សាលាឧទ្ធរណ៍បានបដិសេធបណ្ដឹងសុំនៅក្រៅឃុំរបស់មេធាវីការពារក្ដីឱ្យកុមារា កាក់ សុវណ្ណច្ឆ័យ ដែលជាកូនប្រុសអតីតមន្ត្រីគណបក្សសង្រ្គោះជាតិ បច្ចុប្បន្នកំពុងជាប់ពន្ធនាគារព្រៃស។
កុមារា កាក់ សុវណ្ណច្ឆ័យ ត្រូវបានសមត្ថកិច្ចចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១ ក្រោយមក តុលាការបានសម្រេចឃុំខ្លួនកុមាររូបនេះនៅពន្ធនាគារព្រៃសបណ្ដោះអាសន្ន ដោយចោទពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ» បន្ទាប់ពីកុមាររូបនេះបានបង្ហោះសាររិះគន់រដ្ឋាភិបាលតាមប្រព័ន្ធតេឡេក្រាម។
មេធាវីការពារក្ដីឱ្យកុមារ កាក់ សុវណ្ណច្ឆ័យ គឺលោក សំ សុគង់ ប្រាប់ វីអូឌី នៅថ្ងៃអង្គារនេះថា ចៅក្រមសាលាឧទ្ធរណ៍ លោក ឌុច សុខសារិន សម្រេចមិនអនុញ្ញាតឱ្យកូនក្ដីរបស់លោកបាននៅក្រៅឃុំបណ្ដោះអាសន្នឡើយ ក្រោមហេតុផលថា បើសិនជាឱ្យនៅក្រៅឃុំនោះ កូនក្ដីរបស់លោកនឹងបង្ហោះសារតាមប្រព័ន្ធតេឡេក្រាម និងមានបទល្មើសថ្មីផ្សេងទៀត។
លោកបន្តថា៖ «ចំពោះការសម្រេចរបស់ចៅក្រមសាលាឧទ្ធរណ៍ដែលមិនអនុញ្ញាតឱ្យកូនក្ដីនៅក្រៅឃុំនោះ មេធាវីការពារក្ដីយល់ឃើញថា មិនទាន់មានភាពយុត្តិធម៌ មិនអាចទទួលបានទេ ចំពោះសេចក្ដីសម្រេចនេះ។ ហើយមេធាវីការពារបានពិគ្រោះជាមួយម្ដាយកុមារ កាក់ សុវណ្ណច្ឆ័យ ហ្នឹង ហើយគាត់បានឱ្យមេធាវីជួយធ្វើបណ្ដឹងសារទុក្ខទៅតុលាការកំពូល ដើម្បីឱ្យពិនិត្យសាលដីកា[សាលាឧទ្ធរណ៍]ហ្នឹង»។
ម្ដាយរបស់ក្មេងប្រុស កាក់ សុវណ្ណច្ឆ័យ និងជាភរិយាលោក កាក់ កុម្ភារ អតីតសមាជិកក្រុមប្រឹក្សារាជធានីភ្នំពេញបក្សប្រឆាំង គឺអ្នកស្រី ព្រំ ចាន់ថា ចាត់ទុកការសម្រេចរបស់សាលាឧទ្ធរណ៍ថា ជារឿងអយុត្តិធម៌ និងមិនអាចទទួលយកបានសម្រាប់គ្រួសាររបស់គាត់។
ក្រៅពីការមិនអនុញ្ញាតឱ្យនៅក្រៅឃុំហើយ អ្នកស្រីថា សាលាឧទ្ធរណ៍ក៏មិនបានដឹកកូនប្រុសរបស់គាត់មកចូលរួមសវនាការដែរ ក្រោមហេតុផលថា ជំងឺកូវីដ-១៩កំពុងរាលដាល ប៉ុន្តែអ្នកស្រីចាត់ទុកហេតុផលនេះគ្រាន់តែជាលេសប៉ុណ្ណោះ ខណៈដែលអ្នកស្រីសង្កេតឃើញថា អ្នកជាប់ឃុំផ្សេងៗទៀតត្រូវបានតុលាការដឹកមកចូលសវនាការបាន។
អ្នកស្រី ព្រំ ចាន់ថា បន្តថា បើសិនជាតុលាការនៅតែមិនដោះស្រាយករណីកូននិងគ្រួសាររបស់គាត់ ព្រមទាំងអ្នកផ្សេងទៀតឱ្យមានសេរីភាពវិញទេ ពួកគាត់នៅតែនាំគ្នាតវ៉ាបន្តទៀត ទោះបីជាត្រូវទទួលរងការគំរាមកំហែងនិងរុញច្រានពីសំណាក់សមត្ថកិច្ចក៏ដោយ។
