លោកនាយករដ្ឋមន្ត្រី ហ៊ុន សែន ប្រកាសថា បេសកកម្មចាក់វ៉ាក់សាំងប្រឆាំងជំងឺកូវីដ-១៩ដល់កុមារនិងយុវវ័យចាប់ពីអាយុ១២ឆ្នាំដល់១៧ឆ្នាំ គឺជាវិធានការមួយដើម្បីត្រៀមក្នុងការបើកសាលារៀនឡើងវិញនៅខែកញ្ញាឬតុលាខាងមុខ។
ថ្លែងក្នុងពិធីបើកយុទ្ធនាការចាក់វ៉ាក់សាំងកូវីដ-១៩ដល់កុមារនិងយុវវ័យ នៅវិមានសន្តិភាព នាព្រឹកថ្ងៃទី១ ខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន បានបញ្ជាក់ថា កុមារនិងយុវជនគឺជាទំពាំងស្នងឫស្សីនិងជាសសរទ្រូងជាតិ ដែលត្រូវគិតគូរជាចម្បង។ លោកបន្តថា ដោយសារចាប់តាំងពីកម្ពុជាមានវិបត្តិកូវីដ-១៩មក បានបណ្តាលឱ្យប៉ះពាល់ដល់គុណភាពអប់រំនិងការសិក្សារបស់សិស្សជាខ្លាំង។
លោកបន្ថែមថា ទោះបីកន្លងមក សិស្សានុសិស្សបានបង្វែរទៅរៀនតាមប្រព័ន្ធអនឡាញឬឧបករណ៍ផ្សេងៗក៏ដោយ ប៉ុន្តែសិស្សហាក់ខ្វះការយកចិត្តទុកដាក់ក្នុងការរៀនសូត្រ ហើយផលដែលទទួលបានក៏មិនសូវល្អដូចរៀននៅក្នុងសាលាឡើយ។ ករណីនេះ លោកថា ជាគោលដៅនិងជាការគិតគូរ គ្រឹះស្ថាននានាត្រៀមរៀបចំបើកសាលារៀនវិញដើម្បីបន្តពង្រឹងគុណភាពការអប់រំ។
លោកមានប្រសាសន៍ថា៖ «យើងអាចបើកដំណើរការឡើងវិញនូវសាលារៀននិងគ្រឹះស្ថានអប់រំនានា។ យ៉ាងហោចណាស់ យើងអាចចាប់ផ្តើមបើកសាលាចាប់ពីអនុវិទ្យាល័យឡើង សម្រាប់បវេសនកាល ២០២១-២០២២ នៅខែកញ្ញាឬតុលាខាងមុខ»។
បើតាមលោកនាយករដ្ឋមន្ត្រី ការបើកសាលារៀនឡើងវិញនេះជាការចូលរួមកាត់បន្ថយផលប៉ះពាល់ដល់ការអប់រំចំពោះកុមារនិងយុវវ័យ ដោយពួកគេត្រូវការជាចាំបាច់ក្នុងការរៀនសូត្រក្នុងសាលានិងរៀនជាមួយគ្រូផ្ទាល់។
គ្រឹះស្ថានអប់រំនានាទាំងរដ្ឋនិងឯកជនគ្រប់កម្រិត ត្រូវបានបិទដំណើរការដោយសារការឆ្លងរាលដាលនៃជំងឺកូវីដ-១៩ ក្នុងសហគមន៍ ចាប់តាំងពីថ្ងៃទី២០ ខែមីនាមក ដោយបង្វែរមករៀនតាមរយៈប្រព័ន្ធអនឡាញវិញ ដើម្បីចូលរួមទប់ស្កាត់ការឆ្លងរាលដាលជំងឺផ្លូវដង្ហើមមួយនេះ។
ក្នុងរបាយការណ៍ដែលចេញផ្សាយលើទំព័រហ្វេសប៊ុកអង្គការសហប្រជាជាតិនៅកម្ពុជា កាលពីថ្ងៃទី២១ ខែកក្កដា ឆ្នាំ២០២១ បានរកឃើញថា ក្នុងឆ្នាំ២០២០ សិស្សជាង៣,២លាននាក់នៅទូទាំងប្រទេសកម្ពុជាបានប៉ះពាល់ការសិក្សា បន្ទាប់ពីគ្រឹះស្ថានសិក្សារដ្ឋនិងឯកជនបានបិទដំណើរការរយៈពេលជាង២០០ថ្ងៃជាបណ្តោះអាសន្ន ដោយសារការរីករាលដាលជំងឺកូវីដ-១៩។
អង្គការសហប្រជាជាតិ ឱ្យដឹងទៀតថា ការប៉ះពាល់នេះបានជំរុញឱ្យវិស័យអប់រំមានការធ្លាក់ចុះយ៉ាងខ្លាំងក្នុងការអភិវឌ្ឍមនុស្ស (HDI) នៅកម្ពុជា សម្រាប់ឆ្នាំ២០២០ ដោយធ្លាក់ចុះជិត៤ភាគរយ (៣,៩៣%) បើប្រៀបធៀបពីឆ្នាំ២០១៩ ឬស្មើនឹងការលុបបំបាត់រាល់ការរីកចម្រើនលើវិស័យអប់រំដែលបានធ្វើក្នុងរយៈពេល៤ឆ្នាំកន្លងមក។
មួយវិញទៀត ការបិទទ្វារសាលារៀនយូរនេះបានធ្វើឱ្យចំនួនកុមារប្រឈមនឹងការមិនវិលត្រឡប់ទៅសាលារៀនមានការកើនឡើង ជាពិសេសសម្រាប់កុមារមកពីក្រុមងាយរងគ្រោះ ខណៈលទ្ធភាពនៃបើកសាលារៀននៅមិនទាន់ដឹងពេលណាប្រាកដនៅឡើយ ព្រោះការរីករាលដាលជំងឺកូវីដ-១៩នៅតែបន្ត៕
