ក្រសួងសុខាភិបាលផ្តើមអនុវត្តយុទ្ធនាការអប់រំប្រជាពលរដ្ឋបន្ថែមទៀត ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩» ដើម្បីរួមគ្នាទទួលខុសត្រូវក្នុងស្មារតីសាមគ្គីភាពក្នុងការកាត់ផ្ដាច់ខ្សែចម្លងវីរុសកូវីដ-១៩ ព្រមទាំងរស់នៅជាមួយវីរុសកូវីដ-១៩ទៅតាមគន្លងប្រក្រតីភាពថ្មីឱ្យបានត្រឹមត្រូវ។
សេចក្ដីជូនដំណឹងនេះធ្វើឡើងដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ ជំរុញការទទួលខុសត្រូវរបស់បុគ្គល គ្រួសារ សហគមន៍ ស្ថាប័នពាក់ព័ន្ធ ជាពិសេស សេវាឯកជន អាជ្ញាធរមូលដ្ឋាន ចុះកាលពីថ្ងៃទី០២ ខែសីហា ឆ្នាំ២០២១នេះ។
លោក ម៉ម ប៊ុនហេង បានថ្លែងក្នុងសេចក្ដីជូនដំណឹងថា យុទ្ធនាការអប់រំផ្សព្វផ្សាយអំពីវិធានការការពារជំងឺកូវីដ-១៩ បានធ្វើឡើងជាច្រើនក្នុងមួយរយៈពេលកន្លងមក ប៉ុន្តែសកម្មភាពទាំងអស់នោះមិនទាន់គ្រប់គ្រាន់នៅឡើយក្នុងការឆ្លើយតបទៅនឹងស្ថានភាពនៃការចម្លងវីរុសកូវីដ-១៩នាបច្ចុប្បន្ននេះ។
លោកបានបន្តថា៖ «ដូច្នេះការរៀបចំបន្តយុទ្ធនាការដែលមានលក្ខណៈផ្ដោតចំពោះ និងមានកិច្ចសហការរវាងភាគីពាក់ព័ន្ធទាំងអស់ ដោយល្អិតល្អន់ និងសម្រុកក្នុងពេលតែមួយចាប់ពីពេលនេះតទៅ គឺមានសារៈសំខាន់បំផុត ដើម្បីឈានទៅសម្រេចបានការផ្លាស់ប្តូរឥរិយាបថរបស់ប្រជាជនក្នុងការរស់នៅតាមបែបគន្លងថ្មីជាមួយវីរុសកូវីដ-១៩»។
ប្រភពដដែលបន្តថា ហេតុដូច្នេះ អនុគណៈកម្មការអប់រំ បណ្ដុះបណ្ដាល និងទំនាក់ទំនងសាធារណៈ នៃគណៈកម្មការអន្តរក្រសួងប្រយុទ្ធនឹងជំងឺកូវីដ-១៩ ក៏បានរៀបចំជាសេចក្ដីណែនាំក្នុងការរៀបចំយុទ្ធនាការអប់រំ ផ្សព្វផ្សាយ និងបណ្ដុះបណ្ដាលប្រជាពលរដ្ឋ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩» ក្នុងការរៀបចំអនុវត្តយុទ្ធនាការថ្នាក់ជាតិនេះឱ្យមានប្រសិទ្ធភាព។
ជាមួយគ្នានេះ សេចក្ដីណែនាំនេះជូនចំពោះទេសរដ្ឋមន្រ្តី រដ្ឋមន្រ្ដី អភិបាលនៃគណៈអភិបាលរាជធានី-ខេត្ត ដើម្បីចូលរួមជំរុញយុទ្ធនាការពញ្ញាក់ស្មារតីសាមគ្គីភាពនិងការទទួលខុសត្រូវពីភាគីពាក់ព័ន្ធ ក្រោមសមត្ថកិច្ចនៃថ្នាក់ក្រោមជាតិនិងបុគ្គលគ្រប់រូប។
គួរបញ្ជាក់ផងដែរ គិតត្រឹមព្រឹកថ្ងៃទី០៣ ខែសីហា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៧៩ ០៥១នាក់ ក្នុងនោះមានអ្នកស្លាប់ចំនួន១ ៤៧១នាក់ អ្នកជំងឺព្យាបាលជាសះស្បើយសរុបចំនួន៧២ ១៤៥នាក់ ខណៈករណីនាំចូលពីក្រៅប្រទេសសរុបមាន១១ ១៩៥នាក់៕