អ្នកជំនាញខាងមេរោគវិទ្យា លើកឡើងថា ការប្រើប្រាស់វ៉ាក់សាំងដូសទី៣របស់ក្រុមហ៊ុនមួយ ទៅចាក់ឱ្យអ្នកដែលបានចាក់វ៉ាក់សាំង២ដូសរបស់ក្រុមហ៊ុនមួយផ្សេងទៀត ដើម្បីជំរុញប្រព័ន្ធការពាររាងកាយប្រឆាំងនឹងវីរុសកូវីដ-១៩ និងវីរុសបំប្លែងខ្លួនថ្មី មិនទាន់មានការណែនាំពីអង្គការសុខភាពពិភពលោកនៅឡើយ។
ការលើកឡើងនេះ ឆ្លើយតបទៅនឹងសេចក្តីសម្រេចរបស់រដ្ឋាភិបាលកម្ពុជាដែលទើបប្រកាសឱ្យប្រើវ៉ាក់សាំង AstraZeneca សម្រាប់ចាក់ដូសលើកទី៣ ដល់ក្រុមគ្រូពេទ្យនិងអាជ្ញាធរជួរមុខ ហើយបញ្ជាទិញបន្ថែមសម្រាប់ចាក់ដល់ពលរដ្ឋ ដើម្បីបង្កើនសមត្ថភាពលើប្រព័ន្ធភាពផ្សាំក្នុងរាងកាយរបស់មនុស្សទប់ទល់នឹងមេរោគបំប្លែងថ្មី“ដែលតា”។
អ្នកជំនាញខាងមេរោគវិទ្យាមួយរូបមកពីសាកលវិទ្យាល័យ ជូឡាឡុងកន ប្រទេសថៃ លោក សោមពុង វង់ពុនសាវ៉ាត (Sompong Vongpunsawad) ប្រាប់ វីអូឌី តាមសារអេឡិចត្រូនិច នៅថ្ងៃទី២ ខែសីហា ម្សិលមិញថា លោកមិនទាន់ឃើញមានការណែនាំណាមួយពីអង្គការសុខភាពពិភពលោកប្រាប់ទៅដល់រដ្ឋាភិបាលនៃប្រទេសនានា ឱ្យប្រើវ៉ាក់សាំងដូសទី៣របស់ក្រុមហ៊ុនមួយចាក់ឆ្លាស់គ្នាជាមួយវ៉ាក់សាំង២ដូសរបស់ក្រុមហ៊ុនមួយផ្សេងទៀត ដើម្បីប្រឆាំងនឹងមេរោគបំប្លែងថ្មីឈ្មោះ“ដែលតា“នោះទេ។
តែយ៉ាងណា លោកក៏មិនទាន់ឃើញការសិក្សាឬទិន្នន័យវិទ្យាសាស្រ្តពេញលេញណាមួយដែលបង្ហាញពីផលប៉ះពាល់សុខភាពដែលបណ្តាលមកពីការចាក់វ៉ាក់សាំងដូសជំរុញ ឬដូសទី៣នៅឡើយដែរ ប៉ុន្តែលោកជឿថា ផលរំខានសុខភាពអាស្រ័យលើវ៉ាក់សាំងដូសទី៣ ដូចជា វ៉ាក់សាំងរបស់ក្រុមហ៊ុន AstraZeneca ដែលធ្លាប់មានបញ្ហាកំណកឈាម តែវាជាករណីកម្រ។
ឆ្លើយតបនឹងសំណួរថា តើការចាក់ដូសទី៣នេះអាចជំរុញប្រព័ន្ធភាពផ្សាំក្នុងរាងកាយមនុស្សប្រឆាំងនឹងមេរោគបំប្លែងខ្លួនថ្មីដែរឬទេ? លោកថា លោកក៏មិនទាន់ដឹងប្រាកដនៅឡើយ។
លោក វង់ពុនសាវ៉ាត និយាយថា៖ «ទោះយ៉ាងណាក៏ដោយ យើងគិតថា ចំណុចអាទិភាពគួរតែគ្រប់គ្នានៅក្នុងប្រទេសកម្ពុជាទទួលបានការចាក់វ៉ាក់សាំងពេញលេញជាមុនសិន មិនថាចាក់រួចទាំង២លើកជាមួយវ៉ាក់សាំង Sinovac [ឬ] Sinopharm ឬ Astra Zeneca នោះទេ»។
