ក្រសួងសុខាភិបាលបានឱ្យដឹងថា ក្នុងរយៈពេល២ថ្ងៃ កម្ពុជារកឃើញវីរុសកូវីដ-១៩បំប្លែងថ្មី B.1.617.2 (Delta) ចំនួន១០៩ករណី លើពលករខ្មែរដែលត្រឡប់មកពីប្រទេសថៃ និងការឆ្លងចូលសហគមន៍ ក្នុងនោះ នៅរាជធានីភ្នំពេញ រកឃើញ៥ករណី។
ក្នុងសេចក្តីជូនព័ត៌មានរបស់ក្រសួងសុខាភិបាលនៅថ្ងៃចន្ទនេះ បានឱ្យដឹងថា គិតចាប់ពីថ្ងៃទី៣១ ខែកក្កដា និងនៅថ្ងៃទី០១ ខែសីហា ឆ្នាំ២០២១ ម្សិលមិញនេះ កម្ពុជាបានរកឃើញអ្នកឆ្លងជំងឺកូវីដ-១៩បំប្លែងថ្មីប្រភេទ “ដែលតា” ចំនួន១០៩ករណី ដែលអ្នកជំងឺទាំងនោះជាពលករទើបនឹងត្រឡប់មកពីប្រទេសថៃ និងករណីឆ្លងចូលសហគមន៍នៅក្នុងរាជធានីនិងខេត្តចំនួន១០ រួមមាន រាជធានីភ្នំពេញ ៥ករណី, ខេត្តកំពង់ចាម ២ករណី, បន្ទាយមានជ័យ ៧ករណី, បាត់ដំបង ៥ករណី, ឧត្តរមានជ័យ ៣៣ករណី, ប៉ៃលិន ២៩ករណី, សៀមរាប ២២ករណី, ត្បូងឃ្មុំ ២ករណី, ព្រៃវែង ២ករណី, និងខេត្តកំពង់ធំ ១ករណី។
ក្រសួងបន្តថា សម្រាប់នៅរាជធានីភ្នំពេញដែលបានរកឃើញមានករណីឆ្លងជំងឺកូវីដ-១៩បំប្លែងថ្មីចំនួន៥ករណីនោះ រួមមាន ការរកឃើញទៅលើពលករខ្មែរមកពីថៃដែលនៅមណ្ឌលព្យាបាលសែនសុខចំនួន១ករណី ស្ត្រីម្នាក់ដែលទៅព្យាបាលនៅមន្ទីរពេទ្យកាល់ម៉ែត្រ បុគ្គលិកផ្នែកអនាម័យម្នាក់និងអ្នកជំងឺម្នាក់នៅមន្ទីរពេទ្យមិត្តភាពខ្មែរ-សូវៀត និងអ្នកដំណើរបរទេសម្នាក់មកពីប្រទេសម៉ាឡេស៊ី។
សេចក្តីជូនព័ត៌មានដដែល បានក្រើនរម្លឹកដល់ប្រជាពលរដ្ឋនៅទូទាំងប្រទេស បន្តប្រុងប្រយ័ត្នខ្ពស់និងការពារខ្លួន គោរពតាមការណែនាំរបស់ក្រសួង កុំទៅជួបជុំនៅកន្លែងមានមនុស្សអ៊ូអរច្រើន កន្លែងបិទជិត កុំទទួលទានបាយរួមគ្នា ឬបង្កឱ្យមានការជួបជុំក្នុងពិធីភ្ជាប់ពាក្យឬពិធីបុណ្យទានអ្វីមួយ ដើម្បីរួមគ្នាទប់ស្កាត់ការចម្លងបន្តគ្នា ខណៈការចម្លងបច្ចុប្បន្នមានសន្ទុះកើនឡើងលើយុវវ័យដែលជាក្រុមដើរចល័តចេញក្រៅផ្ទះនិងជួបជុំមិត្តភក្តិ។
បើតាមក្រសួងសុខាភិបាល គិតចាប់តាំងពីថ្ងៃទី៣១ ខែមីនា ដល់ថ្ងៃទី០១ ខែសីហា ឆ្នាំ២០២១នេះ ក្រសួងបានរកឃើញករណីឆ្លងវីរុសបំប្លែងថ្មីនេះសរុបចំនួន២២៣ករណីហើយ។
វីអូឌី មិនអាចសុំការបំភ្លឺពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេ នៅថ្ងៃចន្ទនេះ ។
អភិបាលរងខេត្ត និងជាអ្នកនាំពាក្យខេត្តសៀមរាប លោក លី សំរិទ្ធ មានប្រសាសន៍ថា បច្ចុប្បន្ន មន្ត្រីជំនាញបាននិងកំពុងអនុវត្តតាមការណែនាំរបស់រដ្ឋាភិបាលឱ្យបិទខ្ទប់ការឆ្លងខេត្ត ដើម្បីទប់ស្កាត់ការឆ្លងរាលដាលបន្តនៃជំងឺកូវីដ-១៩បំប្លែងថ្មីនេះ។