អ្នកស្រីថា៖ «ខ្ញុំសំណូមពរដល់រដ្ឋាភិបាលឱ្យលោកពិចារណាឡើងវិញ ដោយសារគាត់ជាក្មេង ហើយគាត់មិនទាន់គ្រប់អាយុ។ ទី១ ប្ដីខ្ញុំក៏ជាប់ [ឃុំ] កូនខ្ញុំជាប់ពន្ធនាគារ ហើយឱ្យគាត់ ដូចថា បើតុលាការសុក្រឹត្យនិងឯករាជ្យ និងរដ្ឋាភិបាលដឹកនាំបានល្អ លោកគួរតែដោះលែងកូនខ្ញុំឱ្យមានសេរីភាពឡើងវិញ។ ហើយរឿងក្រុមគ្រួសារពួកខ្ញុំ ទម្លាក់ការចោទប្រកាន់ទៅ ព្រោះពួកគាត់គ្មានកំហុសអីទេ សុទ្ធតែពាក់ព័ន្ធនឹងរឿងនយោបាយ»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា តុលាការគួរតែពិចារណាឡើងវិញចំពោះការបន្តឃុំខ្លួនកុមារា កាក់ សុវណ្ណច្ឆ័យ នៅពន្ធនាគារ ដោយសារកុមាររូបនេះមានជំងឺនិងកំពុងស្ថិតនៅក្នុងការសិក្សា ម៉្យាងដើម្បីជួយកាត់បន្ថយភាពចង្អៀតណែនក្នុងពន្ធនាគារដែរ ស្របពេលកម្ពុជាកំពុងឆ្លងរីករាលដាលជំងឺកូវីដ-១៩កាន់តែខ្លាំង។
លើសពីនេះ លោកស្រីសង្កេតឃើញថា តុលាការតែងជ្រើសយកវិធានការឃុំខ្លួនបណ្ដោះអាសន្នលើសកម្មជន បើទោះបីជាពួកគេអះអាងថា នឹងបន្តសហការចូលរួមគ្រប់សវនាការក៏ដោយ ប៉ុន្តែនៅតែមិនអនុញ្ញាតឱ្យពួកគេបាននៅក្រៅឃុំឡើយ។ ករណីនេះ លោកស្រីថា ផ្ទុយពីបទដ្ឋានសិទ្ធិមនុស្សអន្តរជាតិតែម្តង។
លោកស្រីថា៖ «ចំពោះក្រុមគ្រួសារនេះ យើងមើលទៅ ឪពុកគាត់ជាប់ចោទ ហើយស្ថិតនៅក្នុងការឃុំខ្លួន ហើយម្ដាយរបស់ខ្លួនតែងតែសកម្មចេញមុខក្នុងការតវ៉ាជាមួយនឹងស្ត្រីផ្សេងទៀត ដែលគេហៅថា “ក្រុមស្រ្តីថ្ងៃសុក្រ” ដែលយើងឃើញហើយ ជាញឹកញយ ពួកគាត់តែងតែរងការគំរាមកំហែងនិងការយាយីពីអាជ្ញាធរ នៅពេលដែលគាត់តវ៉ា ហើយករណីខ្លះមានការប្រើហិង្សាអីជាដើមទៀត។ អ៊ីចឹង យើងមើលទៅ ក៏អាចជាសញ្ញាការគំរាមកំហែងទៅដល់ស្ត្រីដែលជាម្ដាយ ហើយនឹងសកម្មជនផ្សេងៗទៀតដែលហ៊ានចេញមុខតវ៉ា»។
លោកស្រី ចក់ សុភាព បន្ថែមថា នៅពេលដែលមានការចាប់ខ្លួននិងចោទប្រកាន់បែបនេះ មិនមែនត្រឹមតែជាការគំរាមកំហែងដល់បុគ្គលឬសាច់ញាតិប៉ុណ្ណោះទេ ប៉ុន្តែគឺជាគំរាមកំហែងដល់សង្គមទូទៅផងដែរ។
កុមារ កាក់ សុវណ្ណច្ឆ័យ មានវ័យ១៦ឆ្នាំ ត្រូវបានគ្រួសារអះអាងថា មានជំងឺអូទីហ្សឹមប្រចាំកាយ ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្តងរួចមកហើយកាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមាររូបនោះត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក កុមារ កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយ បណ្តាលឱ្យបែកក្បាលដេរ២០ថ្នេរ ប៉ុន្តែជាច្រើនខែមកនេះ សមត្ថកិច្ចនៅមិនទាន់រកឃើញជនដៃដល់ ដើម្បីយកមកផ្តន្ទាទោសនៅឡើយទ៕