យ៉ាងណាក៏ដោយ អ្នកជំនាញខាងគ្លីនិករោគវិទ្យារូបនេះ លើកឡើងថា រដ្ឋាភិបាលនៃប្រទេសអាស៊ានមួយចំនួនដូចជា ថៃ និងឥណ្ឌូនេស៊ី គ្រោងនឹងប្រើវ៉ាក់សាំង Moderna ឬ Pfizer ឬ AstraZeneca សម្រាប់ជាដូសជំរុញចាក់លើក្រុមបុគ្គលិកសុខាភិបាលនិងគ្រូពេទ្យជួរមុខនៅក្នុងប្រទេសរបស់ពួកគេដែលបានចាក់វ៉ាក់សាំង Sinovac ឬ Sinopharm រួចទាំង២លើកដែរ។
លោកបន្ថែមថា៖ «ប្រទេសថៃដែលទើបទទួលបានជំនួយវ៉ាក់សាំង Pfizer កាលពីខែមុន កំពុងគ្រោងផ្តល់ដូសជំរុញទី៣ ដល់ក្រុមការងារសុខាភិបាលជួរមុខដែលពីមុនបានទទួលវ៉ាក់សាំង Sinovac ចំនួន២ដូសរួច។ ភាពចម្រូងចម្រាស ប្រាកដណាស់ ថាតើមនុស្សប៉ុន្មាននាក់ដែលមិនទាន់បានចាក់សូម្បីតែ១ដូស»។
នាយករដ្ឋមន្រ្តីកម្ពុជា លោក ហ៊ុន សែន បានសម្រេចប្រើវ៉ាក់សាំងជំនួយពីរដ្ឋាភិបាលអង់គ្លេសនិងជប៉ុនឈ្មោះ AstraZeneca ប្រមាណជាង១លានដូសចាក់បន្ថែមដល់បុគ្គលិកពេទ្យ និងកងកម្លាំងអាជ្ញាធរនៅតាមព្រំដែន និងក្រុមជួរមុខទាំងអស់ ដែលមានពី៥សែនទៅ១លាននាក់។
ការសម្រេចនេះត្រូវបានលោកប្រកាសឱ្យដឹងនៅក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដល់ក្មេងជំទង់អាយុចាប់ពី១២ឆ្នាំដល់១៧ឆ្នាំ កាលពីថ្ងៃទី១ ខែសីហា ឆ្នាំ២០២១ ក្នុងគោលបំណងដើម្បីបង្កើនភាពផ្សាំក្នុងរាងកាយមនុស្សតទល់នឹងការវាយប្រហារនៃមេរោគបំប្លែងខ្លួនថ្មី”ដែលតា”ដែលមានកម្រិតចម្លងនិងហានិភ័យខ្ពស់។
ក្នុងឱកាសនោះ លោកក៏បានស្នើឱ្យក្រសួងពាក់ព័ន្ធបញ្ជាទិញវ៉ាក់សាំង AstraZeneca ដើម្បីបម្រុងទុកចាក់ដល់ពលរដ្ឋនៅទូទាំងប្រទេសដែលមានអាយុចាប់ពី១៨ឆ្នាំឡើង ចំនួន៩លាននាក់ បន្ទាប់ពីពួកគេចាក់វ៉ាក់សាំង Sinovac ឬ Sinopharm ចំនួន២លើករួចមកហើយ ខណៈអ្នកដែលបានចាក់វ៉ាក់សាំង AstraZeneca ចំនួន២លើករួច នឹងអាចចាក់វ៉ាក់សាំង Sinovac ឬ Sinopharm នៅដូសទី៣។
លោក ហ៊ុន សែន មានប្រសាសន៍ថា៖ «គេហាមឆ្លាស់ដូសទី១ម៉ាកនេះ ដូសទី២ម៉ាកនេះ។ ប៉ុន្តែចាប់ពីដូសទី៣ទៅ គេអាចឱ្យដូសផ្សេង អ៊ីចឹងគេបានសិក្សាហើយ។ ក្រុមគ្រូពេទ្យរបស់យើងក៏មានថ្នាក់អ្នកឯកទេសធ្វើការសិក្សាថា ដូសទី៣ ដូចជាយក AstraZeneca វាមាន គេហៅថា បង្កើតអង្គបដិបក្ខ វាបានច្រើនជាងអាវ៉ាក់សាំងដដែល»។