លោកបញ្ជាក់ថា៖ «យើងបានយកតំបន់ដែលមានហានិភ័យខ្ពស់ ដូចយើងបាននិយាយហើយ ដូចតំបន់បិទខ្ទប់នៅក្នុងក្រុង និងស្រុកសូត្រនិគម ដែលជាតំបន់ក្រហម តំបន់លឿងទុំនេះ [ក្រុមគ្រូពេទ្យ] បានរៀបចំធ្វើតេស្តនៅក្នុងសហគមន៍ យកតេស្តរ៉ាពីត [Rapid Test] ទៅធ្វើ ដើម្បីញែកអត្តសញ្ញាណអ្នកឆ្លង អ្នកមិនឆ្លង ដើម្បីងាយស្រួលកុំឱ្យចម្លងបន្តទៀត»។
អ្នកនាំពាក្យរដ្ឋបាលខេត្តបន្ទាយមានជ័យ លោកស្រី រស់ សុផានី មានប្រសាសន៍ថា គិតមកដល់ចុងខែកក្កដានេះ នៅក្នុងខេត្តមានពលករត្រឡប់មកពីប្រទេសថៃបានឆ្លងជំងឺកូវីដ-១៩បំប្លែងថ្មី B.1.617.2 (Delta) ជាង១០នាក់ ខណៈអ្នកជំងឺបំប្លែងថ្មី និងអ្នកពាក់ព័ន្ធ ត្រូវដាក់ឱ្យព្យាបាលនិងធ្វើចត្តាឡីស័កនៅមណ្ឌលដាច់ដោយឡែកពីអ្នកឆ្លងជំងឺកូវីដ-១៩ធម្មតា។
ទោះជាបែបនេះក្តី លោកស្រីថា គិតត្រឹមថ្ងៃទី២ ខែសីហានេះ មិនមានមេរោគបំប្លែងថ្មីឆ្លងបន្តទៀតនោះទេ ដោយសារតែរដ្ឋាភិបាលសម្រេចបិទព្រំដែនមិនឱ្យពលករឆ្លងកាត់។
អ្នកនាំពាក្យរូបនោះបញ្ជាក់ថា ក្រុមការងារជំនាញបានសហការជាមួយមន្ត្រីពាក់ព័ន្ធចុះអប់រំនិងណែនាំដល់ពលរដ្ឋ ជាពិសេសនៅតាមជាយដែន ត្រូវចេះអនាម័យនិងគោរពតាមការណែនាំរបស់ក្រសួងសុខាភិបាល ដើម្បីទប់ស្កាត់កុំឱ្យមានជំងឺកូវីដ-១៩ឆ្លងក្នុងសហគមន៍បន្តទៀត។
លោកស្រីមានប្រសាសន៍ថា៖ «យើងត្រូវធ្វើការអប់រំគាត់ ធ្វើការផ្សព្វផ្សាយពីបញ្ហាទាំងអស់ហ្នឹង ឱ្យពួកគាត់បានយល់ដឹង ដើម្បី “៣កុំ ៣ការពារ” ដើម្បីទប់ស្កាត់កុំឱ្យឆ្លងរាលដាលបន្តទៀត»។
វីអូឌី មិនអាចសុំការអត្ថាធិប្បាយជុំវិញបញ្ហានេះពីអភិបាលរាជធានីភ្នំពេញ លោក ឃួង ស្រេង បានទេ។
ប៉ុន្តែបើតាមសេចក្តីសម្រេចមួយរបស់រដ្ឋបាលរាជធានីភ្នំពេញ នៅថ្ងៃចន្ទនេះ គឺអាជ្ញាធរបានសម្រេចបិទខ្ទប់ច្រកចូលផ្លូវមួយចំនួនក្នុងភូមិ៥ សង្កាត់បឹងសាឡាង ខណ្ឌទួលគោក និងហាមការជួបជុំឬប្រមូលផ្តុំមនុស្ស ក្រោយពីបានរកឃើញករណីឆ្លងវីរុសបំប្លែងខ្លួនថ្មីប្រភេទ “ដែលតា (Delta)” នៅទីនោះ។
រដ្ឋបាលរាជធានីភ្នំពេញបន្តថា ការបិទខ្ទប់នេះនឹងធ្វើឡើងរយៈពេល១៤ថ្ងៃ ចាប់ពីម៉ោងសូន្យ ថ្ងៃទី៣ ដល់ថ្ងៃទី១៦ ខែសីហា ឆ្នាំ២០២១ ដើម្បីទប់ស្កាត់ការឆ្លងរាលដាលនូវវីរុសបំប្លែងថ្មីនេះនៅក្នុងសហគមន៍។
ចំណែកការចេញ-ចូលដោយមូលហេតុសុខភាពបន្ទាន់ ឬការចេញ-ចូលដើម្បីផ្តល់វត្ថុសំណាកធ្វើតេស្តរកជំងឺកូវីដ-១៩តាមការណែនាំរបស់អាជ្ញាធរមូលដ្ឋាន ឬការវិលត្រឡប់ទៅលំនៅឋានឬទីសំណាក់របស់ខ្លួនរបស់បុគ្គល ដែលបានបញ្ចប់ការធ្វើចត្តាឡីស័ក និងអ្នកជំងឺចេញពីមន្ទីរពេទ្យឬកន្លែងសម្រាកព្យាបាលចូលក្នុងទីតាំងបិទខ្ទប់ រដ្ឋបាលរាជធានីភ្នំពេញ បញ្ជាក់ថា ត្រូវមានការសម្របសម្រួលពីអាជ្ញាធរមានសមត្ថកិច្ច។
