អ្នកជំងឺកូវីដ-១៩ ចំនួន ២២ នាក់បន្ថែមទៀតបានស្លាប់ ដែលធ្វើឱ្យចំនួនអ្នកស្លាប់ដោយសារ ជំងឺកូវីដ-១៩នេះ បានកើនដល់ ១ ៣៩៧ នាក់ ខណៈអ្នកឆ្លងថ្មីជាង ៦០០ នាក់ ក្នុងនោះករណីនាំចូលពីក្រៅប្រទេសជាង ២០០ នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី៣១ ខែកក្កដា ឆ្នាំ២០២១ ឱ្យដឹងថា អ្នកស្លាប់ដោយជំងឺកូវីដ-១៩ កាលពីថ្ងៃម្សិលមិញ ចំនួន២២នាក់ ក្នុងនោះ ករណីឆ្លងថ្មី ៦៥៨នាក់ ខណៈករណីឆ្លងនាំចូលពីក្រៅប្រទេសចំនួន ២៤៨ នាក់។ ក្រៅពីមានអ្នកស្លាប់ និងឆ្លងថ្មីនោះ ក្រសួងថា ក៏មានអ្នកជំងឺចំនួន ៧៩៨ នាក់ បានជាសះស្បើយដែរ។
បើតាមក្រសួងសុខាភិបាល គិតត្រឹមថ្ងៃទី៣១ ខែកក្កដា ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ-១៩ ចំនួន ៧៧,២៤៣នាក់ ក្នុងនោះ ករណីនាំចូលពីក្រៅប្រទេស ចំនួន ១០៥៣៧ នាក់ ខណៈអ្នកព្យាបាលជាសះស្បើយ ៦៩,៩៩៦នាក់ និងស្លាប់សរុប ១,៣៩៧ នាក់។
លោកស្រី លី អាយឡែន (Li Ailan) តំណាងអង្គការសុខភាពពិភពលោកប្រចាំនៅកម្ពុជាបានសរសេរនៅក្នុងសេចក្តីប្រកាសព័ត៌មានកាលពីថ្ងៃទី៣០ ខែកក្កដា ថា ជំងឺរាតត្បាតនេះ នៅឆ្ងាយពីទីបញ្ចប់ពីប្រទេសកម្ពុជា។ អ្នកស្រីបានសរសេរនៅក្នុងសេចក្តីប្រកាសព័ត៌មានដែលមានចំណងជើងថា «យើងកំពុងប្រណាំងប្រជែងជាមួយនឹងវីរុសកូវីដ-១៩ បំប្លែងថ្មី៖ សូមធ្វើសកម្មភាពនៅថ្ងៃនេះដើម្បីកុំឱ្យស្តាយក្រោយនៅថ្ងៃស្អែក» ថា ចំនួនករណីឆ្លងវីរុសកូវីដ-១៩ និងករណីស្លាប់ដោយសារជំងឺកូវីដ-១៩ប្រចាំថ្ងៃ នៅតែមានកម្រិតខ្ពស់នៅក្នុងប្រទេសកម្ពុជាដែលស្ថិតនៅក្នុងដំណាក់កាលចម្លងទី២ (ការចម្លងកម្រិតសហគមន៍នៅតាមតំបន់) ដោយមេរោគនេះបានរីករាលដាលយ៉ាងខ្លាំងនៅក្នុងសហគមន៍។
លោកស្រីបានអំពាវនាវឱ្យអ្នករាល់គ្នាចាត់វិធានការដែលត្រូវបានណែនាំ និងចាំបាច់នានា ដើម្បីការពារខ្លួន ការពារក្រុមគ្រួសារ និងការពារអ្នកដ៍ទៃទៀតពីការឆ្លងរោគ។ សកម្មភាពរួមរបស់យើង នឹងកំណត់ជោគជ័យ ឬក៏បរាជ័យរបស់យើងក្នុងការប្រយុទ្ធប្រឆាំងនឹងជំងឺកូវីដ-១៩៕