លោកបន្ថែមថា៖ «យើងត្រូវចំណាយថវិកាបន្ថែមទៀត ព្រោះដើម្បីកុំឱ្យយើងចាក់អា២ដូសទៅហើយ ព្រោះនៅពេលណាមួយប្រសិទ្ធភាពរបស់វាថយ។ អ៊ីចឹងបើវាថយ យើងយកអាដូសជំរុញវាឱ្យកើនឡើងថែមទៀត ព្រោះនៅពេលណាមួយវាថយចុះតិចៗៗ អ៊ីចឹងមានអាដូសជំរុញទី៣»។
វីអូឌី មិនអាចទាក់ទងអ្នកនាំពាក្យក្រសួងសុខាភិបាល លោកស្រី ឱ វណ្ណឌីន តំណាងអង្គការសុខភាពពិភពលោកប្រចាំនៅកម្ពុជា អ្នកស្រី Li Ailan និងអ្នកនាំពាក្យក្រសួងសេដ្ឋកិច្ចនិងហិរញ្ញវត្ថុ លោក វង់ សេងវិសុទ្ធ ដើម្បីសាកសួរបន្ថែមជុំវិញប្រសិទ្ធភាពវ៉ាក់សាំងដូសទី៣ និងការបញ្ជាទិញវ៉ាក់សាំង AstraZeneca បានទេ នៅថ្ងៃអង្គារនេះ។
យ៉ាងណា អ្នកនាំពាក្យក្រុមហ៊ុនផលិតវ៉ាក់សាំង Sinovac លោក Liu Peicheng បានប្រាប់សារព័ត៌មាន Reuter នៅចុងខែមិថុនា ដោយផ្អែកលើលទ្ធផលវិភាគសំណាកឈាម បង្ហាញថា មេរោគ“ដែលតា“អាចបន្សាបឥទ្ធិពលប្រព័ន្ធភាពផ្សាំក្នុងរាងកាយអ្នកដែលបានចាក់វ៉ាក់សាំងរបស់ក្រុមហ៊ុនចំនួន៣ដង។ ប្រភពដដែលអះអាងថា ការចាក់ដូសជំរុញទី៣ នឹងអាចជួយដាស់អង្គបដិបក្ខក្នុងរាងកាយមនុស្សឱ្យឆាប់ខ្លាំងនិងរឹងមាំឡើងបានយូរប្រឆាំងនឹងមេរោគបំប្លែងថ្មី។
កាលពីសប្តាហ៍មុននេះ ក្រសួងសុខាភិបាលកម្ពុជាបានរកឃើញមេរោគបំប្លែងថ្មីប្រភេទ B.1.167.2 ឬ “ដែលតា” ចំនួន១០៩ករណីបន្ថែមទៀត ដោយរកឃើញនៅ១១រាជធានី-ខេត្ត ហើយភាគច្រើនពាក់ព័ន្ធនឹងពលករត្រឡប់មកពីប្រទេសថៃ។ ការរកឃើញថ្មីនេះបានធ្វើឱ្យតួលេខឆ្លងសរុបមាន២៦២ករណី ដោយគិតរាប់ចាប់ពីករណីរកឃើញដំបូងនៅចុងខែមីនាឆ្នាំ២០២១ ដល់ថ្ងៃទី២ ខែសីហា ឆ្នាំ២០២១។
គិតមកដល់ថ្ងៃទី៣ ខែសីហា ឆ្នាំ២០២១នេះ កម្ពុជាបានចាក់វ៉ាក់សាំងប្រឆាំងជំងឺកូវីដ-១៩ ជូនប្រជាជនចាប់ពីអាយុ១៨ឆ្នាំឡើងទៅ បានជាង៧លាននាក់ហើយ ក្នុងចំណោមចំនួនគោលដៅសរុបប្រមាណ១០លាននាក់នៅទូទាំងប្រទេស ដែលគ្រោងនឹងត្រូវបញ្ចប់នៅត្រឹមខែមិថុនា ឆ្នាំ២០២២៕
