គណបក្សភ្លើងទៀន ដែលគេស្គាល់ថា ជាអតីតគណបក្សសមរង្ស៊ី មិនទាន់សម្រេចចិត្តពេញលេញ ក្នុងការចូលរួមបោះឆ្នោតជ្រើសរើសក្រុម ប្រឹក្សាឃុំសង្កាត់ ដែលនឹងប្រព្រឹត្តទៅក្នុងឆ្នាំ២០២២ ខាងមុខនៅឡើយទេ ដោយត្រូវរង់ចាំមើលស្ថានភាពនយោបាយជាមុនសិន។
ប្រធានគណបក្សភ្លើងទៀនលោក ទាវ វណ្ណុល បានប្រាប់វីអូឌី នៅព្រឹកថ្ងៃទី២ សីហា ម្សិលមិញនេះថា មកដល់ពេលនេះ គណបក្សនៅមិនទាន់មានជំហរច្បាស់លាស់ ក្នុងការចូលរួមការបោះឆ្នោត ជ្រើសរើសក្រុមប្រឹក្សាឃុំសង្កាត់ដែលនឹងរៀបចំឡើងនៅក្នុងឆ្នាំ២០២២ ខាងមុខទៀតនេះនៅឡើយទេ។ លោកបន្តថា ការសម្រេចចូលរួមឬមិនមិនចូលរួម នឹងដឹងនៅក្រោយសមាជគណបក្ស ដែលគ្រោងនឹងប្រព្រឹត្តទៅ នៅថ្ងៃទី២២ ខែសីហា ខាងមុខនេះ។ បើតាមលោក ទាវ វណ្ណុល ប្រសិនបើបរិយាកាសនយោបាយនៅតែមានការរឹតត្បិតលំហប្រជាធិបតេយ្យនៅតែមានបញ្ហា ហើយសកម្មភាពនយោបាយនៅតែមិនទាន់ត្រូវបានបើកទូលាយ ដូចសព្វថ្ងៃនេះទេ គណបក្សភ្លើងទៀន នឹងពិចារណាមិនចូលរួមក្នុងការបោះឆ្នោតនេះឡើយ។
លោកបន្តថា៖ «យើងនឹងពិភាក្សា ក្រោយពេលដែលយើង នឹងជ្រើសរើស និងផ្លាស់ប្តូរគ ណៈកម្មការនាយក និងគណៈកម្មការអចិន្រ្តៃយ៍ហើយ។ យើងនឹងពិភាក្សាថា តើយើងនឹងចូលរួមបោះឆ្នោតឃុំសង្កាត់ ឬមួយក៏អត់ គឺយើងនឹងជជែកគ្នានៅពេលនោះ។ ហើយយើង នឹងសិក្សានូវលំហរលទ្ធិប្រជាធិបតេយ្យនៅកម្ពុជា ថាតើលំហរលទ្ធិប្រជាធិបតេយ្យហ្នឹងឯង វាមានការទូលំទូលាយសមល្មមអាចឱ្យយើងចូលរួមបានឬក៏អត់ គឺយើងនឹងជជែកគ្នានៅ ពេលមានគណៈកម្មការនាយកហើយនិងគណៈកម្មការអចិន្រ្តៃយ៏ថ្មី»។
នៅក្នុងសេចក្តីប្រកាសព័ត៌មានរបស់គណបក្សភ្លើងទៀន ដែលចេញកាលពីចុងខែ កក្កដា ឆ្នាំ២០២១នេះ អតីតគណបក្សប្រឆាំងមួយនេះនឹងរៀបចំសមាជសាមញ្ញគណបក្ស ដែលគ្រោង នឹងប្រព្រឹត្តទៅនៅថ្ងៃទី២២ ខែសីហាខាងមុខនេះ។
សមាជគណបក្សនេះ នឹងពិភាក្សាទៅលើការធ្វើវិសោធនកម្ម ប្រការមួយចំនួននៃលក្ខន្តិកៈ គណបក្ស និងរៀបចំជ្រើសរើសថ្នាក់ដឹកនាំគណបក្ស សម្រាប់អាណត្តិថ្មីព្រមទាំងកំណត់ យុទ្ធសាស្រ្ត នយោបាយរបស់គណបក្សផង។
គណបក្សភ្លើងទៀន ដែលមានដើមកំណើតមកពីណបក្ស សម រង្ស៊ីនោះ មិនបានចូលរួមការបោះឆ្នោតអស់ជាច្រើនអាណត្តិមកហើយ នៅបន្ទាប់ពីគណបក្សនេះបានរួបរួមគ្នាជា មួយគណបក្សសិទ្ធិមនុស្សដោយបង្កើតបានជាគណបក្សសង្រ្គោះជាតិកាលពីខែកក្កដា ឆ្នាំ២០១២ នៅទីក្រុងម៉ានីលប្រទេសហ្វីលីន។
នៅក្នុងសមាជវិសាមញ្ញ កាលពីឆ្នាំ ២០១៧ គណបក្ស សម រង្ស៊ី បានបង្ខំចិត្តប្តូរឈ្មោះទៅជា គណបក្សភ្លើងទៀន ដោយសារច្បាប់ ស្តីពី គណបក្សនយោបាយ មិនតម្រូវឱ្យដាក់ឈ្មោះបុគ្គល ធ្វើជាឈ្មោះគណបក្សនយោបាយទៀតឡើយ។
គណបក្សភ្លើងទៀន ធ្លាប់គ្រប់គ្រងអាសនៈនៅក្នុងព្រឹទ្ធសភាចំនួន១១អាសនៈ រហូតដល់ការបោះឆ្នោត ព្រឹទ្ធសភាអាណត្តិថ្មីកាលពីឆ្នាំ២០១៨៕