សេចក្តីសម្រេចនោះបញ្ជាក់ទៀតថា ការចេញ-ចូលនិងការជួបជុំរបស់បុគ្គលិកសុខាភិបាល និងអាជ្ញាធរមានសមត្ថកិច្ច ដើម្បីអនុវត្តវិធានការសុខាភិបាលក្នុងការស្រាវជ្រាវ ទប់ស្កាត់ និងកាត់ផ្ដាច់ការឆ្លងរាលដាលនូវមេរោគបំប្លែងខ្លួនថ្មី ប្រភេទ”ដែលតា (Delta)” នៅក្នុងសហគមន៍ ឬការចេញ-ចូលនិងការជួបជុំរបស់អាជ្ញាធរមានសមត្ថកិច្ច ដើម្បីផ្គត់ផ្គង់គ្រឿងឧបភោគ-បរិភោគចាំបាច់ក្នុងអំឡុងពេលបិទខ្ទប់ ឬការបំពេញការងារថែរក្សាសន្តិសុខ សណ្តាប់ធ្នាប់ និងរបៀបរៀបរយសាធារណៈ មិនត្រូវបានហាមឃាត់ទេ ប៉ុន្តែត្រូវអនុវត្តតាមវិធានការសុខាភិបាល។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សង្កេតឃើញថា មួយរយៈកាលចុងក្រោយនេះ ជំងឺកូវីដ-១៩បំប្លែងថ្មី បានឆ្លងចូលកម្ពុជាជាបន្តបន្ទាប់។ ករណីនេះ លោកថា បើពលរដ្ឋនិងអាជ្ញាធរពាក់ព័ន្ធមិនរឹតបន្តឹងនៅតាមច្រកចេញចូលព្រំដែន ឬមិនសហការគ្នាចូលរួមទប់ស្កាត់ទេ នឹងធ្វើឱ្យមានហានិភ័យកាន់តែខ្លាំង ហើយធ្វើឱ្យរដ្ឋាភិបាលពិបាកក្នុងការគ្រប់គ្រង។
លោកមានប្រសាសន៍ថា៖ «ត្រូវគ្រប់គ្រងច្រកព្រំដែនឱ្យបានតឹងរ៉ឹង ហើយត្រូវធានាមិនឱ្យមានការលួចឆ្លងដែនដោយខុសច្បាប់ចូលមកក្នុងប្រទេសកម្ពុជា ដោយគ្មានឆ្លងកាត់ប៉ុស្តិ៍ត្រួតពិនិត្យរបស់អាជ្ញាធរ។ ហើយជាពិសេស មន្ត្រីដែលគ្រប់គ្រងមណ្ឌលចត្តាឡីស័ក គួរតែមានការប្រុងប្រយ័ត្នខ្ពស់ដែរ ដើម្បីកុំឱ្យមានការចម្លងជាយថាហេតុណាមួយមកដល់រូបគាត់។ កាលណាឆ្លងដល់មន្ត្រីដែលគ្រប់គ្រងមណ្ឌលចត្តាឡីស័ក វាអាចឆ្លងដល់សហគមន៍ ដល់ប្រពន្ធកូនសាច់ញាតិគាត់ គឺជារឿងមួយដែលបង្កមហន្តរាយដល់សហគមន៍។»
គួរបញ្ជាក់ថា កាលពីចុងខែកក្កដា រដ្ឋាភិបាលកម្ពុជាបានសម្រេចបិទខ្ទប់ខេត្តចំនួន៨ រួមមាន ខេត្តបាត់ដំបង ប៉ៃលិន បន្ទាយមានជ័យ សៀមរាប ឧត្តរមានជ័យ និងខេត្តព្រះវិហារ រយៈពេល១៤ថ្ងៃ ចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ដើម្បីទប់ស្កាត់ការនាំចូលមេរោគកូវីដ-១៩បំប្លែងថ្មីប្រភេទ”ដែលតា” ចូលទៅក្នុងសហគមន៍ បន្ទាប់ពីមានការកើនឡើងចំនួនអ្នកឆ្លងមេរោគកូវីដ-១៩បំប្លែងថ្មីនេះជាបន្តបន្ទាប់។
បើតាមក្រសួងសុខាភិបាល គិតត្រឹមព្រឹកថ្ងៃទី០២ ខែសីហា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៧៨ ៤៧៤នាក់ ក្នុងនោះ មានអ្នកស្លាប់១ ៤២០នាក់ អ្នកជំងឺព្យាបាលជាសះស្បើយចំនួន៧១ ៥១៧នាក់ ខណៈករណីនាំចូលពីក្រៅប្រទេសចំនួន១០ ៩៧១នាក់ ៕
