តុលាការសាលាដំបូងរាជធានីភ្នំពេញ នៅថ្ងៃនេះ បានសម្រេចផ្ដន្ទាទោសអ្នកតវ៉ានៅមុខស្ថានទូតចិននិងអតីតមន្ត្រីបក្សប្រឆាំងចំនួន៩នាក់ ឱ្យជាប់ពន្ធនាគារចន្លោះពី១២ខែដល់២០ខែ និងពិន័យជាប្រាក់ក្នុងម្នាក់ៗចំនួន២លានរៀលចូលរដ្ឋ ក្រោមបទចោទប្រកាន់«ញុះញង់ និងផ្ដើមគំនិតញុះញង់»។
កាលពីថ្ងៃទី២៣ ខែតុលា ឆ្នាំ២០២០ ក្រុមប្រជាពលរដ្ឋជិត២០នាក់ ភាគច្រើនជាស្ត្រី បាននាំគ្នាប្រមូលផ្តុំតវ៉ានៅមុខស្ថានទូតចិនប្រចាំនៅកម្ពុជា ដើម្បីដាក់ញត្តិទៅស្ថានទូតមួយនេះ និងគ្រោងដាក់ទៅស្ថានទូតផ្សេងៗទៀត ដើម្បីសុំឱ្យប្រទេសហត្ថលេខីទាំងអស់គោរពនិងអនុវត្តតាមកិច្ចព្រមព្រៀងសនិ្តភាពទីក្រុងប៉ារីសឱ្យបានត្រឹមត្រូវ។
ប៉ុន្តែក្នុងអំឡុងពេលនិងក្រោយពេលតវ៉ា អ្នកតវ៉ាចំនួន៧នាក់ត្រូវបានសមត្ថកិច្ចចាប់ខ្លួននិងបញ្ជូនទៅឃុំខ្លួននៅពន្ធនាគារព្រៃសជាបន្តបន្ទាប់ ដោយចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ចំណែកមន្ត្រីអតីតបក្សប្រឆាំង២រូប ដែលអាជ្ញាធរអះអាងថាជាអ្នកផ្តើមគំនិតឱ្យមានការតវ៉ានោះ គឺលោក ហូរ វ៉ាន់ និងលោក សាន់ សីហៈ ដែលកំពុងនៅក្រៅប្រទេស ត្រូវបានចោទប្រកាន់ពីបទ «អ្នកផ្តើមគំនិតក្នុងអំពើញុះញង់ បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ចៅក្រមជំនុំជម្រះសាលាដំបូងរាជធានីភ្នំពេញ លោកស្រី អ៊ុក រ៉េតគន្ធា នៅថ្ងៃចន្ទនេះ បានប្រកាសសាលក្រមដោយផ្ដន្ទាទោសអ្នកតវ៉ាចំនួន៦នាក់ឱ្យជាប់ពន្ធនាគារចន្លោះពី១២ខែដល់១៨ខែ ខណៈអតីតមន្ត្រីបក្សប្រឆាំង២រូបនិងអ្នកតវ៉ាម្នាក់ទៀតជាប់ពន្ធនាគារ២០ខែ។
អ្នកតវ៉ានិងអតីតមន្ត្រីបក្សប្រឆាំងទាំង៩នាក់នោះ រួមមាន លោក តុន និមល អ្នកស្រី លឹម សាន និងអ្នកស្រី យ៉យ ស្រីមុំ ត្រូវបានតុលាការសម្រេចផ្តន្ទាទោសឱ្យជាប់ពន្ធនាគារ១ឆ្នាំកន្លះ ខណៈអ្នកស្រី ប៉ៃ រ៉ន អ្នកស្រី សាត ផា និងអ្នកស្រី សាន់ ស្រីនាថ ត្រូវបានផ្តន្ទាទោសឱ្យជាប់ពន្ធនាគារ១ឆ្នាំពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ចំណែកអតីតសមាជិកព្រឹទ្ធសភាជាមន្ត្រីជាន់ខ្ពស់អតីតគណបក្សសង្រ្គោះជាតិ លោក ហូរ វ៉ាន់ និងលោក សាន សីហៈ ត្រូវបានតុលាការផ្ដន្ទាទោសឱ្យជាប់ពន្ធនាគារ១ឆ្នាំ៨ខែ និងចេញដីកាឱ្យចាប់ខ្លួន ខណៈអ្នកស្រី ហុង អាន ជាសកម្មជនគាំទ្រអតីតគណបក្សសង្រ្គោះជាតិ ត្រូវបានកាត់ទោសឱ្យជាប់ពន្ធនាគារ១ឆ្នាំកន្លះ ដោយអ្នកទាំង៣នាក់ត្រូវបានចោទប្រកាន់ពីបទ «អ្នកផ្តើមគំនិតក្នុងអំពើញុះញង់ បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
