ក្រុមអង្គការសង្គមស៊ីវិលដែលឃ្លាំមើលការបោះឆ្នោត មើលឃើញថា ស្ថាប័នរៀបចំការបោះឆ្នោតនៅប្រទេសដែលប្រកាន់ខ្ជាប់នូវគោលការណ៍ប្រជាធិបតេយ្យ សេរីពហុបក្ស នៅតែមានសារៈសំខាន់ និងមិនអាចខ្វះបានឡើយ ប៉ុន្តែអ្វីដែលធ្វើឱ្យស្ថាប័ននេះត្រូវរងនូវការទិទៀននោះ គឺដោយសារតែការគ្របដណ្តប់ឥទ្ធិពលពីអ្នកនយោបាយហួសប្រមាណ និងកង្វះយន្តការច្បាប់ស្តីពីការកំណត់អាណត្តិមេដឹកនាំ។
ការថ្លែងរបស់អង្គការមិនមែនរដ្ឋាភិបាលដូច្នេះ បន្ទាប់ពីលោកនាយករដ្ឋមន្រ្តី ហ៊ុន សែន បានប្រកាសជាថ្មីទៀតកាលពីថ្ងៃទី១ ខែសីហា ថាលោកនឹងនៅក្នុងតំណែងជានាយករដ្ឋមន្រ្តីរហូតដល់ពេលណាលោកលែងចង់ធ្វើ។
សាររបស់មេដឹកនាំនេះត្រូវបានក្រុមអង្គការសង្គមស៊ីវិលដែលមានជំនាញខាងកិច្ចការបោះឆ្នោតចាត់ទុកថា នឹងធ្វើឱ្យជះឥទ្ធិពលមិនល្អទៅដល់គណៈកម្មាធិការជាតិរៀបចំការបោះឆ្នោត (គ.ជ.ប) ដែលជាស្ថាប័នជាតិរៀបចំការបោះឆ្នោត។
នាយកប្រតិបត្តិអង្គការនិចហ្វិក លោក សំ គន្ធាមី មានប្រសាសន៍នៅថ្ងៃចន្ទនេះថា សាររបស់លោកនាយករដ្ឋមន្រ្តី ទោះចង់មិនចង់ នឹងនាំឱ្យប៉ះពាល់ដល់ឯករាជ្យភាព ភាពឥតលម្អៀង និងដំណើរនៃការបោះឆ្នោតដោយសេរី ត្រឹមត្រូវ និងយុត្តិធម៌របស់ស្ថាប័ន គ.ជ.ប ហើយ។
ម៉្យាងវិញទៀត លោកថា សារនេះហាក់បង្ហាញពីស្ថានភាពប្រទេសដែលមិនមានលំហប្រជាធិបតេយ្យពេញលេញ។
លោកបន្តថា៖ «សេចក្តីប្រកាសរបស់គាត់ [នាយករដ្ឋមន្ត្រី] នេះ ប្រៀបដូចបញ្ជូនសារអ៊ីចឹង! នេះបង្ហាញថា វាអត់មានលទ្ធិប្រជាធិបតេយ្យអីទេ ប្រៀបដូចផ្តាច់ការអ៊ីចឹងណា! លោកដឹងទេ ប្រទេសដែលផ្តាច់ការ តែកាន់គឺកាន់មួយជីវិតអ៊ីចឹងទៅណា! សារនេះគាត់ចង់និយាយអ៊ីចឹង! ហេតុនេះស្ថាប័នរៀបចំការបោះឆ្នោតអីជាដើមហ្នឹង នេះប្រៀបដូចជាការផ្ញើសារឱ្យដឹងអ៊ីចឹង» ។
បើតាមអ្នកជំនាញកិច្ចការបោះឆ្នោតរូបនេះយល់ឃើញថា ថ្វីត្បិតស្ថាប័នជាតិ គ.ជ.ប ត្រូវរងការរិះគន់ថាជាអង្គភាពមិនអាចជឿទុកចិត្តបាន តែស្ថាប័នមួយនេះនៅតែជាស្ថាប័នដែលមិនអាចខ្វះបាន ហើយដើរតួនាទីយ៉ាងសំខាន់សម្រាប់សង្គមប្រជាធិបតេយ្យ។
ចំណែកមន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស យល់ឃើញថា រឿងបេក្ខភាពរបស់នាយករដ្ឋមន្រ្តី និងស្ថាប័នជាតិរៀបចំការបោះឆ្នោត ជារឿងពីរដាច់ដោយឡែកពីគ្នា។
លោកបន្តថា ការដាក់បេក្ខភាពរបស់បុគ្គលនយោបាយណា វាមិនសំខាន់ទេ គឺអាស្រ័យទៅលើការពេញចិត្តពីផ្ទៃក្នុងបក្សឬមានការគាំទ្រពីមហាជន។
