសស៊ុយអែត និងស្វីស បានផ្តល់ថវិកាជាង៤លានដុល្លារគាំទ្រដល់អង្គការ BBC Media Action ដើម្បីអនុវត្តគម្រោង “ការលើកកម្ពស់ការចូលរួមរបស់យុវជននៅក្នុងសហគមន៍-ក្លាហាន៩ SPACE”។
យោងតាមសេចក្តីប្រកាសព័ត៌មានរបស់ស្ថានទូតស៊ុយអែតប្រចាំនៅកម្ពុជា ចុះថ្ងៃទី២៧ ខែកក្កដា ឆ្នាំ២០២១ បញ្ជាក់ថា ក្នុងចំណោមថវិកាចំនួន៤,៥លានដុល្លារនេះ គឺថវិកាប្រមាណ២លានដុល្លារផ្តល់ដោយប្រទេសស៊ុយអែត ខណៈ២,៥លានដុល្លារទៀតផ្តល់ដោយទីភ្នាក់ងារអភិវឌ្ឍន៍អន្តរជាតិរបស់ប្រទេសស្វីស។
ប្រភពដដែលបន្ថែមថា គម្រោងនេះមានគោលបំណងបង្កើនកម្រិតនៃការចូលរួមបែបស្ថាបនានៅក្នុងសហគមន៍ក្នុងចំណោមយុវជនកម្ពុជា តាមរយៈការផ្តល់ឱ្យពួកគេមានចំណេះដឹង ជំនាញ ទំនុកចិត្ត និងលើកទឹកចិត្តចំពោះបណ្តាញនានា ក្រោមឈ្មោះថា “ក្លាហាន៩ SPACE” ដែលត្រូវអនុវត្តចាប់ពីឆ្នាំ២០២១ ដល់ឆ្នាំ២០២៤។
លោក សាម៊ូអែល ហឺទិក ប្រធានកិច្ចសហប្រតិបត្តិការអភិវឌ្ឍន៍អន្តរជាតិរបស់ប្រទេសស៊ុយអែតប្រចាំនៅកម្ពុជា បានបង្ហាញក្តីរីករាយក្នុងការចាប់ដៃគូជាមួយអង្គការ BBC Media Action ដើម្បីប្រើប្រាស់ប្រព័ន្ធផ្សព្វផ្សាយក្នុងការលើកទឹកចិត្តនិងគាំទ្រយុវជនកម្ពុជាឱ្យចូលរួមក្នុងកិច្ចការសាធារណៈ និងផ្តល់ការគាំទ្រដល់សកម្មភាពសហគមន៍សម្រាប់យុវជននៅតាមបណ្តាខេត្ត។
លោកបញ្ជាក់ថា៖ «ការគាំទ្រនេះស្របតាមកិច្ចសហប្រតិបត្តិការអភិវឌ្ឍន៍អន្តរជាតិរបស់ប្រទេសស៊ុយអែតជាមួយកម្ពុជា ផ្តោតលើសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ»។
ដោយឡែក លោកស្រី ជេមម៉ា ហេយម៉េន នាយកប្រចាំប្រទេសកម្ពុជានៃអង្គការ BBC Media Action មានប្រសាសន៍ថា ជំនួយនេះជាឱកាសក្នុងការកសាងលើភាពជោគជ័យសម្រាប់ការងារអភិវឌ្ឍន៍យុវជន។
លោកស្រីបញ្ជាក់ថា៖ «គម្រោងនេះនឹងគាំទ្រដល់យុវជនដែលមានអាយុចន្លោះ ១៥-៣០ឆ្នាំ ដើម្បីចូលរួមក្នុងជីវិតសាធារណៈនៅក្នុងសហគមន៍ តាមរយៈការកសាងចំណេះដឹង និងជំនាញ ផ្លាស់ប្តូរឥរិយាបថអវិជ្ជមានជុំវិញការចូលរួមរបស់យុវជន»៕