បន្ទាប់ចេញពីបន្ទប់សវនាការ លោក តុន និមល បានប្រាប់អ្នកសារព័ត៌មានថា លោកនឹងប្តឹងជំទាស់ទៅនឹងសេចក្ដីសម្រេចរបស់តុលាការថ្នាក់ក្រោមនេះ ដោយលោកចាត់ទុកការសម្រេចរបស់ចៅក្រមរូបនេះជារឿងអយុត្តិធម៌។ លោកបន្តថា ពួកគាត់មិនបានធ្វើអី្វខុសឡើយ ដោយគ្រាន់តែនាំគ្នាយកញតិ្តនៅដាក់នៅស្ថានទូតចិនតែប៉ុណ្ណោះ។
លោកថា៖ «ជារឿងអយុត្តិធម៌សម្រាប់ខ្ញុំណាស់ ព្រោះខ្ញុំមិនបានធ្វើអីខុសទេ គ្រាន់តែយកញតិ្តទៅដាក់នៅស្ថានទូតចិន។ ខ្ញុំនឹងប្ដឹងជំទាស់»។
អ្នកស្រី ជ័យ ស្រីនី ដែលជាភរិយាលោក តុន និមល មានប្រសាសន៍ថា ការសម្រេចកាត់ទោសប្ដីគាត់ឱ្យជាប់ពន្ធនាគារ១៨ខែនេះ ជារឿងអយុត្តិធម៌សម្រាប់ពួកគាត់។
អ្នកស្រីថា៖ «វាមានភាពអយុត្តិធម៌មែនទែន ព្រោះអីប្ដីខ្ញុំមិនមានកំហុសទេ ចាប់គាត់ទាំងអត់មានកំហុស ហើយយកគាត់ដាក់គុក១៨ខែ ហើយបង់ប្រាក់២លានរៀលទៀត។ ខ្ញុំគិតថា មានភាពអយុត្តិធម៌យ៉ាងណាសម្រាប់ពួកគាត់ ប្ដីខ្ញុំមានជំងឺជាប់ខ្លួនទៀត។ ខ្ញុំគិតថា ជាតិជាខ្មែរគ្រាន់តែគាត់សម្ដែងមតិ ដូចថាគាត់មិនទាន់យកញត្តិទៅស្ថានទូតផង ចាប់គាត់ទាំងអត់មានកំហុស ខ្ញុំទទួលយកមិនបានទេ»។
វីអូឌី មិនអាចសុំការអត្ថាធិប្បាយជុំវិញករណីនេះពីចៅក្រមជំនុំជម្រះសាលាដំបូងរាជធានីភ្នំពេញ លោកស្រី អ៊ុក រ៉េតគន្ធា និងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃចន្ទនេះ។
នាយករងអង្គការការពារសិទ្ធិមនុស្សលីកាដូ លោក អំ សំអាត បង្ហាញការសោកស្ដាយចំពោះការសម្រេចរបស់សាលាដំបូងរាជធានីភ្នំពេញ នៅថ្ងៃនេះ។ លោកបន្តថា ការសម្រេចរបស់តុលាការលើសកម្មជននយោបាយ នឹងធ្វើឱ្យមានការរិះគន់បន្តទៀតលើការអនុវត្តច្បាប់នៅកម្ពុជា។
លោកថា៖ «កន្លងមក មានការិះគន់ជាច្រើនចំពោះការចាប់និងការឃុំខ្លួនអតីតសកម្មជនបក្សប្រឆាំង ដែលគេគិតថា ការចាប់និងការឃុំខ្លួនជារឿងនយោបាយច្រើនជាងការអនុវត្តច្បាប់។ ខ្ញុំយល់ថា សាលក្រមនេះនឹងអាចបន្តឱ្យមានការរិះគន់បន្ថែមទៀតទាក់ទងនឹងការផ្ដន្ទាទោសនេះ។ ហើយកន្លងមក យើងឃើញមានសហគមន៍ជាតិនិងអន្តរជាតិ ការចាប់និងឃុំខ្លួនកន្លងមកនេះ វាជាការធ្វើទុក្ខបុកម្នេញមួយសម្រាប់អតីតគណបក្សប្រឆាំង»។
គិតចាប់ពីខែមករា ឆ្នាំ២០២១មក អ្នកនយោបាយនិងសកម្មជនអតីតគណបក្សសង្រ្គោះជាតិ រួមទាំងយុវជនការពារបរិស្ថាន ប្រមាណ៤០នាក់ ត្រូវបានសមត្ថកិច្ចចាប់ខ្លួនជាបន្តបន្ទាប់។ ពួកគេទាំងនោះត្រូវរងការចោទប្រកាន់ពីបទ «រួមគំនិតក្បត់ជាតិ» និង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» រួមទាំងបទចោទមួយចំនួនទៀតផងដែរ៕