បើតាមលោក កង សាវាង្ស អ្វីដែលចាំបាច់នៅពេលនេះ ទាំងក្នុងច្បាប់ គ.ជ.ប ក្តី និងច្បាប់កំពូលរបស់ជាតិក្តី នៅមិនទាន់បានកំណត់អាណត្តិរបស់មេដឹកនាំនៅឡើយ។ លោកថា នេះទើបជាមូលហេតុសំខាន់ជាងគេ ហើយក៏ធ្វើឱ្យស្ថាប័នជាតិរៀបចំការបោះឆ្នោតត្រូវរងការរិះគន់ថា មិនអាចបម្រើឱ្យសេក្តីត្រូវការនិងជឿទុកចិត្តបានពីអង្គបោះឆ្នោតដែរ។
លោកបន្តថា៖ «បើសិនជាផ្ទៃក្នុងបក្សគាត់មិនផ្លាស់ប្តូរមុខតំណែងជានាយករដ្ឋមន្រ្តីទេ អាហ្នឹងវាអាស្រ័យទៅលើគណបក្សនីមួយៗ។ ប៉ុន្តែច្បាប់នៅក្នុងការបោះឆ្នោតវិញ យើងមិនទាន់មានច្បាប់ណាដែលចែងថា នាយករដ្ឋមន្រ្តីកាន់ត្រឹម២អាណត្តិ គឺយើងមិនទាន់មានទេ។ នេះគឺជារឿងមួយដែលសំខាន់»។
បើទោះជាបែបណា លោក សុខ ឥសាន សមាជិកព្រឹទ្ធសភា និងជាមន្រ្តីនាំពាក្យគណបក្សប្រជាជនកម្ពុជា ថ្លែងថា គណបក្សកាន់អំណាចមិនខ្វះទេនូវបេក្ខភាពសម្រាប់ធ្វើជានាយករដ្ឋមន្រ្តី។ ប៉ុន្តែលោកអះអាងថា សម្រាប់លោក ហ៊ុន សែន គឺជាឥស្សរជននយោបាយដែលសំខាន់ជាងគេតែម្នាក់គត់ដែលស័ក្តិសមបំផុតនៅក្នុងតំណែងជានាយករដ្ឋមន្រ្តីនេះ។
លោកបន្តថា ការប្រកាសជំហររបស់លោកនាយករដ្ឋមន្រ្តីបែបនេះ មិនបានជះផលអាក្រក់ណាមួយទៅលើស្ថាប័ន គ.ជ.ប នោះដែរ ព្រោះមកដល់ពេលនេះ លោកនាយករដ្ឋមន្ត្រី ហ៊ុន សែន នៅតែមានការគាំទ្រពីមហាជន។
លោកបន្តថា៖ «បើបេក្ខជនសម្រាប់នាយករដ្ឋមន្រ្តី គឺមិនក្រទេ គឺសម្បូរធនធានមនុស្សណាស់។ ហើយក្នុងការតម្រង់ជួរទៅ គឺសម្តេចតេជោនាយករដ្ឋមន្រ្តី គឺលោកជាបេក្ខជនទី១ អាហ្នឹង១! ហើយទី២ សម្តេចគាត់លើកឡើងថា គាត់នៅបន្តធ្វើទៀត ដោយសារគាត់ជឿជាក់លើឆន្ទៈប្រជាពលរដ្ឋដែលតែងតែគាំទ្រគណបក្សប្រជាជនកម្ពុជារហូត»។
វីអូឌី មិនអាចស្នើសុំការបញ្ជាក់បាននៅឡើយទេពីអ្នកនាំពាក្យ គ.ជ.ប លោក ឌឹម សុវណ្ណារុំ ខណៈលោក ហង្ស ពុទ្ធា អ្នកនាំពាក្យស្ថាប័ន គ.ជ.ប បដិសេធក្នុងការអត្ថាធិប្បាយ។ នេះមិនមែនជារឿងថ្មីឡើយដែលលោកនាយករដ្ឋមន្រ្តី ហ៊ុន សែន ប្រកាសជំហរក្នុងការគ្រប់គ្រងតំណែងដ៏សំខាន់មួយនេះ។ ជារឿយៗ លោកនាយករដ្ឋមន្ត្រី ហ៊ុន សែន តែងអះអាងថា លោកនឹងដឹកនាំប្រទេសរហូតដល់លោកមានអាយុ៩០ឆ្នាំ។ ប៉ុន្តែចុងក្រោយនេះ លោកថានឹងធ្វើជានាយករដ្ឋមន្រ្តីដល់ពេលណាដែលលោកលែងចង់ធ្វើ ដោយមិនកំណត់ពេលវេលា៕